ഈ അഞ്ച് നട്സ് കഴിക്കൂ, ശരീരത്തിന് വേണ്ട പ്രോട്ടീന് ലഭിക്കും...
Synopsis
ഫൈബര്, അയേണ്, കാത്സ്യം, മഗ്നീഷ്യം, ഫോസ്ഫറസ്, വിറ്റാമിന് ഇ, ബി, ആന്റി ഓക്സിഡന്റുകള് തുടങ്ങി ആരോഗ്യത്തിന് വേണ്ട എല്ലാം ഇവയില് അടങ്ങിയിരിക്കുന്നു.
ശരീരത്തിന്റെ പല പ്രവർത്തനങ്ങളിലും പ്രധാന പങ്ക് വഹിക്കുന്ന ഒരു പോഷകമാണ് പ്രോട്ടീൻ. പേശികളുടെ വളര്ച്ചക്കും ശരീരത്തിന്റെ ആരോഗ്യത്തിനും പ്രോട്ടീനുകള് ആവശ്യമാണ്. ശരീരത്തിന് വേണ്ട ഊര്ജ്ജത്തിനും രോഗ പ്രതിരോധശേഷിക്കുമെല്ലാം പ്രോട്ടീനുകള് അടങ്ങിയ ഭക്ഷണങ്ങള് കഴിക്കേണ്ടത് പ്രധാനമാണ്. മുട്ട, പാല്, മീന്, ഇറച്ചി എന്നിവയാണ് പ്രോട്ടീന് സമൃദ്ധമായ ഭക്ഷണങ്ങളായി കണക്കാക്കുന്നത്.
അത്തരത്തില് പ്രോട്ടീനുകളാല് സമൃദ്ധമാണ് നട്സ്. കൂടാതെ ഫൈബര്, അയേണ്, കാത്സ്യം, മഗ്നീഷ്യം, ഫോസ്ഫറസ്, വിറ്റാമിന് ഇ, ബി, ആന്റി ഓക്സിഡന്റുകള് തുടങ്ങി ആരോഗ്യത്തിന് വേണ്ട എല്ലാം ഇവയില് അടങ്ങിയിരിക്കുന്നു. ദിവസവും രാവിലെ ഒരു പിടി നട്സ് കഴിക്കുന്നത് ആരോഗ്യത്തിന് എന്തുകൊണ്ടും നല്ലതാണ്. പ്രോട്ടീന് ലഭിക്കാന് ഡയറ്റില് ഉള്പ്പെടുത്തേണ്ട നട്സുകളെ പരിചയപ്പെടാം...
ഒന്ന്...
നിലക്കടലയാണ് ആദ്യമായി ഈ പട്ടികയില് ഉള്പ്പെടുന്നത്. പ്രോട്ടീനിന്റെ കലവറയാണ് ഇവ. 100 ഗ്രാം നിലക്കടലയിൽ 26 ഗ്രാം പ്രോട്ടീൻ അടങ്ങിയിട്ടുണ്ട്. അതിനാല് പ്രോട്ടീനിന്റെ അഭാവമുള്ളവര്ക്ക് നിലക്കടല ഡയറ്റില് ഉള്പ്പെടുത്താം.
രണ്ട്...
ബദാം ആണ് രണ്ടാമതായി ഈ പട്ടികയില് ഉള്പ്പെടുന്നത്. 100 ഗ്രാം ബദാമില് 21 ഗ്രാം പ്രോട്ടീൻ അടങ്ങിയിട്ടുണ്ട്. കൂടാതെ ഫൈബര്, വിറ്റാമിനുകള്, ആരോഗ്യകരമായ കൊഴുപ്പ് തുടങ്ങിയവയും ബദാമിലുണ്ട്.
മൂന്ന്...
അണ്ടിപരിപ്പ് അഥവാ കശുവണ്ടിയാണ് അടുത്തതായി ഈ പട്ടികയില് ഉള്പ്പെടുന്നത്. 100 ഗ്രാം കശുവണ്ടിയിൽ 18.22 ഗ്രാം പ്രോട്ടീൻ അടങ്ങിയിട്ടുണ്ട്. കൂടാതെ മഗ്നീഷ്യം, പൊട്ടാസ്യം, അയേണ്, ഫോസ്ഫറസ്, സിങ്ക്, കോപ്പര് തുടങ്ങിയവയും ഇവയില് അടങ്ങിയിട്ടുണ്ട്.
നാല്...
പിസ്തയാണ് നാലാമതായി ഈ പട്ടികയില് ഉള്പ്പെടുന്നത്. 100 ഗ്രാം പിസ്തയില് 20 ഗ്രാം പ്രോട്ടീൻ അടങ്ങിയിട്ടുണ്ട്. വിറ്റാമിൻ എ, ബി 6, കെ, സി, ഇ, കാത്സ്യം, അയേൺ, സിങ്ക്, ഫൈബര്, ആരോഗ്യകരമായ കൊഴുപ്പ് തുടങ്ങിയവ അടങ്ങിയതാണ് പിസ്ത. അതിനാല് ഇവയും ആരോഗ്യത്തിന് നല്ലതാണ്.
അഞ്ച്...
വാള്നട്സ് ആണ് അവസാനമായി ഈ പട്ടികയില് ഉള്പ്പെടുന്നത്. 100 ഗ്രാം വാള്നട്സില് 15 ഗ്രാം പ്രോട്ടീൻ അടങ്ങിയിട്ടുണ്ട്. വിറ്റാമിനുകള്, ധാതുക്കള്, ആരോഗ്യകരമായ കൊഴുപ്പ്, ഫൈബര്, ഒമേഗ 3 ഫാറ്റി ആസിഡ്, മറ്റ് അവശ്യ പോഷകങ്ങൾ എന്നിവയാൽ സമ്പന്നമാണ് ഇവ.
Also read: ആർത്രൈറ്റിസ് അഥവാ സന്ധിവാതമുള്ളവര് ഡയറ്റില് ഉള്പ്പെടുത്തേണ്ട അഞ്ച് പാനീയങ്ങള്...