ആദ്യ പന്തില് കോലി മടങ്ങി, പിന്നാലെ ഷഹ്ബാസ്! രാജസ്ഥാനെതിരെ നിയന്ത്രണം ഏറ്റെടുത്ത് ഫാഫ്- മാക്സി സഖ്യം
Synopsis
മത്സരത്തിലെ ആദ്യ പന്തില് തന്നെ ബോള്ട്ട് കോലിയെ വിക്കറ്റിന് മുന്നില് കുടുക്കി. മൂന്നാം ഓവറിന്റെ ആദ്യ പന്തില് ഷഹ്ബാസിനേയും മടക്കി.
ബംഗളൂരു: ഐപിഎല്ലില് രാജസ്ഥാന് റോയല്സിനെതിരായ മത്സരത്തില് റോയല് ചലഞ്ചേഴ്സ് ബാംഗ്ലൂരിന് രണ്ട് വിക്കറ്റ് നഷ്ടം. ബംഗളൂരു, ചിന്നസ്വാമി സ്റ്റേഡിയത്തില് ടോസ് നഷ്ടപ്പെട്ട് ബാറ്റിംഗിനെത്തിയ ആര്സിബി ഒടുവില് വിവരം ലഭിക്കുമ്പോള് ആറ് ഓവറില് രണ്ടിന് 62 എന്ന നിലയിലാണ്. വിരാട് കോലി (0), ഷഹ്ബാസ് അഹമ്മദ് (2) എന്നിവരാണ് പുറത്തായത്. ട്രന്റ് ബോള്ട്ടിനാണ് രണ്ട് വിക്കറ്റുകളും. ഗ്ലെന് മാക്സ്വെല് (29), ഫാഫ് ഡു പ്ലെസിസ് (31) എന്നിവരാണ് ക്രീസില്.
മത്സരത്തിലെ ആദ്യ പന്തില് തന്നെ ബോള്ട്ട് കോലിയെ വിക്കറ്റിന് മുന്നില് കുടുക്കി. മൂന്നാം ഓവറിന്റെ ആദ്യ പന്തില് ഷഹ്ബാസിനേയും മടക്കി. ബോള്ട്ടിനെ പുള് ചെയ്യാനുള്ള ശ്രമം മിഡ് വിക്കറ്റില് യഷസ്വി ജയ്സ്വാളിന്റെ കൈകളില് അവസാനിച്ചു. ഇതോടെ രണ്ടിന് 12 എന്ന നിലയിലായി ആര്സിബി. എന്നാല് നാലാം വിക്കറ്റില് ഒത്തുചേര്ന്ന ഫാഫ്- മാക്സ്വെല് സഖ്യം തകര്ച്ചയില് നിന്ന് രക്ഷിച്ചു. ഇതുവരെ ഇരുവരും 50 റണ്സ് കൂട്ടിചേര്ത്തിട്ടുണ്ട്.
നേരത്തെ, ടോസ് നേടിയ രാജസ്ഥാന് ക്യാപ്റ്റന് സഞ്ജു സാംസണ് ബൗളിംഗ് തിരിഞ്ഞെടുക്കുകയായിരുന്നു. അവസാന മത്സരം കളിച്ച ടീമില് നിന്ന് മാറ്റമൊന്നുമില്ലാതെയാണ് രാജസ്ഥാന് ഇറങ്ങുന്നത്. ബാംഗ്ലൂര് ഒരു മാറ്റം വരുത്തി. പേസര് വെയ്ന് പാര്നെല്ലിന് പകരം ഡേവിഡ് വില്ലി ടീമിലെത്തി.
റോയല് ചലഞ്ചേഴ്സ് ബാംഗ്ലൂര്: വിരാട് കോലി, ഫാഫ് ഡു പ്ലെസിസ്, ഗ്ലെന് മാക്സ്വെല്,, മഹിപാല് ലോംറോര്, ദിനേശ് കാര്ത്തിക്, ഷഹ്ബാസ് അഹമ്മദ്, വാനിന്ദു ഹസരങ്ക, സുയഷ് പ്രഭുദേശായ്, ഹര്ഷല് പട്ടേല്, ഡേവിഡ് വില്ലി, മുഹമ്മദ് സിറാജ്.
രാജസ്ഥാന് റോയല്സ്: ജോസ് ബട്ലര്, യഷസ്വി ജയ്സ്വാള്, സഞ്ജു സാംസണ്, ദേവ്ദത്ത് പടിക്കല്, ഷിംറോണ് ഹെറ്റ്മെയര്, റിയാന് പരാഗ്, ദ്രുവ് ജുറല്, ആര് അശ്വിന്, ജേസണ് ഹോള്ഡര്, ട്രന്റ് ബോള്ട്ട്, സന്ദീപ് ശര്മ, യൂസ്വേന്ദ്ര ചാഹല്.
ഏഷ്യാനെറ്റ് ന്യൂസ് മലയാളത്തിലൂടെ Sports News അറിയൂ. IPL News തുടങ്ങി എല്ലാ കായിക ഇനങ്ങളുടെയും അപ്ഡേറ്റുകൾ ഒറ്റതൊട്ടിൽ. നിങ്ങളുടെ പ്രിയ ടീമുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ എല്ലാം ഇപ്പോൾ Asianet News Malayalam മലയാളത്തിൽ തന്നെ!