ജിമിക്കി കമ്മലിന് പ്രണവിന്റെ ഡാന്‍സ്- വീഡിയോ

മോഹന്‍ലാല്‍ നായകനായ വെളിപാടിന്റെ പുസ്തകത്തിലെ ജിമിക്കി കമ്മല്‍ എന്ന ഗാനത്തിനൊപ്പം നൃത്തം വയ്‍ക്കുകയാണ് ഇപ്പോള്‍ എല്ലാവരും. ഇപ്പോഴിതാ ആ ഗാനത്തിന് മോഹന്‍ലാലിന്റെ മകന്‍ പ്രണവ് മോഹന്‍ലാലും ചുവടുവയ്ക്കുന്ന വീഡിയോ പുറത്തുവന്നിരിക്കുന്നു. സംവിധായകന്‍ ജിത്തു ജോസഫ് ആണ് വീഡിയോ ഫേസ്ബുക്കില്‍ ഷെയര്‍ ചെയ്‍തിരിക്കുന്നത്.

ജിത്തു സംവിധാനം ചെയ്യുന്ന ആദി എന്ന സിനിമയില്‍ അഭിനയിച്ചുകൊണ്ടിരിക്കുകയാണ് പ്രണവ് മോഹന്‍ലാല്‍.  ഇതാദ്യമായിട്ടാണ് പ്രണവ് മോഹന്‍ലാല്‍ നായകനായി അഭിനയിക്കുന്നത്.

ഒരു കാര്യം ഏല്‍പ്പിച്ചാല്‍ അതിന്റെ പൂര്‍ണ്ണതയ്ക്കു വേണ്ടി  എന്തും ചെയ്യുന്ന ആളാണ് പ്രണവ് മോഹന്‍ലാല്‍ എന്നാണ് ജിത്തു ജോസഫ് ഒരു അഭിമുഖത്തില്‍ പറഞ്ഞത്. ഒരു ഒത്തുതീര്‍പ്പിനും തയ്യാറല്ല. എന്റെ അഭിപ്രായത്തില്‍ തികഞ്ഞൊരു പെര്‍ഫെക്ഷിലിസ്റ്റാണ് പ്രണവ്. അപ്പു ഗിറ്റാര്‍ വായിക്കും. ഒരിക്കല്‍ അയാള്‍ ഗിറ്റാര്‍ വായിച്ചുകൊണ്ടിരിക്കുമ്പോള്‍ ഞാന്‍ ചോദിച്ചു, ആരാണ് ഗുരുവെന്ന്? ഇന്റര്‍നെറ്റിന്റെ സഹായത്തോടെ പഠിക്കുകയായിരുന്നുവെന്നാണ് അപ്പു പറഞ്ഞത്. ഒരാളുടെ കീഴില്‍ പോയി പഠിക്കാത്തതെന്താണെന്ന് ചോദിച്ചപ്പോള്‍ അദ്ദേഹത്തിന്റെ സ്വാധീനം ഒഴിവാക്കാന്‍‌ ഏറ്റവും നല്ല മാര്‍ഗ്ഗം അതെന്നായിരുന്നു അപ്പുവിന്റെ മറുപടി. ഇങ്ങനെ അനവധി സവിശേഷസ്വഭാവങ്ങള്‍ ഉള്ളയാളാണ് അപ്പു. എന്തുചെയ്താലും അത് മൗലികമായിരിക്കുമെന്നും അയാള്‍ക്ക് ബോദ്ധ്യമുണ്ട്. അതുകൊണ്ട് അയാള്‍ ഏത് ഫീല്‍ഡില്‍ ജോലി ചെയ്താലും മികവ് കാട്ടുമെന്ന് ഉറപ്പാണ്.- ജീത്തു ജോസഫ് പറയുന്നു. ആദി ഒരു ലോകോത്തര സിനിമയൊന്നുമല്ല.  ഒരു സാദാ ചിത്രം. എന്നാല്‍ ഒരു കൊമേഴ്സ്യല്‍ സിനിമയുടെ എല്ലാ ചേരുവകളും അതിലുണ്ട്. മൂന്ന് വ്യത്യസ്ത് മുഖങ്ങളാണ് പ്രണവിന് സിനിമയിലുള്ളത്. ആദ്യത്തെ രണ്ടു മുഖങ്ങളിലും നിങ്ങള്‍ക്ക് പരിചയമുള്ള പ്രണവിനെ തന്നെയാവും കാണാനാവുക. മൂന്നാമത്തെ മുഖം തീര്‍ച്ചയായും അപരിചിതമായിരിക്കും. അതാണ് സിനിമയുടെ രസക്കൂട്ടും- ജീത്തു ജോസഫ് പറയുന്നു.