പാക്കിസ്ഥാനിൽ വിദേശവനിതകളെ കൂട്ടബലാത്സം​ഗം ചെയ്തു; സ്പെയിനിൽനിന്ന് ഫോൺകോൾ; പാക് ഉപപ്രധാനമന്ത്രിയുടെ ബന്ധു ഉൾപ്പെടെ പിടിയിൽ

പാക് ഉപപ്രധാനമന്ത്രിയുടെ ബന്ധുവായ റാസ ദർ ആണ് കേസിലെ മുഖ്യപ്രതിയെന്ന് പൊലീസ് വൃത്തങ്ങളെ ഉദ്ധരിച്ച് മാധ്യമങ്ങൾ റിപ്പോർട്ട് ചെയ്തു. നെതർലൻഡ്സ്, വെനസ്വേല സ്വദേശികളായ സ്ത്രീകളാണ് പാക്കിസ്ഥാനിൽവെച്ച് കൂട്ടബലാത്സം​ഗത്തിനിരയായത്. ജൂൺ 29-നായിരുന്നു സംഭവം.

ലാഹോർ: വിദേശവനിതകളെ തട്ടിക്കൊണ്ടുപോയി കൂട്ടബലാത്സം​ഗം ചെയ്തതിന് പാക്കിസ്ഥാൻ ഉപപ്രധാനമന്ത്രിയുടെ അടുത്തബന്ധുവടക്കം നാലുപേർ അറസ്റ്റിൽ. പാക് ഉപപ്രധാനമന്ത്രിയും വിദേശകാര്യ മന്ത്രിയുമായ ഇഷാഖ് ദറിന്റെ ബന്ധു റാസ ദർ, ഹസ്സൻ റാസ, സിക്കന്ദർ ഖാൻ, സാജിദ് അലി എന്നിവരാണ് പാക്കിസ്ഥാനിൽ പിടിയിലായത്. ലാ​ഹോറിലെ കോടതിയിൽ ഹാജരാക്കിയ പ്രതികളെ അഞ്ചുദിവസത്തേക്ക് പൊലീസ് കസ്റ്റഡിയിൽ റിമാൻഡ്ചെയ്തു.

പാക് ഉപപ്രധാനമന്ത്രിയുടെ ബന്ധുവായ റാസ ദർ ആണ് കേസിലെ മുഖ്യപ്രതിയെന്ന് പൊലീസ് വൃത്തങ്ങളെ ഉദ്ധരിച്ച് മാധ്യമങ്ങൾ റിപ്പോർട്ട് ചെയ്തു. നെതർലൻഡ്സ്, വെനസ്വേല സ്വദേശികളായ സ്ത്രീകളാണ് പാക്കിസ്ഥാനിൽവെച്ച് കൂട്ടബലാത്സം​ഗത്തിനിരയായത്. ജൂൺ 29-നായിരുന്നു സംഭവം. അഞ്ചുപേർ ചേർന്നാണ് സ്ത്രീകളെ ബലാത്സം​ഗം ചെയ്തത്. ഇതിൽ ഒരു പ്രതി ഒളിവിലാണ്. ഇയാൾക്കായി തിരച്ചിൽ തുടരുകയാണെന്നും പൊലീസ് പറഞ്ഞു.

കേസിലെ മുഖ്യപ്രതിയായ റാസ ദറിനെ സ്ത്രീകൾക്ക് നേരത്തേ പരിചയമുണ്ടായിരുന്നു. 2025 ഒക്ടോബറിൽ സിം​ഗപ്പൂരിൽവെച്ചാണ് ഇവർ പരിചയപ്പെടുന്നത്. പിന്നാലെ റാസ ദറും സ്ത്രീകളും ക്രിപ്റ്റോകറൻസിയുമായി ബന്ധപ്പെട്ടുള്ള ബിസിനസിൽ പങ്കാളികളായി.

പരിചയക്കാരായ വിദേശവനിതകളെ റാസ ദർ ആണ് പാക്കിസ്ഥാനിലേക്ക് ക്ഷണിച്ചത്. ഇതനുസരിച്ച് രണ്ടുപേരും ജൂൺ 29-ന് ലാഹോറിലെത്തി. എന്നാൽ, ലാഹോറിൽ വിമാനമിറങ്ങിയതിന് പിന്നാലെ റാസ ദറും കൂട്ടാളികളും തങ്ങളെ തട്ടിക്കൊണ്ടുപോയെന്നും ഒരു വീട്ടിൽവെച്ച് കൂട്ടബലാത്സം​ഗംചെയ്തെന്നുമാണ് സ്ത്രീകളുടെ പരാതി. വിട്ടയക്കണമെങ്കിൽ മോചനദ്രവ്യവും പ്രതികൾ ആവശ്യപ്പെട്ടു. ഇതിനിടെ, സ്ത്രീകളിലൊരാൾ സ്പെയിനിലുള്ള പിതാവിനെ ഫോണിൽ വിളിച്ച് വിവരമറിയിച്ചിരുന്നു. സ്പെയിനിൽനിന്ന് പിതാവ് പാക്കിസ്ഥാൻ പൊലീസിന് വിവരം കൈമാറി. തുടർന്നാണ് പൊലീസ് സ്ത്രീകളെ മോചിപ്പിക്കുകയും പ്രതികളെ പിടികൂടുകയും ചെയ്തത്.