വാട്‌സ്ആപ്പിൽ വന്നൊരു മെസ്സേജ്; ഒറ്റ ക്ലിക്ക്, എല്ലാം തീർന്നു! പുറത്തുവരുന്നത് ഓൺലൈൻ ചതിക്കുഴിയിൽ 16 ലക്ഷം നഷ്ടമായ ഞെട്ടിക്കുന്ന കേസ്!

സ്റ്റോക്ക് മാർക്കറ്റ് ടിപ്പുകൾ, മാർക്കറ്റ് അപ്‌ഡേറ്റുകൾ, ലാഭത്തിന്റെ സ്‌ക്രീൻഷോട്ടുകൾ എന്നിവ വാട്ട്സ്ആപ്പ് ഗ്രൂപ്പിൽ ദിവസവും പങ്കിട്ട ശേഷമാണ് പ്രതികൾ തട്ടിപ്പ് നടത്തിയത്.

അഹമ്മദാബാദ്: ഓൺലൈൻ തട്ടിപ്പുകളുടെ കേസുകൾ രാജ്യത്ത് നിരന്തരം വർദ്ധിച്ചുകൊണ്ടിരിക്കുകയാണ്. ഗുജറാത്തിലെ ഭുജിൽ ഓഹരി വിപണിയിൽ നിക്ഷേപിക്കാനെന്ന പേരിൽ വാട്‍സാപ്പ് വഴി ഒരാളിൽ നിന്ന് 16 ലക്ഷത്തിലധികം രൂപ തട്ടിയെടുത്ത ഒരു കേസ് ഇപ്പോൾ പുറത്തുവന്നു. സൈബർ കുറ്റവാളികൾ ആളുകളെ കുടുക്കാൻ വാട്ട്‌സ്ആപ്പും വ്യാജ ആപ്പുകളും എങ്ങനെ ഉപയോഗിക്കുന്നു എന്നതിനെക്കുറിച്ച് എല്ലാവർക്കും ഒരു പാഠമാണ് ഈ സംഭവം.

എന്താണ് സംഭവം?

അജിത് ജജേഡ എന്ന ഗുജാറാത്ത് സ്വദേശിയാണ് തട്ടിപ്പിന് ഇരയായത്. ഭുജിലെ ഒരു സ്വകാര്യ കമ്പനിയിലാണ് അജിത് ജഡേജ ജോലി ചെയ്യുന്നത്. നിക്ഷേപ ഉപദേശക പ്ലാറ്റ്‌ഫോം എന്ന് അവകാശപ്പെടുന്ന ഒരു വാട്ട്‌സ്ആപ്പ് ഗ്രൂപ്പിൽ തന്നെ ചേർത്തതായി സൈബർ പൊലീസിന് നൽകിയ പരാതിയിൽ അദ്ദേഹം പറഞ്ഞു. തട്ടിപ്പുകാർ ക്രമേണ അദ്ദേഹത്തിന്റെ വിശ്വാസം നേടുകയും ആഴ്ചകൾക്കുള്ളിൽ ലക്ഷക്കണക്കിന് രൂപ അദ്ദേഹത്തെ കബളിപ്പിച്ച് സ്വന്തമാക്കുകയും ചെയ്തു.

തട്ടിപ്പ് ഇങ്ങനെ

ഗുജറാത്ത് പൊലീസിന്റെ കണക്കനുസരിച്ച്, ഏപ്രിലിൽ ഒരു അജ്ഞാത നമ്പറിൽ നിന്ന് ജഡേജയെ ഒരു വാട്ട്‌സ്ആപ്പ് ഗ്രൂപ്പിൽ ചേർത്തതോടെയാണ് തട്ടിപ്പ് ആരംഭിച്ചത്. സ്റ്റോക്ക് മാർക്കറ്റ് ടിപ്പുകൾ, മാർക്കറ്റ് അപ്‌ഡേറ്റുകൾ, ലാഭത്തിന്റെ സ്‌ക്രീൻഷോട്ടുകൾ എന്നിവ ഈ ഗ്രൂപ്പിൽ ദിവസവും പങ്കിട്ടിരുന്നു. എല്ലാം വളരെ പ്രൊഫഷണലായി തോന്നിപ്പിക്കുന്ന രീതിയിലായിരുന്നു തട്ടിപ്പുകാരുടെ നീക്കങ്ങൾ.

ജൂലൈ മാസം ആദ്യം, ജഡേജയ്ക്ക് ഒരു ഓൺലൈൻ ഫോം പൂരിപ്പിച്ച് മൊബൈൽ ആപ്പ് ഡൗൺലോഡ് ചെയ്യുന്നതിനുള്ള ഒരു ലിങ്ക് അയച്ചു. അദ്ദേഹത്തിന്റെ വിശ്വാസം നേടുന്നതിനായി, തട്ടിപ്പുകാർ ആദ്യം അദ്ദേഹത്തോട് 5,000 രൂപ മാത്രം നിക്ഷേപിക്കാൻ ആവശ്യപ്പെട്ടു, തുടർന്ന് താമസിയാതെ ലാഭം വാഗ്ദാനം ചെയ്തു. ഈ ചെറിയ ലാഭം സിസ്റ്റം യഥാർത്ഥമാണെന്ന് ജഡേജയെ ബോധ്യപ്പെടുത്തി. അദ്ദേഹം വലിയ തുകകൾ നിക്ഷേപിക്കാൻ തുടങ്ങി.

ഐപിഒ നിക്ഷേപത്തിൽ ഗണ്യമായ ലാഭം ആപ്പ് കാണിക്കുകയും അദ്ദേഹത്തിന്റെ വാലറ്റിൽ 18 ലക്ഷം രൂപ വായ്‍പ ക്രെഡിറ്റ് ചെയ്യുകയും ചെയ്തു. എങ്കിലും പണം പിൻവലിക്കാൻ ശ്രമിച്ചപ്പോൾ ഇടപാട് പരാജയപ്പെട്ടു. പണം പിൻവലിക്കാൻ ആദ്യം ഒമ്പത് ലക്ഷം രൂപ നിക്ഷേപിക്കണമെന്ന് തട്ടിപ്പുകാർ അദ്ദേഹത്തോട് പറഞ്ഞു. അപ്പോഴാണ് താൻ ഒരു വലിയ തട്ടിപ്പിന് ഇരയായതായി ജഡേജ മനസിലാക്കിയത്. താൻ വഞ്ചിക്കപ്പെട്ടുവെന്ന് മനസ്സിലാക്കിയ ഇര ഉടൻ തന്നെ സൈബർ ക്രൈം ഹെൽപ്പ് ലൈൻ നമ്പറായ 1930 ൽ ബന്ധപ്പെടുകയും ഔദ്യോഗികമായി പരാതി നൽകുകയും ചെയ്തു. ഇന്ത്യൻ ശിക്ഷാ നിയമത്തിലെയും (ബിഎൻഎസ്) ഐടി ആക്ടിലെയും വകുപ്പുകൾ പ്രകാരം പൊലീസ് കേസെടുത്ത് അന്വേഷണം തുടങ്ങി.

സ്വയം എങ്ങനെ സുരക്ഷിതരാകാം?

മനഃശാസ്ത്രപരമായ സമീപനവും സാങ്കേതിക വഞ്ചനയും കൂട്ടിക്കലർത്തി വാട്ട്‌സ്ആപ്പ് അധിഷ്‍ഠിത തട്ടിപ്പുകൾ എങ്ങനെ പ്രവർത്തിക്കുന്നു എന്നതിന്റെ ഓർമ്മപ്പെടുത്തലാണ് ഈ കേസ്. ഈ തട്ടിപ്പുകൾ പലപ്പോഴും തുടക്കത്തിൽ വലിയ തുക ആവശ്യപ്പെട്ടുകൊണ്ടല്ലെന്നും വിശ്വാസം നേടിയെടുത്താണ് ആരംഭിക്കുന്നതെന്നും ഈ സംഭവം വ്യക്തമാക്കുന്നു. നിങ്ങളുടെ സ്വന്തം സുരക്ഷയ്ക്കായി, ഈ കാര്യങ്ങൾ മനസ്സിൽ വയ്ക്കുക. പണമോ നിക്ഷേപമോ ചർച്ച ചെയ്യപ്പെടുന്ന ഒരു വാട്ട്‌സ്ആപ്പ് ഗ്രൂപ്പിലേക്ക് ഒരു അജ്ഞാത നമ്പർ നിങ്ങളെ ചേർത്താൽ, ഉടൻ തന്നെ ആ ഗ്രൂപ്പ് വിടുക. സ്ഥിരീകരിക്കാത്ത ലിങ്കുകളിൽ ക്ലിക്ക് ചെയ്യുകയോ വാട്ട്‌സ്ആപ്പിൽ അയച്ച ഏതെങ്കിലും എപികെ ഫയലുകൾ ഡൗൺലോഡ് ചെയ്യുകയോ ചെയ്യരുത്.

കുറഞ്ഞ സമയത്തിനുള്ളിൽ വലിയ ലാഭം വാഗ്ദാനം ചെയ്യുന്ന സ്‌ക്രീൻഷോട്ടുകൾ ഒരു ആപ്പ് നിങ്ങൾക്ക് കാണിച്ചുതരുന്നുണ്ടെങ്കിൽ ശ്രദ്ധിക്കുക, പലപ്പോഴും ആപ്പിൽ കാണിച്ചിരിക്കുന്ന ലാഭം വ്യാജമായിരിക്കും. നിങ്ങളുടെ സ്വന്തം പണം പിൻവലിക്കാൻ കൂടുതൽ പണം നിക്ഷേപിക്കേണ്ടിവരുമെന്ന് ആരെങ്കിലും നിങ്ങളോട് പറഞ്ഞാൽ, അതൊരു തട്ടിപ്പാണെന്ന് മനസ്സിലാക്കുക. നിങ്ങൾക്ക് എന്തെങ്കിലും സംശയമുണ്ടെങ്കിൽ അല്ലെങ്കിൽ നിങ്ങൾ വഞ്ചിക്കപ്പെട്ടതായി തോന്നിയാൽ, ഉടൻ തന്നെ 1930 എന്ന നമ്പറിൽ വിളിക്കുക. അതിവേഗം റിപ്പോർട്ട് ചെയ്യുന്നത് നിങ്ങളുടെ പണം തിരികെ ലഭിക്കാനുള്ള സാധ്യത വർദ്ധിപ്പിക്കുന്നു.