ISL Final : രാഹുലിന്റെ അടിക്ക് ടവോരയുടെ തിരിച്ചടി; ബ്ലാസ്റ്റേഴ്സിന്റെ ഫൈനല് അധികസമയത്തേക്ക്
Synopsis
ബ്ലാസ്റ്റേഴ്സിനെ രാഹുല് കെ പി മുന്നിലെത്തിച്ചപ്പോള് സാഹില് ടവോര ഹൈദരാബാദിനെ ഒപ്പമെത്തിക്കുകയായിരുന്നു
മഡ്ഗാവ്: ഐഎസ്എല്ലില് (ISL 2021-22) ഹൈദരാബാദ് എഫ്സി-കേരള ബ്ലാസ്റ്റേഴ്സ് (HFC vs KBFC) കലാശപ്പോര് അധികസമയത്തേക്ക്. പൂര്ണസമയത്ത് ഇരു ടീമും ഓരോ ഗോള് വീതം നേടി സമനില പാലിക്കുകയായിരുന്നു. ബ്ലാസ്റ്റേഴ്സിനെ രാഹുല് കെ പി (Rahul KP) മുന്നിലെത്തിച്ചപ്പോള് സാഹില് ടവോര (Sahil Tavora) ഹൈദരാബാദിനെ ഒപ്പമെത്തിക്കുകയായിരുന്നു.
കിക്കോഫായി ആദ്യ മിനുറ്റിനുള്ളില് തന്നെ ബ്ലാസ്റ്റേഴ്സ് ആദ്യ ആക്രമണത്തിന് കുതിച്ചു. 11-ാം മിനുറ്റില് സൗവിക് ചക്രവര്ത്തിയുടെ ലോംഗ് റേഞ്ചര് ഗില്ലിന്റെ കൈകളിലൊരുങ്ങി. 15-ാം മിനുറ്റില് ഖബ്രയുടെ ക്രോസ് ഡയസിന്റെ തലയില് തലോടി പുറത്തേക്ക് പോയി. 20-ാം മിനുറ്റില് രാഹുല് കെ പിയുടെ ഷോട്ട് ബാറിന് മുകളിലൂടെ കടന്നുപോയി. തൊട്ടുപിന്നാലെ ആല്വാരോ വാസ്ക്വസ് ഹൈദരാബാദ് ഗോള്മുഖത്ത് കനത്ത ഭീഷണിയൊരുക്കി. 30-ാം മിനുറ്റില് പോസ്റ്റിന്റെ വലത് ഭാഗത്തേക്ക് പതിവ് ശൈലിയില് ലൂണ ശ്രമം നടത്തിയെങ്കിലും വിജയിച്ചില്ല.
വാസ്ക്വസിന് നിര്ഭാഗ്യം
39-ാം മിനുറ്റില് വാസ്ക്വസിന്റെ ബുള്ളറ്റ് ഷോട്ട് ക്രോസ് ബാറില് തട്ടിത്തെറിച്ചത് മഞ്ഞപ്പടയ്ക്ക് തിരിച്ചടിയായി. തൊട്ടുപിന്നാലെ ഹൈദരാബാദിന്റെ കൗണ്ടര് അറ്റാക്കും വിജയിച്ചില്ല. ഇഞ്ചുറിടൈമില് ഗില്ലിന്റെ തകര്പ്പന് സേവ് രക്ഷയ്ക്കെത്തി. ഹൈദരാബാദ് സ്ട്രൈക്കര് ബെര്ത്തലോമ്യൂ ഒഗ്ബെച്ചെയെ പൂട്ടാന് ബ്ലാസ്റ്റേഴ്സിനായി. ഇതോടെ ഇരു ടീമും ഗോള്രഹിതമായി ഇടവേളയ്ക്ക് പിരിഞ്ഞു.
രാഹുല്, ടവോര
രണ്ടാംപകുതിയുടെ തുടക്കത്തില് ജാവോ വിക്ടറിന്റെ ലോംഗ് റേഞ്ചര് ഗില് പറന്ന് തടുത്തിട്ടു. 55-ാം മിനുറ്റില് ഫസ്റ്റ് ഷോട്ട് കളിച്ച ഒഗ്ബെച്ചെയുടെ ലക്ഷ്യം പാളി. 62-ാം മിനുറ്റില് ഒഗ്ബെച്ചെയുടെ മറ്റൊരു ഷോട്ട് കൂടി പാളി. എന്നാല് 69-ാം മിനുറ്റില് മലയാളിക്കരുത്തില് ബ്ലാസ്റ്റേഴ്സ് മുന്നിലെത്തി. കട്ടിമണിയയുടെ പ്രതിരോധം തകര്ത്ത ലോംഗ് റേഞ്ചറിലൂടെ രാഹുല് കെ പി ബ്ലാസ്റ്റേഴ്സിനെ മുന്നിലെത്തിച്ചു. തൊട്ടുപിന്നാലെ ബോക്സിന് തൊട്ടുപുറത്തുനിന്ന് ഹൈദരാബാദിന്റെ മിന്നല് ഫ്രീകിക്ക് ഗില്ലിന്റെ ഗംഭീര സേവില് അപ്രത്യക്ഷമായത് ബ്ലാസ്റ്റേഴ്സിനെ കാത്തു. പിന്നാലെ ഇരു ടീമും ആക്രമണം കടുപ്പിച്ചു. 88-ാം മിനുറ്റില് ടവോരയുടെ ലോംഗ് വോളി ഹൈദരാബാദിനെ ഒപ്പമെത്തിക്കുകയായിരുന്നു.
ബ്ലാസ്റ്റേഴ്സ് സ്റ്റാര്ട്ടിംഗ് ഇലവന്
പ്രഭ്സുഖന് ഗില്(ഗോളി), സന്ദീപ് സിംഗ്, ആര്വി ഹോര്മിപാം, മാര്കോ ലെസ്കോവിച്ച്, ഹര്മന്ജോത് ഖബ്ര, പ്യൂട്ടിയ, അഡ്രിയാന് ലൂണ, ജീക്സണ് സിംഗ്, രാഹുല് കെ പി, പെരേര ഡയസ്, ആല്വാരോ വാസ്ക്വസ്.
ഏഷ്യാനെറ്റ് ന്യൂസ് മലയാളത്തിലൂടെ Sports News അറിയൂ. Football News തുടങ്ങി എല്ലാ കായിക ഇനങ്ങളുടെയും അപ്ഡേറ്റുകൾ ഒറ്റതൊട്ടിൽ. നിങ്ങളുടെ പ്രിയ ടീമുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ എല്ലാം ഇപ്പോൾ Asianet News Malayalam മലയാളത്തിൽ തന്നെ!