വിശ്വാസത്തിന്റെ തിരക്കില്‍ തല, പുതിയ വിവരങ്ങള്‍

തമിഴകത്തിന്റെ തല അജിത്ത് വിശ്വാസത്തിന്റെ തിരക്കിലാണ്. കഴിഞ്ഞ കുറച്ചുനാളായി റാമോജി റാവു ഫിലിം സിറ്റിയില്‍ ചിത്രത്തിന്റെ ഷൂട്ടിംഗ് തുടര്‍ച്ചയായി നടന്നുകൊണ്ടിരിക്കുകയാണ്. അവസാന ഘട്ടത്തിലാണ് ചിത്രത്തിന്റെ ചിത്രീകരണം. സാള്‍ട്ട് ആൻഡ് പെപ്പര്‍ ലുക്കില്‍ വെളുത്ത ഷര്‍ട്ടും മുണ്ടും ധരിച്ചാണ് അജിത്ത് ആ രംഗങ്ങളില്‍ അഭിനയിക്കുന്നത്. എന്നാല്‍ അജിത്തിന്റെ കഥാപാത്രത്തെ കുറിച്ച് മറ്റൊരു വിവരം കൂടി അണിയറപ്രവര്‍ത്തകര്‍ പുറത്തുവിടുന്നു.

കുറെ രംഗങ്ങളില്‍ ബുള്ളറ്റ് ഓടിക്കുന്ന അജിത്തിനെയും കാണാം എന്നാണ് അണിയറപ്രവര്‍ത്തകര്‍ പറയുന്നത്.  അജിത്ത് ഗംഭീരമായാണ് ആ രംഗങ്ങളില്‍ അഭിനയിച്ചിരിക്കുന്നതെന്നുമാണ് റിപ്പോര്‍ട്ട്.

ചിത്രത്തില്‍ സാള്‍ട് ആന്‍ഡ് പെപ്പര്‍ ലുക്കിലും തല നരയ്‍ക്കാത്ത ലുക്കിലും അജിത് അഭിനയിക്കുന്നുണ്ട്.  ചിത്രത്തില്‍ അജിത് ഇരട്ടവേഷത്തിലായിരിക്കും അഭിനയിക്കുകയെന്ന് നേരത്തെ തന്നെ റിപ്പോര്‍ട്ടുണ്ട്. പൊലീസ് ഉദ്യോഗസ്ഥനാണ് ഒരു കഥാപാത്രമെന്നായിരുന്നു റിപ്പോര്‍ട്ട്. നിരവധി ഷൂട്ടിംഗ് ആക്ഷന്‍ രംഗങ്ങള്‍ ചിത്രത്തിലുണ്ട്. ചിത്രത്തിനായി ചെന്നൈ റൈഫിള്‍ ക്ലബില്‍ അജിത് ഷൂട്ടിംഗില്‍ പരിശീലനം നേടിയിരുന്നു. അതേസമയം മധുര സ്വദേശിയായ കഥാപാത്രമായും അജിത് ചിത്രത്തിലുണ്ടാകും എന്നും റിപ്പോര്‍ട്ടുണ്ട്. വിശ്വാസത്തില്‍ അജിത് ഒരു പാട്ടും ആലപിക്കുന്നുണ്ട്. നായികയായി അഭിനയിക്കുന്നത് നയൻതാരയാണ്. പൊങ്കലിന് ചിത്രം റിലീസ് ചെയ്യും. വീരം, വേതാളം, വിവേഗം എന്നീ ചിത്രങ്ങളാണ് ശിവയും അജിത്തും മുമ്പ് ഒന്നിച്ച ചിത്രങ്ങള്‍.