ഗാസയില് ഹമാസിന്റെ ടണലുകളിലേക്ക് കടല് വെള്ളം പമ്പ് ചെയ്യാന് തുടങ്ങി ഇസ്രയേല് സൈന്യം
Synopsis
ഹമാസ് ഉപയോഗിച്ചിരുന്ന ടണലുകള് പൂര്ണമായി നശിപ്പിക്കുകയാണ് ഇസ്രയേല് സൈന്യത്തിന്റെ ലക്ഷ്യമെന്ന് റിപ്പോര്ട്ടുകള് പറയുന്നു.
വാഷിങ്ടണ്: ഗാസയില് ഹമാസിന്റെ ടണല് ശൃംഖലയിലേക്ക് ഇസ്രയേല് സൈന്യം കടല് വെള്ളം പമ്പ് ചെയ്യാന് തുടങ്ങിയതായി റിപ്പോര്ട്ടുകള്. അമേരിക്കന് ഉദ്യോഗസ്ഥരെ ഉദ്ധരിച്ച് വാള് സ്ട്രീറ്റ് ജേണലാണ് ചൊവ്വാഴ്ച ഇത് സംബന്ധിച്ച റിപ്പോര്ട്ട് പുറത്തുവിട്ടത്. ആഴ്ചകളോളം നീണ്ടുനിന്നേക്കാവുന്ന നടപടിക്കാണ് ഇസ്രയേല് സൈന്യം തുടക്കം കുറിച്ചിരിക്കുന്നതെന്നും റിപ്പോര്ട്ട് പറയുന്നു.
ഒളിച്ചിരിക്കാനും ബന്ധികളെയും ആയുധങ്ങളും ഒളിപ്പിക്കാനും ഹമാസ് ഉപയോഗിച്ചിരുന്ന ടണലുകള് നശിപ്പിക്കാന് ഇത് സഹായകമാവുമെന്നാണ് അമേരിക്കന് ഭരണകൂടത്തിലെ ഉദ്യോഗസ്ഥരെ ഉദ്ധരിച്ചുകൊണ്ടുള്ള റിപ്പോര്ട്ട് പറയുന്നത്. അതേസമയം ഗാസയിലെ ശുദ്ധജല വിതരണം തന്നെ താറുമാറാവാന് കടല് വെള്ളം പമ്പ് ചെയ്തുകൊണ്ടുള്ള ഈ നടപടി കാരണമായേക്കുമെന്ന ആശങ്കയും ചിലര് പങ്കുവെയ്ക്കുന്നുണ്ട്. അതേസമയം ഇത്തരമൊരു നടപടിയെക്കുറിച്ചുള്ള റിപ്പോര്ട്ടുകളോട് ഇസ്രയേല് സൈന്യം ഇതുവരെ പ്രതികരിച്ചിട്ടില്ല. ഇത് സംബന്ധിച്ച ചോദ്യങ്ങളോട് ഇസ്രയേല് പ്രതിരോധ മന്ത്രാലയ വക്താവും വിസമ്മതിച്ചു. എന്നാല് ടണലുകളില് വെള്ളം നിറയ്ക്കാന് ലക്ഷ്യമിട്ടുള്ള നടപടികള് നേരത്തെ തന്നെ ഇസ്രയേല് സൈന്യം തുടങ്ങിയിരുന്നു. കൂറ്റന് മോട്ടോറുകള് ഗാസയില് പലയിടങ്ങളിലായി സജ്ജീകരിച്ചിരിക്കുന്നതിന്റെ ദൃശ്യങ്ങളും നേരത്തെ തന്നെ പുറത്തുവന്നിരുന്നു.
ആ ഉപദേശങ്ങള് എന്റേതല്ല; തന്റെ പേരില് പ്രചരിക്കുന്ന വീഡിയോ 'ഡീപ് ഫേക്കേന്ന്' രത്തന് ടാറ്റയുടെ മുന്നറിയിപ്പ്
ന്യൂഡല്ഹി: തന്റെ പേരില് പ്രചരിക്കുന്ന വ്യാജ വീഡിയോയെക്കുറിച്ച് മുന്നറിയിപ്പുമായി പ്രമുഖ വ്യവസായിയും ടാറ്റ ഗ്രൂപ്പ് മുന് ചെയര്മാനുമായ രത്തന് ടാറ്റ. നഷ്ട സാധ്യതകളില്ലാത്തതും നൂറ് ശതമാനം നേട്ടം ഉറപ്പു നല്കുന്നതുമായ നിക്ഷേപ പദ്ധതികളെന്ന പേരില് തയ്യാറാക്കിയിരിക്കുന്ന ഒരു വീഡിയോ ക്ലിപ്പിലാണ് രത്തന് ടാറ്റയുടെ 'ഉപദേശങ്ങള്' വ്യാജമായി ചേര്ത്ത് പ്രചരിപ്പിക്കുന്നത്. ഈ വീഡിയോ വ്യാജമാണെന്നും അതിനെതിരെ ജാഗ്രത പുലര്ത്തണമെന്നും ബുധനാഴ്ച രത്തന് ടാറ്റ ആവശ്യപ്പെട്ടു.
ഇന്സ്റ്റഗ്രാം സ്റ്റോറിയിലൂടെയാണ് രത്തന് ടാറ്റ തന്റെ പേരിലുള്ള വ്യാജ വീഡിയോയെക്കുറിച്ച് മുന്നറിയിപ്പ് നല്കിയത്. സോന അഗര്വാള് എന്ന പേരിലുള്ള ഒരു അക്കൗണ്ടില് നിന്നുള്ള വീഡിയോയുടെ സ്ക്രീന് ഷോട്ടും അദ്ദേഹം പോസ്റ്റ് ചെയ്തിട്ടുണ്ട്. ചില നിക്ഷേപങ്ങള് രത്തന് ടാറ്റ പ്രോത്സാഹിപ്പിക്കുന്നു എന്ന തരത്തില് അദ്ദേഹത്തിന്റെ അഭിമുഖമാണ് വ്യാജമായി തയ്യാറാക്കിയിരിക്കുന്നത്. ഈ വ്യാജ വീഡിയോയില് സോന അഗര്വാളിനെ തന്റെ മാനേജറായി അവതരിപ്പിച്ചുകൊണ്ട് രത്തന് ടാറ്റ സംസാരിക്കുന്നതായാണ് ചിത്രീകരണം.
ഇന്ത്യയിലുള്ള എല്ലാ ഓരോരുത്തരോടും രത്തന് ടാറ്റ നിര്ദേശിക്കുന്ന കാര്യം എന്ന തരത്തില് തലക്കെട്ട് കൊടുത്തിട്ടുണ്ട്. 100 ശതമാനം ഗ്യാരന്റിയോടെ മറ്റ് റിസ്കുകള് ഒട്ടുമില്ലാതെ നിങ്ങളുടെ നിക്ഷേപം വര്ദ്ധിപ്പിക്കാനുള്ള സാധ്യതയാണ് ഇതെന്നും കൂടുതല് വിവരങ്ങള്ക്ക് ചാനല് സന്ദര്ശിക്കാനും വീഡിയോയുടെ ഒപ്പമുള്ള കുറിപ്പില് ആവശ്യപ്പെടുന്നു. നിരവധിപ്പേര്ക്ക് നിക്ഷേപങ്ങളില് നിന്നുള്ള പണം തങ്ങളുടെ അക്കൗണ്ടുകളില് വന്നതായി കാണിക്കുന്ന സ്ക്രീന് ഷോട്ടുകളും വീഡിയോയില് ഉള്പ്പെടുന്നുണ്ട്.
ഏഷ്യാനെറ്റ് ന്യൂസ് ലൈവ് യുട്യൂബില് കാണാം...