അടിവയറ്റിലെ കൊഴുപ്പ് എളുപ്പം കുറയ്ക്കാം; ഡയറ്റില് ഉള്പ്പെടുത്താം പ്രോട്ടീൻ അടങ്ങിയ ഈ ഭക്ഷണങ്ങൾ...
Synopsis
മിതമായ അളവില് പ്രോട്ടീന് അടങ്ങിയ ഭക്ഷണങ്ങള് കഴിക്കുന്നത് ശരീരഭാരം നിയന്ത്രിക്കാന് സഹായിക്കും. അത്തരത്തില് അടിവയറ്റിലെ കൊഴുപ്പ് കുറയ്ക്കാന് ഡയറ്റില് ഉള്പ്പെടുത്തേണ്ട പ്രോട്ടീൻ അടങ്ങിയ ചില ഭക്ഷണങ്ങളെ പരിചയപ്പെടാം...
ശരീരത്തിൽ അമിതമായി കൊഴുപ്പ് അടിഞ്ഞ് കൂടുന്നത് പല തരത്തിലുള്ള ആരോഗ്യ പ്രശ്നങ്ങള് ഉണ്ടാക്കാം. വയറിലെ കൊഴുപ്പ് അഥവാ വിസറൽ ഫാറ്റ് ആണ് കുറയ്ക്കാന് ഏറെ പ്രയാസം. പലപ്പോഴും വ്യായാമമില്ലായ്മയും നിയന്ത്രണങ്ങളില്ലാത്ത ഭക്ഷണരീതിയുമെല്ലാമാണ് ഇതിന് കാരണം.
മിതമായ അളവില് പ്രോട്ടീന് അടങ്ങിയ ഭക്ഷണങ്ങള് കഴിക്കുന്നത് ശരീരഭാരം നിയന്ത്രിക്കാന് സഹായിക്കും. അത്തരത്തില് അടിവയറ്റിലെ കൊഴുപ്പ് കുറയ്ക്കാന് ഡയറ്റില് ഉള്പ്പെടുത്തേണ്ട പ്രോട്ടീൻ അടങ്ങിയ ചില ഭക്ഷണങ്ങളെ പരിചയപ്പെടാം...
ഒന്ന്...
ബ്രൊക്കോളി ആണ് ആദ്യമായി ഈ പട്ടികയില് ഉള്പ്പെടുന്നത്. അര കപ്പ് ബ്രൊക്കോളിയില് രണ്ട് ഗ്രാം പ്രോട്ടീന് അടങ്ങിയിട്ടുണ്ട്. ഫൈബറും ധാരാളം അടങ്ങിയ ബ്രൊക്കോളി വണ്ണം കുറയ്ക്കാന് ആഗ്രഹിക്കുന്നവര്ക്ക് ഡയറ്റില് ഉള്പ്പെടുത്താം. പോഷകങ്ങളുടെയും കാര്യത്തിലും ഏറെ മുന്നിലാണ് ബ്രൊക്കോളി. വിറ്റാമിൻ ഇ, വിറ്റാമിൻ ബി 6, കോപ്പർ, പൊട്ടാസ്യം എന്നിവയും ബ്രൊക്കോളിയിൽ അടങ്ങിയിട്ടുണ്ട്. ശരീരത്തിലെ കൊഴുപ്പ് നീക്കം ചെയ്യാന് ബ്രൊക്കോളി കഴിക്കുന്നത് നല്ലതാണെന്നാണ് വിദഗ്ധർ പറയുന്നത്.
രണ്ട്...
പയര് വര്ഗങ്ങളാണ് രണ്ടാമതായി ഈ പട്ടികയില് ഉള്പ്പെടുന്നത്. വിറ്റാമിനുകളുടെ കലവറയാണ് പരിപ്പ്. കൂടാതെ പ്രോട്ടീനും ഫൈബറും അടങ്ങിയ ഇവ കഴിക്കുന്നത് വയറിലടിഞ്ഞുകൂടിയ കൊഴുപ്പ് കുറയ്ക്കാന് സഹായിക്കും.
മൂന്ന്...
മുട്ടയാണ് അടുത്തതായി ഈ പട്ടികയില് ഉള്പ്പെടുന്നത്. ഉയർന്ന പ്രോട്ടീൻ അടങ്ങിയ ഒരു ഭക്ഷണമാണ് മുട്ട. മാത്രമല്ല അവശ്യ അമിനോ ആസിഡും അടങ്ങിയിട്ടുണ്ട്. ഇത് കൊഴുപ്പ് കത്തുന്ന സംവിധാനത്തെ ഉത്തേജിപ്പിക്കുന്നു. അതിനാല് ദിവസവും മുട്ട കഴിക്കുന്നത് നല്ലതാണ്.
നാല്...
പനീർ ആണ് അവസാനമായി ഈ പട്ടികയില് ഉള്പ്പെടുന്നത്. പ്രോട്ടീന് ധാരാളം അടങ്ങിയ ഇവ കഴിക്കുന്നത് ശരീരത്തിന് ഊര്ജം നല്കാനും വ്യായാമം ചെയ്യാനുള്ള എനര്ജി നല്കാനും സഹായിക്കും. കാത്സ്യം, ഫോസ്ഫറസ്, വിറ്റമിനുകള്, മിനറലുകള് എന്നിങ്ങനെ ശരീരത്തിന്റെ ആരോഗ്യത്തിന് വേണ്ട ധാരാളം ഘടകങ്ങളും ഇവയിൽ അടങ്ങിയിട്ടുണ്ട്.
ശ്രദ്ധിക്കുക: ആരോഗ്യ വിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയ ശേഷം മാത്രം ആഹാരക്രമത്തില് മാറ്റം വരുത്തുക.
Also Read: വിമാനത്തിലെ ഭക്ഷണത്തില് പ്രാണി; വീഡിയോ വൈറല്; വിമര്ശനം