ഇരട്ട ഗോളുമായി എംബാപ്പെ; സ്വീഡനെ തകര്ത്ത് ഫ്രാന്സ് ലോകകപ്പിന്റെ പ്രീ ക്വാര്ട്ടറില്
Synopsis
ഫിഫ ലോകകപ്പിൽ സ്വീഡനെതിരെ ഫ്രാൻസ് തകർപ്പൻ വിജയം നേടി. കിലിയൻ എംബാപ്പെയുടെ ഇരട്ട ഗോളുകളും ബ്രാഡ്ലി ബാർക്കോളയുടെ ഗോളുമാണ് ഫ്രാൻസിന് 3-0ന്റെ വിജയം സമ്മാനിച്ചത്. ഈ വിജയത്തോടെ ഫ്രാൻസ് ലോകകപ്പിന്റെ പ്രീ ക്വാർട്ടറിലേക്ക് യോഗ്യത നേടി.
ന്യൂയോര്ക്ക്:കിലിയന് എംബാപ്പെയുടെ ഇരട്ട ഗോള് മികവില് ഫ്രാന്സ് ഫിഫ ലോകകപ്പിന്റെ പ്രീ ക്വാര്ട്ടറില്. സ്വീഡനെ എതിരില്ലാത്ത മൂന്ന് ഗോളുകള്ക്ക് തകര്ത്താണ് ഫ്രാന്സ് പ്രീ-ക്വാര്ട്ടറിലേക്ക് മുന്നേറിയത്. കിലിയന് എംബാപ്പെയുടെ ഇരട്ടഗോളുകളും ബ്രാഡ്ലി ബാര്ക്കോളയുടെ ഗോളുമാണ് ഫ്രാന്സിന് അനായാസ വിജയം സമ്മാനിച്ചത്. മത്സരത്തിന്റെ ഭൂരിഭാഗം സമയവും ഫ്രഞ്ച് ആക്രമണത്തെ തടഞ്ഞുനിര്ത്താന് സ്വീഡിഷ് ഗോള്കീപ്പര് ജേക്കബ് സെറ്റര്സ്റ്റോം കിണഞ്ഞു പരിശ്രമിച്ചെങ്കിലും ആദ്യ പകുതിയുടെ അവസാന നിമിഷം ആ പ്രതിരോധം തകര്ന്നു.
45-ാം മിനിറ്റില് എംബാപ്പെ തൊടുത്ത മനോഹരമായ ഒരു ഷോട്ട് വലയിലെത്തി. രണ്ടാം പകുതി തുടങ്ങി പത്താം മിനിറ്റിനുള്ളില് തന്നെ ബ്രാഡ്ലി ബാര്ക്കോളയിലൂടെ ഫ്രാന്സ് ലീഡ് രണ്ടാക്കി ഉയര്ത്തി. മൈക്കല് ഒലീസ് നല്കിയ പാസ് സ്വീകരിച്ച് ബാര്ക്കോള അനായാസം ഗോളിലേക്ക് തൊടുക്കുകയായിരുന്നു. തുടര്ന്നും കളിയില് ആധിപത്യം പുലര്ത്തിയ ഫ്രാന്സ്, 74-ാം മിനിറ്റില് എംബാപ്പെയുടെ മറ്റൊരു ഗോളിലൂടെ വിജയം ഉറപ്പിച്ചു. ഒലീസ് നല്കിയ പാസ് കൃത്യമായി വലയിലെത്തിച്ച എംബാപ്പെ, ഇത്തവണത്തെ ലോകകപ്പിലെ തന്റെ ഗോളുകളുടെ എണ്ണം ആറായി ഉയര്ത്തി. ഈ ലോകകപ്പില് ലയണല് മെസിക്കൊപ്പം ഗോള്വേട്ടയില് ഒന്നാം സ്ഥാനത്താണ് ഇപ്പോള് എംബാപ്പെ.
അലക്സാണ്ടര് ഇസാക്ക്, വിക്ടര് ഗ്യോക്കറെസ് തുടങ്ങിയ മികച്ച മുന്നേറ്റനിര താരങ്ങള് ഉണ്ടായിട്ടും സ്വീഡന് ഫ്രഞ്ച് പ്രതിരോധത്തെ മറികടക്കാനായില്ല. ലോകകപ്പിലെ ശക്തരായ ടീമുകളില് ഒന്നായി ഫ്രാന്സ് മുന്നേറുമ്പോള്, സ്വീഡന് നിരാശയോടെ ടൂര്ണമെന്റില് നിന്ന് പുറത്തായി. പ്രീ ക്വാര്ട്ടറില് പരാഗ്വെയാണ് ഫ്രാന്സിന്റെ എതിരാളി. നേരത്തെ, നിലവിലെ ചാമ്പ്യന്മാരായ ജര്മ്മനിയെ അട്ടിമറിച്ച് പാരഗ്വായ് പ്രീ ക്വാര്ട്ടറിലേക്ക് യോഗ്യത നേടിയിരുന്നു.
ഏഷ്യാനെറ്റ് ന്യൂസ് മലയാളത്തിലൂടെ Sports News അറിയൂ. Football News തുടങ്ങി എല്ലാ കായിക ഇനങ്ങളുടെയും അപ്ഡേറ്റുകൾ ഒറ്റതൊട്ടിൽ. നിങ്ങളുടെ പ്രിയ ടീമുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ എല്ലാം ഇപ്പോൾ Asianet News Malayalam മലയാളത്തിൽ തന്നെ!