മലയാളി താരത്തിന് തിരിച്ചുവരവിന് അവസരമൊരുക്കാന്‍ കഴിയാതിരുന്നതില്‍ ഖേദമുണ്ടെന്ന് എംഎസ്‌കെ പ്രസാദ്
First Published May 2, 2020, 8:35 PM ISTബാംഗ്ലൂര്‍: ടെസ്റ്റ് ക്രിക്കറ്റില്‍ ട്രിപ്പിള്‍ സെഞ്ചുറി നേടുന്ന രണ്ടാമത്തെ മാത്രം ഇന്ത്യക്കാരനായിട്ടും മലയാളി താരം കരുണ്‍ നായര്‍ക്ക് ടെസ്റ്റില്‍ തിരിച്ചുവരവിന് ഒരു അവസരമൊരുക്കാന്‍ കഴിയാതിരുന്നതില്‍ തനിക്ക് ഖേദമുണ്ടെന്ന് ഇന്ത്യന്‍ ക്രിക്കറ്റ് ടീം മുന്‍ ചീഫ് സെലക്ടര്‍ എം എസ് കെ പ്രസാദ്. ട്രിപ്പിള്‍ സെഞ്ചുറി നേടിയ താരമായിട്ടും കരുണിന് തിരിച്ചുവരാനൊരു അവസരമൊരുക്കാന്‍ ഞങ്ങള്‍ക്കായില്ല. അയാളുടെ നേട്ടത്തിന്റെ മഹത്വം കണക്കിലെടുത്തു പറയുകയാണെങ്കില്‍ ഇത്തരം സംഭവങ്ങള്‍ വളരെ അപൂര്‍വമായെ സംഭവിക്കാറുള്ളു.
ഇംഗ്ലണ്ട് പര്യടനത്തില്‍ കരുണിന് ടീമില്‍ അവസരമൊരുക്കിയെങ്കിലും പ്ലേയിംഗ് ഇലവനില്‍ കളിക്കാനായില്ല.ട്രിപ്പിള്‍ സെഞ്ചുറി നേടിയൊരു കളിക്കാരന്‍ ഇത്തരത്തില്‍ ടീമില്‍ നിന്ന് പുറത്തുപോവേണ്ടിവരുന്നത് രാജ്യാന്തര ക്രിക്കറ്റില്‍ അപൂര്‍വമാണ്. കരുണിന് തിരിച്ചുവരാന്‍ അവസരമൊരുക്കാതിരുന്നതില്‍ കരുണിന് മാത്രമല്ല തങ്ങള്‍ക്കെല്ലാം ഹൃദയം നുറുങ്ങുന്ന വേദനയുണ്ടെന്നും എം എസ് കെ പ്രസാദ് പറഞ്ഞു.