കെ എല് രാഹുലിന്റെ പരിക്ക് ഗുരുതരം? ചെന്നൈക്കെതിരെ കളിക്കില്ല, സീസണ് നഷ്ടമാകാനിട, പകരം നായകന്
Synopsis
റോയല് ചലഞ്ചേഴ്സ് ബാംഗ്ലൂരിന് എതിരായ മത്സരത്തില് ബൗണ്ടറി തടയാനുള്ള ശ്രമത്തിനിടെയാണ് കെ എല് രാഹുലിന് പരിക്കേറ്റത്
ലഖ്നൗ: ഐപിഎല് പതിനാറാം സീസണില് ഇന്ന് ലഖ്നൗ സൂപ്പര് ജയന്റ്സും ചെന്നൈ സൂപ്പര് കിംഗ്സും ഏറ്റുമുട്ടുമ്പോള് കെ എല് രാഹുല് മൈതാനത്തുണ്ടാവില്ല. കഴിഞ്ഞ മത്സരത്തില് കാലിന് പരിക്കേറ്റ രാഹുലിന് ഇന്ന് കളിക്കാനാവില്ല എന്നാണ് റിപ്പോര്ട്ട്. രാഹുലിന്റെ അസാന്നിധ്യത്തില് ഓള്റൗണ്ടര് ക്രുനാല് പാണ്ഡ്യയായിരിക്കും ലഖ്നൗവിനെ നയിക്കുക. രാഹുലിന്റെ ആരോഗ്യം ബിസിസിഐ കൃത്യമായി നിരീക്ഷിച്ചുവരികയാണ്. ബെംഗളൂരുവിലെ ദേശീയ ക്രിക്കറ്റ് അക്കാഡമിയിലെ മെഡിക്കല് സംഘത്തിന്റെ നിര്ദേശം അനുസരിച്ചായിരിക്കും രാഹുല് അവശേഷിക്കുന്ന മത്സരങ്ങളില് കളിക്കുന്ന കാര്യത്തില് അന്തിമ തീരുമാനം കൈക്കൊള്ളുക. ചിലപ്പോള് താരത്തിന് ഈ ഐപിഎല് സീസണിലെ ശേഷിക്കുന്ന മത്സരങ്ങള് നഷ്ടമാകാന് സാധ്യതയുണ്ട്.
സിഎസ്കെയ്ക്കെതിരായ ഇന്നത്തെ മത്സരത്തില് കെ എല് രാഹുലിന് പകരം ക്രുനാല് പാണ്ഡ്യയായിരിക്കും ലക്നൗ സൂപ്പര് ജയന്റ്സിനെ നയിക്കുക. ലഖ്നൗവില് ഉച്ചകഴിഞ്ഞ് 3.30നാണ് മത്സരം ആരംഭിക്കുക. പോയിന്റ് പട്ടികയിലെ മൂന്നാംസ്ഥാനക്കാരായ ലഖ്നൗവിന് ഇന്ന് ജയിച്ചാല് പ്രയോജനമുണ്ട്. അതേസമയം നാലാമതാണ് ചെന്നൈ സൂപ്പര് കിംഗ്സ്.
റോയല് ചലഞ്ചേഴ്സ് ബാംഗ്ലൂരിന് എതിരായ കഴിഞ്ഞ മത്സരത്തില് ബൗണ്ടറി തടയാനുള്ള ശ്രമത്തിനിടെയാണ് കെ എല് രാഹുലിന്റെ കാലിന് പരിക്കേറ്റത്. ഇതിന് ശേഷം അവസാനക്കാരനായി ബാറ്റിംഗിന് ഇറങ്ങിയെങ്കിലും രാഹുലിന് ടീമിനെ ജയിപ്പിക്കാനായില്ല. താരം മുടന്തിയാണ് ക്രീസില് ബാറ്റ് ചെയ്തത്. ലോക ടെസ്റ്റ് ചാമ്പ്യന്ഷിപ്പ് ഫൈനല് മുന്നിര്ത്തി ചികില്സയ്ക്കായി രാഹുലിനോട് ഈ ആഴ്ച ബെംഗളൂരുവിലെ ദേശീയ ക്രിക്കറ്റ് അക്കാഡമിയില് എത്തിച്ചേരാന് ബിസിസിഐ നിര്ദേശിച്ചതായി ക്രിക്ബസിന്റെ റിപ്പോര്ട്ടില് പറയുന്നു. മധ്യനിര ബാറ്റര് ശ്രേയസ് അയ്യര് പരിക്കേറ്റ് നേരത്തെതന്നെ പുറത്തായതിനാല് രാഹുലിന് കളിക്കാനാവാതെ വന്നാല് അജിങ്ക്യ രഹാനെയ്ക്കാവും പ്ലേയിംഗ് ഇലവനില് അവസരം ലഭിക്കുക.
Read more: വെറും ഫിഫ്റ്റിയല്ല, കിണ്ണംകാച്ചിയ ഇന്നിംഗ്സ്; അമാന് ഹക്കീം ഖാന് റെക്കോര്ഡ് ബുക്കില്
ഏഷ്യാനെറ്റ് ന്യൂസ് മലയാളത്തിലൂടെ Sports News അറിയൂ. IPL News തുടങ്ങി എല്ലാ കായിക ഇനങ്ങളുടെയും അപ്ഡേറ്റുകൾ ഒറ്റതൊട്ടിൽ. നിങ്ങളുടെ പ്രിയ ടീമുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ എല്ലാം ഇപ്പോൾ Asianet News Malayalam മലയാളത്തിൽ തന്നെ!