'കിംഗിന് മുന്നിൽ നീ വളരെ ചെറുത്, നിലത്ത് നില്‍ക്കൂ'; കടുത്ത സൈബ‍ർ ആക്രമണം നേരിട്ട് നവീൻ, കമന്‍റ് ബോക്സ് പൂട്ടി

ലഖ്നൗ താരം നവീന്‍ ഉള്‍ ഹഖിനെ പ്രകോപിപ്പിച്ച കോലിയുടെ വാക്കുകള്‍ എന്തായിരിക്കുമെന്നതിനെച്ചൊല്ലി സാമൂഹിക മാധ്യമങ്ങളില്‍ ചൂടേറിയ ചര്‍ച്ചയാണ് ആരാധകര്‍ നടത്തുന്നത്.

ലഖ്നൗ: ഐപിഎല്ലില്‍ റോയല്‍ ചലഞ്ചേഴ്സ് ബാംഗ്ലൂരിനെതിരായ മത്സരത്തില്‍ വിരാട് കോലിയുമായുള്ള വാക്കു തര്‍ക്കത്തിന് ശേഷം സോഷ്യല്‍ മീഡ‍ിയയില്‍ കടുത്ത സൈബര്‍ ആക്രമണം നേരിട്ട് ലഖ്നൗ സൂപ്പര്‍ ജയന്‍റ്സ് താരം നവീൻ ഉള്‍ ഹഖ്. ആക്രമണം കടുത്തതോടെ താരത്തിന് ഇന്‍സ്റ്റഗ്രാമില്‍ കമന്‍റ് വിഭാഗം പൂട്ടിക്കെട്ടേണ്ടി വന്നു. കിംഗിന് മുന്നില്‍ വളരെ ചെറുതാണ് എന്ന തരത്തിലുള്ള കമന്‍റുകളാണ് പഴയ ചിത്രങ്ങളില്‍ ഉള്‍പ്പെടെ വന്നത്.  

ലഖ്നൗ താരം നവീന്‍ ഉള്‍ ഹഖിനെ പ്രകോപിപ്പിച്ച കോലിയുടെ വാക്കുകള്‍ എന്തായിരിക്കുമെന്നതിനെച്ചൊല്ലി സാമൂഹിക മാധ്യമങ്ങളില്‍ ചൂടേറിയ ചര്‍ച്ചയാണ് ആരാധകര്‍ നടത്തുന്നത്. ലഖ്നൗ ഇന്നിംഗ്സിനിടെ ബാറ്റ് ചെയ്യുകയായിരുന്ന നവീനിന് സമീപമെത്തേക്ക് രോഷത്തോടെ എത്തിയ കോലി തന്‍റെ കാലിലെ ഷൂ ഉയര്‍ത്തി അതിന് താഴെയുള്ള പുല്ല് എടുത്ത് ഉയര്‍ത്തിക്കാട്ടി ഇതുപോലെയാണ് നീ എനിക്ക് എന്ന് പറഞ്ഞുവെന്നാണ് വീഡിയോകള്‍ കണ്ട് ആരാധകര്‍ പറയുന്നത്.

കോലി നടന്നടുക്കുന്നതും കാലിലെ ഷൂവിനടിയില്‍ നിന്ന് പുല്ല് എടുത്ത് കാണിച്ച് എന്തോ പറയുന്നതും വീഡിയോയില്‍ കാണാം. അമ്പയറും നോണ്‍ സ്ട്രൈക്കിംഗ് എന്‍ഡിലുണ്ടായിരുന്ന അമിത് മിശ്രയും കോലിയെ തടയാന്‍ ശ്രമിക്കുന്നതും വീഡിയോയിലുണ്ട്. പിന്നീട് അമിത് മിശ്രയുമായും കോലി കൊമ്പു കോര്‍ത്തിരുന്നു. മത്സരശേഷം കളിക്കാര്‍ തമ്മില്‍ ഹസ്തദാനം നടത്തുമ്പോള്‍ നവീനിന് കൈ കൊടുത്തശേഷവും കോലി എന്തോ പറയുകയും നവീന്‍ അതിന് അതേ രീതിയില്‍ മറുപടി പറയുന്ന വീഡിയോയും പുറത്തുവന്നിരുന്നു.

ഗ്ലെന്‍ മാക്സ്‌വെല്‍ ഇടപെട്ടാണ് ഇരുവരെയും പിടിച്ചു മാറ്റി രംഗം ശാന്തമാക്കിയത്. പിന്നീട് ലഖ്നൗ ടീം മെന്‍ററായ ഗൗതം ഗംഭീറുമായും കോലി ഉടക്കി. നവീനുമായുള്ള ഹസ്തദാനത്തിനുശേഷം മടങ്ങുകയായിരുന്ന കോലിയുടെ അടുത്തെത്തി ലഖ്നൗ താരം കെയ്ല്‍ മയേഴ്സ് സംസാരിക്കുമ്പോള്‍ ഗംഭീറെത്തി മയേഴ്സിനെ കൂട്ടിക്കൊണ്ടുപോയിരുന്നു. ഇതിനുശേഷം രാഹുലും കോലിയും തമ്മില്‍ സംസാരിച്ചു നില്‍ക്കുമ്പോള്‍ സമീപത്തുകൂടെ പോയ നവീനിനെ രാഹുല്‍ അടുത്തേക്ക് വിളിച്ചെങ്കിലും നവീന്‍ വരാന്‍ കൂട്ടാക്കിയില്ല.