ഇന്ത്യ: ഇന്നത്തെ പ്രധാന സംഭവവികാസങ്ങൾ

മക്കളെ സർക്കാർ സർവീസിൽ നിയമവിരുദ്ധമായി നിയമിച്ചെന്ന ഗുരുതരമായ ആരോപണത്തെ തുടർന്ന് കർണാടക പബ്ലിക് സർവീസ് കമ്മീഷൻ (കെപിഎസ്‌സി) ചെയർമാൻ ശിവശങ്കരപ്പ എസ്. സാഹുക്കറിനെ ഗവർണർ താവർചന്ദ് ഗെലോട്ട് സസ്പെൻഡ് ചെയ്തു. പദ്ധതി നിർവാസിതർക്കുള്ള ക്വാട്ട ദുരുപയോഗം ചെയ്താണ് നിയമനം നടത്തിയതെന്നാണ് പ്രധാന ആരോപണം.

തമിഴ്‌നാട്ടിൽ ഗോവധം നിരോധിച്ചുകൊണ്ടുള്ള മദ്രാസ് ഹൈക്കോടതിയുടെ ഉത്തരവിന് സുപ്രീം കോടതി ഇടക്കാല സ്റ്റേ അനുവദിച്ചു. നിയമപ്രകാരം പശുക്കളെ അറുക്കാൻ അനുമതിയുള്ളപ്പോൾ അതിന് വിരുദ്ധമായ ഉത്തരവ് നിലനിൽക്കില്ലെന്ന സംസ്ഥാന സർക്കാരിന്റെ വാദം പരിഗണിച്ചാണ് ഈ നടപടി.

ഒഡീഷയിൽ കുടുംബ വഴക്കിനിടെ മൊബൈലുകൊണ്ട് തലയ്ക്കടിയേറ്റ് യുവാവ് മരിച്ചു. ബോലാങ്കിർ ജില്ലയിലെ ചിന്മിഭാട്ടി പാദയിലാണ് സംഭവം. ചിന്മിഭാട്ടി പാദ സ്വദേശിയായ സ്വപ്നേശ്വർ മിശ്ര ആണ് ഭാര്യ മൊബൈലുകൊണ്ട് തലയ്ക്കടിച്ചതിനെ തുടർന്ന് മരണപ്പെട്ടത്.

ഞായറാഴ്ചയാണ് തിരക്കേറിയ റോഡിൽ പേരക്കുട്ടി ഓടിക്കുന്ന കാറിൽ മുൻസീറ്റിൽ ഇരിക്കുന്ന എസ്ഐയുടെ വീഡിയോ പുറത്ത് വന്നത്

മതാചാരങ്ങളുടെ പേരിൽ നദികൾ മലിനമാക്കാൻ പാടില്ലെന്ന് മദ്രാസ് ഹൈക്കോടതി നിരീക്ഷിച്ചു. താമരഭരണി നദിയിൽ ഭക്തർ വസ്ത്രങ്ങളും മറ്റും ഉപേക്ഷിക്കുന്നത് പരിസ്ഥിതിക്ക് ദോഷകരമാണെന്നും, മതവിശ്വാസവുമായി ബന്ധപ്പെട്ട വിഷയമായതിനാൽ അന്തിമ ഉത്തരവിന് മുൻപ് എല്ലാവരെയും കേൾക്കുമെന്നും കോടതി വ്യക്തമാക്കി.

ഹൈദരാബാദിൽ റാപ്പിഡോ ഡ്രൈവറോട് യാത്രക്കൂലി നൽകാതെ യുവതി തർക്കിക്കുന്നതിന്റെ വീഡിയോ വൈറലാകുന്നു. പണം ചോദിച്ച ഡ്രൈവർക്കെതിരെ വ്യാജ പീഡനക്കേസ് നൽകുമെന്ന് യുവതി ഭീഷണിപ്പെടുത്തുന്നതും ദൃശ്യങ്ങളിലുണ്ട്.

ബദരീനാഥ് സംഭാവനക്കൊള്ളയിൽ ക്ഷേത്രം ജീവനക്കാരൻ അറസ്റ്റിൽ. ക്ഷേത്ര സമിതി ചെയർമാൻ്റെ പേഴ്സണൽ അസിസ്റ്റൻ്റ് പ്രമോദ് നൗത്യാൽ ആണ് പിടിയിലായത്. ഞായറാഴ്ച രാത്രിയിലാണ് ഇയാളെ പൊലീസ് അറസ്റ്റ് ചെയ്തത്.

രാജ്യത്തെ ആദ്യ ബുള്ളറ്റ് ട്രെയിൻ പദ്ധതിയായ മുംബൈ-അഹമ്മദാബാദ് ഇടനാഴിക്ക് കനത്ത തിരിച്ചടി. ഭൂമി ഏറ്റെടുക്കലിനുള്ള നഷ്ടപരിഹാരം കണക്കാക്കുന്നതിലെ പുതിയ ഫോർമുല കാരണം പദ്ധതിച്ചെലവ് 40,000 കോടി രൂപയോളം വർധിച്ചേക്കാമെന്നാണ് റിപ്പോർട്ട്.

രാജസ്ഥാനിലെ അജ്മീറിൽ 13 ലക്ഷത്തിലധികം രൂപയുടെ കള്ളനോട്ടുമായി ഒരാളെ പോലീസ് അറസ്റ്റ് ചെയ്തു. 500 രൂപയുടെ വ്യാജ നോട്ടുകളാണ് പിടിച്ചെടുത്തത്. ഇതിന് സമാനമായ മറ്റൊരു സംഭവത്തിൽ, ഗുവാഹത്തിയിൽ നിന്ന് 13.5 ലക്ഷം രൂപയുടെ കള്ളനോട്ടുമായി അഞ്ചുപേരും പിടിയിലായി.

രാഹുൽ ഗാന്ധി എവിടെയാണെന്നും ആരുടെ കൂടെയാണെന്നും ചോദ്യം ചെയ്ത് ബിജെപി ഐടി സെൽ തലവൻ അമിത് മാളവ്യ. വയനാട് മണ്ണിടിച്ചിൽ നടന്നിട്ടും ദുരിതബാധിതരെ സന്ദർശിക്കാത്തതിനെയും 20 ദിവസമായി ഇന്ത്യയിൽ നിന്ന് വിട്ടുനിൽക്കുന്നതിനെയും അദ്ദേഹം വിമർശിച്ചു.