ഇന്ത്യ മാറും, സഞ്ജു സാംസണ്‍ തിരിച്ചെത്തും; തിലകിന് പുറത്തേക്കുള്ള വഴി തെളിയും, സിംബാബ്‌വെക്കെതിരെ ടീമിന്‍റെ സാധ്യതാ ഇലവന്‍

കനത്ത തോല്‍വിയാണ് ടി20 ലോകകപ്പ് സൂപ്പര്‍ എട്ടില്‍ ദക്ഷിണാഫ്രിക്കക്കെതിരെ ഇന്ത്യ നേരിട്ടത്. അഹമ്മദാബാദില്‍ 76 റണ്‍സിന്റെ പരാജയം. സിംബാബ്‌വെയാണ് അടുത്ത എതിരാളി. ഇന്ത്യന്‍ ടീമില്‍ മാറ്റമുണ്ടാകുമോ എന്നാണ് ആരാധകര്‍ ഉറ്റുനോക്കുന്നത്. സാധ്യതാ ഇലവന്‍..

അഭിഷേക് ശര്‍മ

ആദ്യ മൂന്ന് മത്സരത്തില്‍ പൂജ്യത്തിന് പുറത്തായ അഭിഷേക് ശര്‍മ ദക്ഷിണാഫ്രിക്കയ്‌ക്കെതിരെ 15 റണ്‍സാണ് നേടിയത്. എന്നാല്‍ സ്വതസിദ്ധമായ ശൈലിയില്‍ കളിക്കാന്‍ സാധിച്ചില്ല. എങ്കിലും അഭിഷേകിനെ പിന്തുണയ്ക്കാന്‍ തന്നെയായിരിക്കും ടീം മാനേജ്‌മെന്റിന്റെ തീരുമാനം.

സഞ്ജു സാംസണ്‍

ലോകകപ്പില്‍ മോശം ഫോമിലൂടെ കടന്നുപോകുന്ന തിലക് വര്‍മയ്ക്ക് പകരം സഞ്ജു ടീമിലെത്തുമെന്നാണ് അറിയുന്നത്. തിലക് ദക്ഷിണാഫ്രിക്കക്കെതിരെ ഒരു റണ്‍ മാത്രമാണ് നേടിയത്. ആദ്യ മൂന്ന് മത്സരങ്ങളില്‍ 25 റണ്‍സ് വീതം. സഞ്ജു നമീബിയക്കെതിരെ കളിച്ച ഒരു മത്സരത്തില്‍ എട്ട് പന്തില്‍ 22 റണ്‍സെടുത്തിരുന്നു.

ഇഷാന്‍ കിഷന്‍

സഞ്ജു ഓപ്പണിംഗ് സ്ഥാനത്തേക്ക് തിരിച്ചെത്തുമ്പോള്‍ ഇഷാന്‍ കിഷന്‍ മൂന്നാം നമ്പറില്‍ കളിക്കും. തിലകായിരുന്നു ഇതുവരെ മൂന്നാം സ്ഥാനത്ത് കളിച്ചിരുന്നത്. ന്യൂസിലന്‍ഡിനെതിരായ പരമ്പരയില്‍ കിഷന്‍ മൂന്നാം സ്ഥാനത്തായിരുന്നു കളിച്ചത്.

സൂര്യകുമാര്‍ യാദവ്

ക്യാപ്റ്റന്‍ നാലാം നമ്പറില്‍ തുടരും. ആദ്യ മത്സരത്തിന് ശേഷം സൂര്യക്കും കാര്യമായി ഒന്നും തന്നെ ചെയ്യാന്‍ സാധിച്ചിരുന്നില്ല. മാത്രമല്ല, വേഗമില്ലാത്ത ഇന്നിംഗ്‌സാണ് സൂര്യ പുറത്തെടുക്കുന്നത്. ദക്ഷിണാഫ്രിക്കക്കെതിരെ താരം 18 റണ്‍സിന് പുറത്തായിരുന്നു.

ശിവം ദുബെ

തകര്‍പ്പന്‍ ഫോം തുടരുന്ന ശിവം ദുബെ മധ്യനിരയ്ക്ക് കരുത്താകും. ദക്ഷിണാഫ്രിക്കക്കെതിരേയും ടോപ് സ്‌കോറര്‍ ദുബെയായിരുന്നു.

ഹാര്‍ദിക് പാണ്ഡ്യ

ഹാര്‍ദിക് സ്ഥാനത്തിനും മാറ്റമുണ്ടാവില്ല. പേസ് ഓള്‍റൗണ്ടറായ ഹാര്‍ദിക് നാല് ഓവര്‍ എറിയുന്നതിനൊപ്പം ബാറ്റിംഗിലും തിളങ്ങുന്നു.

റിങ്കു സിംഗ്

കഴിവ് തെളിയിക്കാന്‍ റിങ്കു സിംഗിന് കൂടുതല്‍ അവസരം ലഭിച്ചിട്ടില്ല. ദക്ഷിണാഫ്രിക്കക്കെതിരെ വിജയത്തിലേക്ക് അടുപ്പിക്കാനുള്ള വെപ്രാളത്തിനിടെ റിങ്കു റണ്ണെടുക്കാതെ പുറത്തായിരുന്നു. രണ്ട് പന്ത് മാത്രമാണ് താരം നേരിട്ടത്.

അക്‌സര്‍ പട്ടേല്‍

വാഷിംഗ്ടണ്‍ സുന്ദറിന് പുറത്തേക്കുള്ള വഴി തെളിയും സിംബാബ്‌വെക്കെതിരെ അക്‌സര്‍ പട്ടേല്‍ തിരിച്ചെത്തും. ദക്ഷിണാഫ്രിക്കക്കെതിരെ രണ്ട് ഓവറില്‍ 17 റണ്‍സ് വിട്ടുകൊടുത്തിരുന്നു സുന്ദര്‍. ബാറ്റിംഗിലും തിളങ്ങാന്‍ സാധിച്ചില്ല.

അര്‍ഷ്ദീപ് സിംഗ്

ഇടങ്കയ്യന്‍ പേസറെ ടീമില്‍ നിലനിര്‍ത്തും. ജസ്പ്രിത് ബുമ്രയ്ക്ക് പിന്തുണ നല്‍കാന്‍ താരത്തിന് സാധിക്കുന്നുണ്ട്. ദക്ഷിണാഫ്രിക്കക്കെതിരെ നാല് ഓവറില്‍ 28 റണ്‍സ് മാത്രം വിട്ടുകൊടുത്ത് രണ്ട് പേരെ പുറത്താക്കിയിരുന്നു താരം.

വരുണ്‍ ചക്രവര്‍ത്തി

ദക്ഷിണാഫ്രിക്കക്കെതിരെ റണ്‍സ് വഴങ്ങിയെങ്കിലും വരുണിനെ വിട്ടുകളയാന്‍ ഇന്ത്യ തയ്യാറാവില്ല. നാല് ഓവറില്‍ 47 റണ്‍സാണ് വരുണ്‍ നല്‍കിയത്. ചെന്നൈയില്‍ സ്പിന്നെ തുണയ്ക്കുന്ന പിച്ചില്‍ വരുണ്‍ ഉണ്ടാവും.

ജസ്പ്രിത് ബുമ്ര

ദക്ഷിണാഫ്രിക്കക്കെതിരെ നാല് ഓവറില്‍ 15 റണ്‍സ് മാത്രം വിട്ടുകൊടുത്ത് മൂന്ന് വിക്കറ്റാണ് ബുമ്ര വീഴ്ത്തിയത്. ബുമ്ര ബൗളിംഗ് ഡിപാര്‍ട്ട്‌മെന്റ് നയിക്കും.