തിരുവോണം ബമ്പര്‍ നറുക്കെടുപ്പ് ഇന്ന് ഉച്ചയ്ക്ക് 1.30ക്ക്; ഒന്നാം സമ്മാനം 30 കോടി രൂപ, അച്ചടിച്ച 90 ലക്ഷം ടിക്കറ്റുകളും വിറ്റഴിഞ്ഞു

ലോട്ടറി വകുപ്പ് അച്ചടിച്ച 90 ലക്ഷം ടിക്കറ്റുകളും വിറ്റഴിഞ്ഞു. 20 ലക്ഷം ടിക്കറ്റുകൾ വിറ്റ പാലക്കാട് ആണ് വിൽപനയിൽ മുന്നിൽ.

തിരുവനന്തപുരം: ഈ വർഷത്തെ ഓണം ബംപർ നറുക്കെടുപ്പ് ഇന്ന്. 30 കോടി രൂപയാണ് ഒന്നാം സമ്മാനം. ലോട്ടറി വകുപ്പ് അച്ചടിച്ച 90 ലക്ഷം ടിക്കറ്റുകളും വിറ്റഴിഞ്ഞു. 20 ലക്ഷം ടിക്കറ്റുകൾ വിറ്റ പാലക്കാട് ആണ് വിൽപനയിൽ മുന്നിൽ. ഉച്ചയ്ക്ക് 1.30 നാണ് നറുക്കെടുപ്പ്.

ഇത്തവണ 90 ലക്ഷം ടിക്കറ്റുകളാണ് തിരുവോണം ബമ്പറിന്റേതായി അച്ചടിച്ചത്. ഇതിൽ എല്ലാ ടിക്കറ്റുകളും വിറ്റഴിഞ്ഞതായി ലോട്ടറി വകുപ്പ് അറിയിച്ചിട്ടുണ്ട്. ഏറ്റവും കൂടുതൽ വില്പന നടന്നത് പാലക്കാട് ജില്ലയിലാണ് (20,95,300 ടിക്കറ്റുകൾ). തൃശൂർ ജില്ല വില്പനയിൽ രണ്ടാം സ്ഥാനത്തും (10,62,000 ), തിരുവനന്തപുരം ജില്ല(8,64,100 ) മൂന്നാം സ്ഥാനത്തുമാണ്. കാസർഗോഡ് ജില്ലയിലാണ് ഏറ്റവും കുറവ് വില്പന (2,71,400 ) നടന്നത്.

ബമ്പർ നറുക്കെടുപ്പിന് ഏതാനും മണിക്കൂറുകൾ മാത്രം ബാക്കി നിൽക്കെ 30 കോടിയിൽ എത്ര രൂപ ഭാ​ഗ്യശാലിയ്ക്ക് ലഭിക്കുമെന്ന് നോക്കാം. 30 കോടി രൂപ സമ്മാനം അടിച്ചാൽ 10 ശതമാനം ഏജൻസി കമ്മീഷനായി പിടിക്കും. ഏകദേശം മൂന്നു കോടി രൂപ. ബാക്കിയുള്ള 27 കോടി രൂപയിൽ നിന്നും നികുതി ഈടാക്കും. 30 ശതമാനം ടിഡിഎസ് ഈടാക്കും(ടിഡിഎസ് 8.10 കോടി). ഈ നികുതിക്ക് മുകളിൽ 25 ശതമാനം(2,02,50,000 രൂപ) സർചാർജ് വരും. ഒപ്പം ഹെല്‍ത്ത് ആന്‍ഡ് എജ്യുക്കേഷന്‍ സെസ് കൊടുക്കണം. ഇതെല്ലാം കഴിഞ്ഞ് 30 കോടി രൂപയിൽ നിന്നും ഏകദേശം 16.47 കോടി രൂപ ഭാ​ഗ്യശാലിയ്ക്ക് ലഭിക്കും.