മാര്‍ച്ച് 31 വരെ കേരളത്തില്‍ ലോക്ക് ഡൗണ്‍; ആശങ്ക വേണ്ടെന്നും സഹകരിക്കണമെന്നും മുഖ്യമന്ത്രി | Live Updates

കൊവിഡ് 19 ഭീഷണി നിലനില്‍ക്കുന്ന സാഹചര്യത്തില്‍ വയനാട്ടില്‍ നിരോധനാജ്ഞ പ്രഖ്യാപിച്ചു. ഇന്ന് അര്‍ധരാത്രി മുതലാണ് നിരോധനാജ്ഞ പ്രാബല്ല്യത്തില്‍ വരിക. അഞ്ചുപേരില്‍ കൂടുതല്‍ കൂട്ടം കൂടി നില്‍ക്കരുത്. സംസ്ഥാനത്ത് ലോക്ക് ഡൗണ്‍ പ്രഖ്യാപിച്ചതിന് പിന്നാലെ മലപ്പുറത്തും നിരോധനാജ്ഞ പ്രഖ്യാപിച്ചിരുന്നു

കൊവിഡ് 19 ജാഗ്രതയുടെ ഭാഗമായി കേരളമുള്‍പ്പെടെയുള്ള സംസ്ഥാനങ്ങള്‍ ലോക്ക് ഡൗണിലേക്ക് പോകുന്ന സാഹചര്യത്തില്‍ രാജ്യത്ത് സിനിമകളുടെ സെന്‍സറിംഗ് നടപടികള്‍ നിര്‍ത്തിവെക്കാന്‍ സിബിഎഫ്‍സി തീരുമാനമെടുത്തു. ഈ മാസം 31 വരെ തിരുവനന്തപുരം ഉള്‍പ്പെടെ സെന്‍സര്‍ ബോര്‍ഡിന്‍റെ റീജിയണല്‍ ഓഫീസുകള്‍ അടച്ചിടും. സെന്‍ട്രല്‍ ബോര്‍ഡ് ഓഫ് ഫിലിം സര്‍ട്ടിഫിക്കേഷന്‍ ചെയര്‍മാന്‍ പ്രസൂണ്‍ ജോഷി പുറത്തിറക്കിയ ഉത്തരവിലാണ് ഇക്കാര്യം ചൂണ്ടിക്കാട്ടുന്നത്.

സംസ്ഥാനത്ത് പൂർണ്ണ അടച്ചുപൂട്ടൽ പ്രഖ്യാപിച്ച  സാഹചര്യത്തിൽ കർശന നടപടികളുമായി പൊലീസ്. അടച്ചുപൂട്ടൽ സംബന്ധിച്ച നടപടികൾ ഏകോപിപ്പിക്കാൻ ഐ ജിമാർ, ഡി ഐ ജിമാർ,  ജില്ലാ പൊലീസ് മേധാവിമാർ എന്നിവരുടെ നേതൃത്വത്തിൽ ചൊവ്വാഴ്ച രാവിലെ അഞ്ചു മണി മുതൽ ശക്തമായ പൊലീസ് സന്നാഹം നിരത്തുകളിൽ ഉണ്ടാകും. 

കൊവിഡ് ബാധിച്ച് ഇന്നുമാത്രം രാജ്യത്ത് മരിച്ചത് രണ്ടുപേര്‍. ഇതോടെ മരണസംഖ്യ ഒന്‍പതായി ഉയര്‍ന്നു. കൊല്‍ക്കത്തിയിലും ഹിമാചല്‍ പ്രദേശിലുമാണ് മരണം സംഭവിച്ചത്. അമേരിക്കയില്‍ നിന്ന് വന്ന ടിബറ്റന്‍ അഭയാര്‍ത്ഥിയാണ് ഹിമാചല്‍ പ്രദേശില്‍ മരിച്ചത്. ഇറ്റലിയില്‍ നിന്ന് വന്നയാളാണ് മരിച്ച മറ്റൊരാള്‍. ഇയാള്‍ കൊല്‍ക്കത്തയിലെ എഎംആര്‍എ ആശുപത്രിയില്‍ ചികിത്സയിലായിരുന്നു. അതേസമയം രാജ്യത്ത് കൊവിഡ് ബാധിതരുടെ എണ്ണം 467 ആയി ഉയര്‍ന്നു

കൊവിഡ് 19 പ്രതിരോധ പ്രവര്‍ത്തനങ്ങളുടെ ഭാഗമായി മാര്‍ച്ച് 31 വരെ വ്യവസായ വകുപ്പിനു കീഴിലുള്ള പൊതുമേഖല സ്ഥാപനങ്ങള്‍ അടച്ചിടും. കൊറോണ പടരുന്ന സാഹചര്യത്തില്‍ കൂടുതല്‍ ആളുകള്‍ ഒന്നിച്ച് ജോലി ചെയ്യുന്ന സാഹചര്യം ഒഴിവാക്കാനാണ് തീരുമാനം.

സംസ്ഥാനത്ത് ലോക്ക് ഡൗണ്‍ പ്രഖ്യാപിച്ച സാഹചര്യത്തില്‍ കൊച്ചിയില്‍ സൂപ്പര്‍ മാര്‍ക്കറ്റുകളില്‍ പ്രവേശനത്തിന് നിയന്ത്രണമേര്‍പ്പെടുത്തി. ഒരു സമയം പരമാവധി ഏഴുപേര്‍ക്ക് മാത്രമായിരിക്കും സൂപ്പര്‍ മാര്‍ക്കറ്റുകളില്‍ പ്രവേശിക്കാന്‍ കഴിയുക. നിലവില്‍ സൂപ്പര്‍മാര്‍ക്കറ്റുകള്‍ക്ക് മുന്‍പില്‍ നീണ്ട ക്യൂവാണ്. ചെറുകടകളില്‍ സാധാരണ തിരക്ക് മാത്രമാണുള്ളത്

അനിതരസാധാരണമായ സാഹചര്യമെന്ന് മുഖ്യമന്ത്രി പിണറായി വിജയൻ വ്യക്തമാക്കി. ആളുകൾ പുറത്തിറങ്ങരുതെന്നും നിര്‍ദ്ദേശം ലംഘിച്ചാൽ അറസ്റ്റ് വേണ്ടി വരുമെന്നും അദ്ദേഹം അറിയിച്ചു. അവശ്യ സാധനങ്ങൾ ഉറപ്പ് വരുത്തും. പൊതു ഗതാഗത സംവിധാനങ്ങൾ ഉണ്ടാകില്ല. സ്വകാര്യ വാഹനങ്ങൾ തടയില്ല. അത്യാവശ്യത്തിന് പുറത്തിറങ്ങുന്നവര്‍ ശാരിരിക അകലം പാലിക്കണമെന്നും മുഖ്യമന്ത്രി അഭ്യര്‍ത്ഥിച്ചു.

ലോക്ക് ഡൗണ്‍ പ്രഖ്യാപിച്ച സാഹചര്യത്തില്‍ ആശങ്ക വേണ്ടെന്ന് മന്ത്രി ജെ മെഴ്സിക്കുട്ടിയമ്മ. അവശ്യസാധനങ്ങള്‍ സുലഭമെന്നും മന്ത്രി ഏഷ്യാനെറ്റ് ന്യൂസിനോട് പറഞ്ഞു. പൊതുജനങ്ങള്‍ക്ക് വേണ്ട എല്ലാ സൗകര്യങ്ങളും സര്‍ക്കാര്‍ ഒരുക്കുമെന്നും മന്ത്രി വ്യക്തമാക്കി

രോഗം സ്ഥിരീകരിച്ച 28 പേരിൽ 25 പേരും ദുബായിൽ നിന്നും എത്തിയവരാണ്. അസാധാരണമായ സാഹചര്യത്തിലേക്കാണ് കേരളം പോകുന്നത്. ഈ അവസ്ഥയിൽ കേരളം മൊത്തം ലോക്ക് ഡൌണ് പ്രഖ്യാപിക്കുന്നു. മാർച്ച് 31 വരെയാണ് നിലവിലെ ലോക്ക് ഡൌണ്. അതിനുശേഷം എന്തു വേണം എന്ന് ആലോചിച്ച് തീരുമാനിക്കും. ലോക്ക് ഡൌണിൽ സംസ്ഥാനം മൊത്തം  അടച്ചിടും പൊതുഗതാഗതം ഉണ്ടാവില്ല. സ്വകാര്യ ബസുകളോ കെഎസ്ആർടിസിയോ ഉണ്ടാവില്ല. എന്നാൽ സ്വകാര്യ വാഹനങ്ങളില്ർ പോകാം. ആശുപത്രികൾ പ്രവർത്തിക്കും. ഇഢന പാചക വിതരണം തുടരും. ആരാധനാലയങ്ങളിൽ ആളെക്കൂട്ടിയുള്ള എല്ലാ പരിപാടികളും റദ്ദാക്കും. അവശ്യസാധനങ്ങൾ വിൽക്കുന്ന കടകള്ർക്ക് തുറക്കാം മറ്റെല്ലാ കടകളും അടച്ചിടും. ഹോട്ടലുകളിൽ ഇരുന്ന് ഭക്ഷണം കഴിക്കാനൻ പാടില്ല. എന്നാൽ ഭക്ഷണം വാങ്ങി വീട്ടിൽ കൊണ്ടു പോകാം. അടിയന്തര ആവശ്യങ്ങൾക്കായി പുറത്തിറങ്ങുമ്പോൾ മറ്റുള്ളവരിൽ നിന്നും അകലം പാലിക്കണം. ചികിത്സയിലുണ്ടായിരുന്ന കണ്ണൂരിലെ ഒരു രോഗി ഇന്ന് ഡിസ്ചാരർജ്ജായി വീട്ടിൽ പോയി. 383 പേർ ആശുപത്രിയിൽ ഇപ്പോഴും ഉണ്ട്. 122 പേരെ ഇന്ന് ആശുപത്രിയിലേക്ക് മാറ്റി. 4291 സാംപിളുകൾ പരിശോധനയ്ക്ക് അയച്ചു. 2987 എണ്ണം നെഗറ്റീവായി റിപ്പോർട്ട് ചെയ്തു.

കാസർഗോഡ് ജില്ലയിലെ സ്ഥിതി മറ്റിടങ്ങളിൽ നിന്നും വ്യത്യസ്തമാണ്. അവിടെ കൂടുതൽ കടുത്ത നിയന്ത്രണങ്ങൾ സർക്കാർ പ്രഖ്യാപിക്കുന്നു. കാസർഗോഡ് ജില്ലയിൽ ഇനിയൊരാളും അനാവശ്യമായി പുറത്തേക്ക് ഇറങ്ങരുത്. ഇറങ്ങിയാൽ അറസ്റ്റ് ചെയ്യുകയും കടുത്ത പിഴത്തുക ഈടാക്കുകയും ചെയ്യും. അന്യസംസ്ഥാനങ്ങളിൽ നിന്നും കേരളത്തിലേക്ക് വരുന്ന എല്ലാവർക്കും 14 ദിവസത്തെ നിരീക്ഷണം ആവശ്യമാണ്.

കോഴിക്കോട് ജില്ലയിൽ ഒരു കൊവിഡ് കേസ് കൂടി സ്ഥിരീകരിച്ചതായി ജില്ലാ ഭരണകൂടം. കണ്ണൂർ സ്വദേശിയായ യുവാവിനാണ് കൊവിഡ് സ്ഥിരീകരിച്ചിട്ടുള്ളത്. ഇതോടെ കോഴിക്കോട് ജില്ലയിൽ മൂന്ന് പേർക്ക് കൊവിഡ് സ്ഥിരീകരിച്ചതായി ജില്ലാ ഭരണകൂടം വ്യക്തമാക്കി. പുതുതായി കൊവിഡ് സ്ഥിരീകരിച്ചയാൾ വിദേശത്ത് നിന്ന് വന്നതാണോ എന്ന വിവരത്തിൽ ഇതുവരെ വ്യക്തതയില്ല.
 

കോഴിക്കോട് ജില്ലയില്‍ ആകെ 8408 പേര്‍ നിരീക്ഷണത്തിലുണ്ട്. ഇതില്‍ 263 പേര്‍ പുതുതായി നിരീക്ഷണത്തില്‍ വന്നവരാണ്. മെഡിക്കല്‍ കോളേജില്‍ 17 പേരും ബീച്ച് ആശുപത്രിയില്‍ 19 പേരും ഉള്‍പ്പെടെ ആകെ 36 പേര്‍ ഐസൊലേഷന്‍ വാര്‍ഡില്‍ നിരീക്ഷണത്തിലാണ്. ബീച്ച് ആശുപത്രിയില്‍ നിന്ന് 8 പേരെ ഡിസ്ചാര്‍ജ്ജ് ചെയ്തു.  

ഇന്നലെ (22/3/20) 14 സ്രവ സാംപിള്‍ പരിശോധനയ്ക്ക് അയച്ചു.  ആകെ 190 സാംപിളുകള്‍ പരിശോധനയ്ക്ക് അയച്ചതില്‍ 162 എണ്ണത്തിന്റെ പരിശോധനാ ഫലം ലഭിച്ചു. 158 എണ്ണം നെഗറ്റീവ് ആണ്. 3 പേരുടെ പരിശോധനാഫലം പോസിറ്റീവ് ആണ്. ഇതില്‍ ഒന്ന് കണ്ണൂര്‍ സ്വദേശിയുടേതാണ്. ഇനി 29 പേരുടെ പരിശോധനാ ഫലം മാത്രമേ ലഭിക്കാന്‍ ബാക്കിയുള്ളു. 

മലേഷ്യയിലെ ക്വാലലംപൂർ വിമാനത്താവളത്തിൽ കുടുങ്ങിയ ഒരു സംഘം ഇന്ത്യക്കാരെ ഇന്ന് തിരികെ എത്തിക്കും. എയർ ഏഷ്യാ വിമാനത്തിൽ ഇവരെ ചെന്നൈയിലാണ് എത്തിക്കുക. വിവിധ രാജ്യങ്ങളിൽ നിന്ന് ഇന്ത്യയിലേക്കുള്ള യാത്രക്കിടെ ക്വാലലംപൂർ വിമാനത്താവളത്തിൽ കുടുങ്ങിയ 104 പേരെയാണ് തിരികെ എത്തിക്കുന്നത്. 

ശ്രീചിത്രയിലെ ഡോക്ടറുമായി സമ്പര്ക്കം ഉണ്ടായിരുന്ന ഭൂരിപക്ഷം പേരുടെ ഫലവും നെഗറ്റീവ്. കുറച്ചു ഫലങ്ങൾ കൂടി കിട്ടാൻ ഉണ്ട്. തിരുവനന്തപുരത്ത് കൊവിഡ് ബാധിച്ച് ചികിത്സയിൽ കഴിയുന്ന ഇറ്റാലിയൻ സ്വദേശിയുടെ അന്തിമഫലവും നെഗറ്റീവാണ്. രോഗം മാറിയോ എന്ന് മെഡിക്കൽ ബോർഡ് സ്ഥിരീകരിക്കും. തിരുവനന്തപുരം ജില്ലയിലെ 4 കേസുകളുടെയും പ്രൈമറി കോണ്ടാക്റ്റുകളുടെ ഫലം നെഗറ്റീവാണെന്നും ജില്ലാ കളക്ടർ.

തിരുവനന്തപുരത്ത് നിരീക്ഷണത്തിൽ കഴിയേണ്ട പ്രവാസി പല സ്ഥലത്തും കറങ്ങി നടക്കുന്നത് ആരോഗ്യ വകുപ്പിനെ അറിയിച്ച ആശ വർക്കറെ മർദ്ദിച്ചതായി പരാതി. പൂവത്തൂരിലെ ആശ വർക്കർ ലിസിയെ പ്രവാസി മർദ്ദിച്ചുവെന്നാണ് പരാതി. വെഞ്ഞാറമൂട് പൊലീസ് കേസെടുത്തിട്ടുണ്ട്.

തിരുവനന്തപുരത്ത് അടുത്ത 15 ദിവസം നിർണായകം. കെഎസ്ആര്ടിസി സർവീസ് മുടങ്ങില്ല, ബസുകളിൽ ആളുകൾ തിരക്ക് കൂട്ടരുത്. 3000 ഐസോലഷൻ കിടക്കകൾ ജില്ലയിൽ തയ്യാർ. പത്രം, പാൽ വിതരണക്കാർ, ഗ്യാസ് ജീവനക്കാർ കൂടുതൽ ശ്രദ്ധ പാലിക്കണം. കെഎസ്ആര്ടിസി, സൂപ്പർമാർക്കറ്റുകൾ എന്നിവയിൽ ആളുകളുടെ എണ്ണം നിജപ്പെടുത്തും. ബെവ്കോ ഔട്ട്‌ലെറ്റ്  ജീവനക്കാർ നിരീക്ഷണത്തിലായ സംഭവം പരിശോധിക്കുമെന്നും കളക്ടർ. 

തിരുവനന്തപുരത്ത് നിരീക്ഷണത്തിൽ കഴിയുന്ന ചിലർ നിയന്ത്രണങ്ങൾ തെറ്റിക്കുന്നതായി വിവരം കിട്ടിയിട്ടുണ്ടെന്നും, കർശനനടപടികൾ ഇതിൽ ഉണ്ടാകുമെന്നും ജില്ലാ കളക്ടർ കെ ഗോപാലകൃഷ്ണൻ. ജില്ലയിൽ അവശ്യവസ്തുകൾ മുടങ്ങില്ല. പലചരക്ക് കടകൾ തുറന്ന് പ്രവർത്തിക്കും. ഇവിടെ ആൾക്കൂട്ടങ്ങളും തിരക്കും ഒഴിവാക്കണം. മറ്റ് സംസ്ഥാനങ്ങളിൽ നിന്നുള്ള അവശ്യവസ്തുക്കളുടെ വരവും തുടരും. 

കോഴിക്കോട് ഒരാള്‍ക്ക് കൂടി കൊവിഡ് സ്ഥിരീകരിച്ചു. കണ്ണൂര്‍ സ്വദേശിയാണ് ഇയാള്‍. 

രാജ്യത്ത് ഒരു കൊവിഡ് മരണം കൂടി. ബംഗാളിലാണ് മരണം സംഭവിച്ചത്. സംസ്ഥാനത്തെ ആദ്യ കൊവിഡ് മരണമാണ് ഇത് ഇതോടെ രാജ്യത്തെ കൊവിഡ് മരണങ്ങൾ എട്ടായി.

പനി ബാധിച്ച് ചികിത്സയിൽ കഴിയുന്നു ബെവ്കോ ജീവനക്കാരിയുടെ പരിശോധന ഫലം നെഗറ്റീവ്. തിരുവനന്തപുരം മെഡിക്കൽ കോളജ് ആശുപത്രിയിൽ നടത്തിയ പരിശോധനയിലാണ് ജീവനക്കാരിക്ക് കൊവിഡ് ഇല്ലെന്ന് കണ്ടെത്തിയത്. 

രാജ്യത്തെ എല്ലാ ആഭ്യന്തര വിമാനസർവീസുകളും റദ്ദാക്കും. ഇന്ന് അർദ്ധരാത്രി മുതലാണ് സർവീസുകൾ റദ്ദാക്കുന്നത്. എല്ലാ വിമാനത്താവളങ്ങളും അടയ്ക്കും.

കണ്ണൂരിൽ 4 കൊവിഡ് കെയർ സെന്‍ററുകൾ തുടങ്ങും. 2 എണ്ണം സജ്ജമായി. തളിപ്പറമ്പ് ആയുർവേദ ആശുപത്രി, കണ്ണൂർ എസ്സി പ്രീമെട്രിക് ഹോസ്റ്റൽ എന്നിവയാണ് സജ്ജമായത്. മാങ്ങാട്ടുപറമ്പിലെ സർക്കാർ വനിത ശിശു ആശുപ്രതി കൊവിഡ് ചികിത്സക്ക് വേണ്ടി മാത്രം ഉപയോഗിക്കും

ദില്ലി: രാജ്യത്ത് ലോക്ഡൗൺ കൊണ്ട് മാത്രമെ സമൂഹ വ്യാപനം തടയാനാകൂവെന്ന് കേന്ദ്ര ആരോഗ്യമന്ത്രാലയം. കൊവിഡ് രോഗികളെ ചികിത്സിക്കാനായി മാത്രം പ്രത്യേക ആശുപത്രികൾ സജ്ജമാക്കാൻ സംസ്ഥാനങ്ങൾക്ക‌് നിർദ്ദേശം

അരുണാചൽപ്രദേശിലും ലോക്ഡൗൺ

കോവിഡ് 19 അടിയന്തര സാഹചര്യം നേരിടാൻ കോഴിക്കോട് ജില്ലയിൽ 31 കെയർ സെന്‍ററുകൾ രൂപീകരിച്ചതായി ജില്ലാഭരണകൂടം. ജില്ലയിലെ വിവിധ കോളേജുകൾ ഹോസ്റ്റലുകൾ  ഒഴിഞ്ഞുകിടക്കുന്ന സർക്കാർ സ്ഥാപനങ്ങൾ കോട്ടേജുകൾ എന്നിവയാണ് കെയർ സെൻററുകൾ ആയി പ്രവർത്തിക്കുക. ഈ സ്ഥാപനങ്ങളുടെ നിയന്ത്രണം ജില്ലാഭരണകൂടം ഏറ്റെടുക്കും. ഏറ്റെടുക്കുന്ന സ്ഥാപനങ്ങളിലെ ഓരോ മുറികളിലും ജില്ലാ മെഡിക്കല്‍ ഓഫീസര്‍ ആരോഗ്യ സുരക്ഷാ ക്രമീകരണങ്ങളും നിരീക്ഷണ സംവിധാനങ്ങളും ഒരുക്കും.

ആയുഷ് വകുപ്പിന് കീഴിലുള്ള ആശുപത്രികളിലെ എല്ലാ രോഗികളെയും ഡിസ്‌ചാർജ് ചെയ്യാൻ നിർദേശം . ഗുരുതരാവസ്ഥയിൽ ഉള്ളവർ ഉണ്ടെങ്കിൽ അടുത്തുള്ള അലോപ്പതി ആശുപത്രികളിലേക്ക് റഫർ ചെയ്യണം. പനിയ്ക്കും ശ്വാസകോശ സംബന്ധമായ അസുഖങ്ങൾക്കും ചികിൽസ തേടി എത്തുന്നവരെ അലോപ്പതി ആശുപത്രികളിലേക്ക് റഫർ ചെയ്യണം. ആയുഷ് വിഭാഗം ചികിത്സ നൽകാൻ പാടില്ല. 

തെലങ്കാനയിൽ 3 പേർക്ക് കൂടി കൊവിഡ് സ്ഥിരീകരിച്ചു. ഇതോടെ സംസ്ഥാനത്തെ രോഗബാധിതരുടെ എണ്ണം 18 ആയി. 

തിരുവനന്തപുരം: കോവിഡ് നിരീക്ഷണത്തിലുള്ള ജീവനക്കാർ ജോലി ചെയ്ത ഔട്ട്ലെറ്റ് പൂട്ടണമെന്ന് ആവശ്യപ്പെട്ട് തിരുവനന്തപുരം ബെവ്‌കോ ഹെഡ് ഓഫീസിനു മുന്നിൽ യൂത്ത് കോൺഗ്രസ്‌ പ്രതിഷേധം. പ്രവർത്തകരെ പോലീസ് അറസ്റ്റു ചെയ്തു നീക്കുന്നു.

മൊൽഡോവയിൽ കുടുങ്ങിയ മലയാളി വിദ്യാർത്ഥികളുമായി ഇന്ത്യൻ എംബസി ബന്ധപ്പെട്ടെന്ന് വിദേശകാര്യമന്ത്രാലയം. വിമാനസർവ്വീസ് പുനസ്ഥാപിക്കുമ്പോൾ ഇവരെ തിരിച്ചെത്തിക്കുമെന്നും വിദേശകാര്യമന്ത്രാലയം. 

കോഴിക്കോട്: മിൽമ മലബാർ മേഖലാ യൂണിയൻ നാളെ കർഷകരിൽ നിന്ന് പാൽ സംഭരിക്കില്ല. സംഭരിച്ച  പാൽ വിൽക്കാനാവാത്ത  സാഹചര്യത്തിലാണ്  തീരുമാനം. രണ്ട് ദിവസത്തിനിടെ സംഭരിച്ച ഏഴ് ലക്ഷം ലിറ്റർ പാൽ വിൽക്കാനാകുന്നില്ലെന്ന് മിൽമ, 

ദില്ലി: കൊവിഡ് ഭീതിക്കിടെ ശമ്പളം വെട്ടിക്കുറയ്ക്കലോ പിരിച്ചു വിടലോ പാടില്ലെന്ന് കേന്ദ്ര തൊഴിൽ മന്ത്രാലയം പൊതു, സ്വകാര്യ സ്ഥാപനങ്ങൾക്ക്  നിർദ്ദേശം നൽകി. 

തിരുവനന്തപുരം: അസി ഇൻഫർമേഷൻ ഓഫീസർ തസ്തികയിലേക്കുള്ള സർട്ടിഫിക്കറ്റ് വെരിഫിക്കേഷനുള്ള തീയതിയും നീട്ടി.

തിരുവനന്തപുരം: 300 ഡോക്ടർമാരുടേയും 400 ഹെൽത്ത് ഇൻസ്പെക്ടർമാരുടേയും നിയമനം 24 മണിക്കുറിനകം നടത്തുമെന്ന് പി എസ് സി. നിലവിലെ ലിസ്റ്റിൽ നിന്നാണ് നിയമനം

ദില്ലി: കൊവിഡ് ഗുരുതരമായവർക്ക്  Hydroxychloroquine മരുന്ന് നൽകാമെന്ന് ഐസിഎംആർ. മലേറിയ പ്രതിരോധ മരുന്നാണ് ഇത്. 

തിരുവനന്തപുരം: കൊവിഡ് 19 മുൻകരുതലിന്‍റെ ഭാഗമായി സംസ്ഥാനത്തെ എല്ലാ പിഎസ്‍സി പരീക്ഷകളും മാറ്റിവച്ചു. ഏപ്രിൽ 30 വരെയുള്ള പരീക്ഷകളാണ് മാറ്റിവച്ചത്. 

ദില്ലി ഹൈക്കോടതി ഏപ്രിൽ 4 വരെ പ്രവർത്തിക്കില്ല. ദില്ലിയിലെ എല്ലാ ജില്ലാ കോടതികളും ഏപ്രിൽ 4 വരെ അടച്ചിടും. അത്യാവശ്യ കേസുകൾ വീഡിയോ കോൺഫറൻസ് വഴി കേൾക്കുമെന്നും അറിയിപ്പ്. 

ചെന്നൈ: തമിഴ്നാട്ടിൽ നാളെ വൈകിട്ട് ആറ് മണി മുതൽ നിരോധനാജ്ഞ നിലവിൽ വരും. എല്ലാ ജില്ലാ അതിർത്തികളും അടയ്ക്കും. അത്യാവശ്യ സർവ്വീസുകൾക്ക് മാത്രമായിരിക്കും അനുമതി. പൊതുഗതാഗത സംവിധാനം നിർത്തും. ആളുകൾ കൂട്ടം കൂടുന്നതിന് വിലക്കുണ്ട്. 

കൊവിഡ് ഭീതിയുടെ പശ്ചാത്തലത്തിൽ ലോകസഭ അനിശ്ചിത കാലത്തേക്ക് പിരിഞ്ഞു.