ഭീകരതയ്ക്കെതിരെ യുഎന്നില് മോദി, കശ്മീരിനെക്കുറിച്ച് പരാമര്ശമില്ല; കശ്മീരില് തൊട്ട് ഇമ്രാന്റെ പ്രസംഗം
Synopsis
ആര്എസ്എസിനെതിരെ രൂക്ഷ വിമര്ശനവുമായി ഇമ്രാന് ഖാന്
ന്യൂയോര്ക്ക്: ഐക്യരാഷ്ട്രസഭയില് കശ്മീര് വിഷയം പരാമര്ശിക്കാതിരുന്ന മോദി ഭീകരവാദത്തിനെതിരെ ഇന്ത്യയുടെ രോഷം സ്വാഭാവികമെന്നായിരുന്നു അഭിപ്രായപ്പെട്ടത്. ഭീകരവാദത്തിന്റെ കാര്യത്തിൽ ഭിന്നിക്കുന്നത് യുഎൻ ആശയത്തിന് വിരുദ്ധമാണെന്നും ഭീകരവാദം ലോകത്തിനും മാനവരാശിക്കും ഭീഷണിയാണെന്നും മോദി പറഞ്ഞു. ഭീകരവാദത്തിനെതിരെ ലോകം ഒറ്റക്കെട്ടായി നില്ക്കണമെന്നും പ്രധാനമന്ത്രി ആവശ്യപ്പെട്ടു. സാഹോദര്യം, സമാധാനം എന്നിവയാണ് മുന്നോട്ടു വയ്ക്കാനുള്ള മുദ്രാവാക്യമെന്നും മോദി കൂട്ടിച്ചേര്ത്തു.
അതേസമയം ജമ്മുകശ്മീർ വിഷയം ഐക്യരാഷ്ട്രസഭയിൽ പാകിസ്ഥാന് പ്രധാനമന്ത്രി ഇമ്രാൻ ഖാൻ ഉന്നയിച്ചു. കശ്മീരിലെ സാഹചര്യം ഗുരുതരമെന്ന പറഞ്ഞ ഇമ്രാന് ഖാന് ഐക്യരാഷ്ട്ര സഭ നല്കിയ അവകാശങ്ങള് കശ്മീരില് നിഷേധിക്കുന്നെന്നും അവകാശപ്പെട്ടു. കശ്മീരില് 80 ലക്ഷം പേരെ തടവിലാക്കിയിരിക്കുന്നു. കര്ഫ്യൂ പിന്വലിച്ചാല് രക്തചൊരിച്ചില് ഉണ്ടാകും. ഐക്യരാഷ്ട്രസഭ കശ്മീരില് ഇടപെടണമെന്നും ഇമ്രാന് ഖാന് ആവശ്യപ്പെട്ടു.
ബാലാകോട്ടില് ഭീകരരെ വധിച്ചെന്ന പ്രചാരണം കള്ളമാണെന്ന് പറഞ്ഞ ഇമ്രാന് ഖാന് ആര്എസ്എസിനെതിരെയും രൂക്ഷ വിമര്ശനം ഉയര്ത്തി. മുസ്ലീങ്ങളെ വംശഹത്യ ചെയ്യണമെന്ന് ആര്എസ്എസ് വിശ്വസിക്കുന്നു. വെറുപ്പിന്റെ ഈ പ്രത്യയശാസ്ത്രമാണ് ഗാന്ധിജിയെ വധിച്ചതെന്നായിരുന്നു ഇമ്രാന് ഖാന്റെ ആരോപണം. ആർഎസ്എസിന് ഹിറ്റ്ലറുടെയും മുസോളിനിയുടെയും നയമാണ്. ഗുജറാത്തിൽ നരേന്ദ്ര മോദി മുഖ്യമന്ത്രി ആയിരുന്നപ്പോൾ മുസ്ലിംങ്ങളെ കൂട്ടക്കൊല ചെയ്തെന്നും ഇമ്രാന് ഖാന് ഐക്യരാഷ്ട്രസഭയില് പറഞ്ഞു.