സ്റ്റൈല്‍മന്നന്റെ പിന്‍ഗാമി ആര്? രജനികാന്തും ആരാധകരും പറയുന്നത് കേള്‍ക്കൂ

രാജ്യത്തിനകത്തും പുറത്തും നിരവധി ആരാധകരുള്ള താരമാണ് സ്റ്റൈല്‍മന്നന്‍ രജനികാന്ത്. ആരായിരിക്കും രജനികാന്തിന് ശേഷം ആരാധകര്‍ ആഘോഷിക്കുന്ന താരം? രജനികാന്ത് തന്നെ ഇക്കാര്യത്തില്‍ പരോക്ഷമായ സൂചനകള്‍ നല്‍കുന്നുവെന്നാണ് ആരാധകര്‍ പറയുന്നത്. വിജയ് തന്റെ പിന്‍ഗാമി ആയിരിക്കുമെന്നാണ് രജനികാന്ത് സൂചിപ്പിക്കുന്നത്.

ആരാധകരോട് സംവദിക്കവേ ആണ് രജനികാന്ത് തന്റെ പിന്‍ഗാമിയെ കുറിച്ച് പരോക്ഷമായി സൂചിപ്പിച്ചത്. പണ്ടൊരിക്കല്‍ ശിവാജി ഗണേശനൊപ്പം ഒരു വിമാനത്താവളത്തില്‍ എത്തിയതായിരുന്നു. അന്ന് ശിവാജി ഗണേശന്റെ ആരാധകരുടെ ആര്‍പ്പുവിളിയില്‍ താന്‍ മങ്ങിപ്പോയെന്നാണ് രജനികാന്ത് പറയുന്നത്. വര്‍ഷങ്ങള്‍ക്കു ശേഷം താന്‍ കോയമ്പത്തൂര്‍ സന്ദര്‍ശിച്ചപ്പോള്‍ ആരാധകര്‍ മറ്റൊരു താരത്തെ സ്വീകരിക്കാന്‍ തിങ്ങിക്കൂടിയുണ്ടായിരുന്നുവെന്ന് രജനികാന്ത് പറയുന്നു. മറ്റാരുമല്ല വിജയ് ആയിരുന്നു ആ താരമെന്നാണ് ആരാധകര്‍ പറയുന്നത്.

ആ താരം വിജയ് ആണെന്ന് രജനികാന്ത് കൃത്യമായി പറയുന്നില്ലെങ്കിലും ആരാധകര്‍ ആ പ്രസ്താവന ഏറ്റെടുത്തു കഴിഞ്ഞു. കോയമ്പത്തൂര്‍ വിമാനത്താവളത്തില്‍ വിജയ്യ്ക്ക് ആരാധകര്‍ നല്‍കിയ സ്വീകരണത്തിന്റെ വീഡിയോ അവര്‍ സാമൂഹ്യമാധ്യമങ്ങളില്‍ പോസ്റ്റ് ചെയ്തിരിക്കുകയാണ്. വിജയ് ആണ് രജനികാന്ത് പറഞ്ഞ താരമമെന്നും ആരാധകര്‍ പറയുന്നു.