ഐപിഎല് 2023ന്റെ കണ്ടെത്തല് ആര്? ചോദ്യവുമായി രാജസ്ഥാന് റോയല്സ്, തകര്പ്പന് പേരുകളുമായി ആരാധകര്
Synopsis
രാജസ്ഥാന് റോയല്സിന്റെ ട്വീറ്റിന് താഴെ നിരവധി താരങ്ങളുടെ പേരുകളാണ് ആരാധകര് പറയുന്നത്
കൊല്ക്കത്ത: ഐപിഎല് പതിനാറാം സീസണ് പുരോഗമിക്കുമ്പോള് ഒട്ടേറെ യുവതാരങ്ങള് ഭാവി വാഗ്ദാനങ്ങളായി വിശേഷിപ്പിക്കപ്പെട്ടുകഴിഞ്ഞു. യശസ്വി ജയ്സ്വാള്, ധ്രുവ് ജൂരെല്, നിഹാല് വധേര, റിങ്കു സിംഗ്, നൂര് അഹമ്മദ്, തിലക് വര്മ്മ എന്നിങ്ങനെ ഈ പട്ടിക നീളും. ഇവരില് ജയ്സ്വാളിനെ പോലുള്ള താരങ്ങള് കഴിഞ്ഞ സീസണില് തന്നെ പേരെടുത്ത താരങ്ങളാണ്. ഐപിഎല് 2023ന്റെ കണ്ടെത്തലുകള് ആരൊക്കെയെന്ന ചോദ്യവുമായി കടന്നുവന്നിരിക്കുകയാണ് സഞ്ജു സാംസണ് നായകനായ രാജസ്ഥാന് റോയല്സ്. ട്വിറ്ററിലൂടെയാണ് റോയല്സിന്റെ ചോദ്യം.
രാജസ്ഥാന് റോയല്സിന്റെ ട്വീറ്റിന് താഴെ നിരവധി താരങ്ങളുടെ പേരുകളാണ് ആരാധകര് പറയുന്നത്. ഇവരില് ശ്രദ്ധേയമായ രണ്ട് പേര് റോയല്സ് ഓപ്പണര് യശസ്വി ജയ്സ്വാളും ഫിനിഷര് ധ്രുവ് ജൂരെലുമാണ്. മുംബൈ ഇന്ത്യന്സിന്റെ തിലക് വര്മ്മ, നെഹാല് വധേര, കൊല്ക്കത്ത നൈറ്റ് റൈഡേഴ്സിന്റെ റിങ്കു സിംഗ്, ചെന്നൈ സൂപ്പര് കിംഗ്സിന്റെ മതീഷ പതിരാന, പഞ്ചാബ് കിംഗ്സിന്റെ ജിതേഷ് ശര്മ്മ, ആര്സിബിയുടെ മഹിപാല് ലോംറോര്, ഡല്ഹി ക്യാപിറ്റല്സിന്റെ അഭിഷേക് പോരെല്, സണ്റൈസേഴ്സ് ഹൈദരാബാദിന്റെ അഭിഷേക് ശര്മ്മ, ഗുജറാത്ത് ടൈറ്റന്സിന്റെ നൂര് അഹമ്മദ്, ലഖ്നൗ സൂപ്പര് ജയന്റ്സിന്റെ ആയുഷ് ബദോനി എന്നീ പേരുകളും ആരാധകര് കമന്റ് ചെയ്തിട്ടുണ്ട്. ഇവരില് നൂര് അഹമ്മദ് അഫ്ഗാനിസ്ഥാനില് നിന്നുള്ള സ്പിന്നറും മതീഷ പതിരാന ലങ്കന് പേസറുമാണ്.
ഐപിഎല്ലില് വ്യാഴാഴ്ച്ച കൊല്ക്കത്ത നൈറ്റ് റൈഡേഴ്സ്-രാജസ്ഥാന് റോയല്സ് പോരാട്ടമാണ്. വൈകിട്ട് ഏഴരയ്ക്ക് കൊൽക്കത്തയിലെ ഈഡൻ ഗാർഡൻസിലാണ് അങ്കം. സീസണിലെ പന്ത്രണ്ടാം പോരിനിറങ്ങുമ്പോൾ 11 കളിയിൽ 10 പോയിന്റുമായി രാജസ്ഥാനും കൊൽക്കത്തയും ഒപ്പത്തിനൊപ്പമാണ്. ശേഷിക്കുന്ന മൂന്ന് കളിയും ജയിച്ചാലെ ഇരു ടീമുകള്ക്കും പ്ലേ ഓഫിൽ എത്താനാവൂ. ഇന്ന് തോൽക്കുന്നവരുടെ ഭാവി പ്രതിസന്ധിയിലാവും. മറ്റ് ടീമുകളുടെ പ്രകടനത്തെക്കൂടി ആശ്രയിച്ചായിരിക്കും ശേഷിക്കുന്ന സാധ്യത. ഇതൊഴിവാക്കുകയാണ് ഇരു ടീമുകളുടേയും ലക്ഷ്യം. ഐപിഎല് 2023ല് മികച്ച തുടക്കം നേടിയ രാജസ്ഥാന് റോയല്സ് പിന്നീട് തോല്വികളുമായി പ്രതിരോധത്തിലാവുകയായിരുന്നു. ക്യാപ്റ്റന് സഞ്ജു സാംസണ് റോയല്സിനെ ബാറ്റ് കൊണ്ട് മുന്നില് നിന്ന് നയിക്കും എന്നാണ് ആരാധകരുടെ പ്രതീക്ഷ.
Read more: വേണ്ടത് ഒരൊറ്റ വിക്കറ്റ്; ഐപിഎല്ലില് ഡ്വെയ്ന് ബ്രാവോയുടെ റെക്കോര്ഡ് കറക്കിയിടാന് ചാഹല്
ഏഷ്യാനെറ്റ് ന്യൂസ് മലയാളത്തിലൂടെ Sports News അറിയൂ. IPL News തുടങ്ങി എല്ലാ കായിക ഇനങ്ങളുടെയും അപ്ഡേറ്റുകൾ ഒറ്റതൊട്ടിൽ. നിങ്ങളുടെ പ്രിയ ടീമുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ എല്ലാം ഇപ്പോൾ Asianet News Malayalam മലയാളത്തിൽ തന്നെ!