പരിസ്ഥിതി ലോല ഉത്തരവ്; സംസ്ഥാന സര്ക്കാരിനെതിരെ ഇടുക്കി രൂപത
Synopsis
നിലവിലെ ബഹളങ്ങള്ക്കിടയില് പരിസ്ഥിതി ലോല പ്രശ്നം മറന്നുപോകുന്നു. ഇതിന് പ്രതിപക്ഷത്തിനും പങ്കുണ്ടെന്നാണ് ഇടുക്കി രൂപതയുടെ വിമര്ശനം.
ഇടുക്കി: പരിസ്ഥിതി ലോല ഉത്തരവില് സംസ്ഥാന സര്ക്കാരിനെതിരെ ഇടുക്കി രൂപത. സംസ്ഥാന സര്ക്കാര് കൂടുതല് ജാഗ്രത പുലര്ത്തണമെന്ന് ഇടുക്കി രൂപതാദ്ധ്യക്ഷന് മാര് ജോണ് നെല്ലിക്കുന്നേല് ഏഷ്യാനെറ്റ് ന്യൂസിനോട് പറഞ്ഞു. നിലവിലെ ബഹളങ്ങള്ക്കിടയില് പരിസ്ഥിതി ലോല പ്രശ്നം മറന്നുപോകുന്നു. ഇതിന് പ്രതിപക്ഷത്തിനും പങ്കുണ്ടെന്നാണ് ഇടുക്കി രൂപതയുടെ വിമര്ശനം.
സംസ്ഥാന സര്ക്കാര് ഇടപെട്ടില്ലെങ്കില് കസ്തൂരി രംഗന് മാതൃകയില് വീണ്ടും സമരം തുടങ്ങേണ്ടിവരും. ഇതിന് രൂപതെയ പ്രേരിപ്പിക്കരുതെന്നും ഇടുക്കി രൂപതാദ്ധ്യക്ഷന് പറഞ്ഞു. ഇനി പിഴവുണ്ടാകാതിരിക്കാന് പ്രത്യേക ശ്രദ്ധ സംസ്ഥാന സര്ക്കാരില് നിന്നുണ്ടാകണം. സുപ്രീം കോടതിയില് നിയമപോരാട്ടം നടത്തണം. ഇവിടെയുള്ള ആശങ്ക കേന്ദ്ര പരിസ്ഥിതി മന്ത്രാലയത്തെ അറിയിക്കാന് തയാറാകണം. വിധി മാറ്റികിട്ടാനുള്ള പരിശ്രമം എല്ലാവരും ചേര്ന്ന് നടത്തണമെന്നും ഉത്തരവ് നിരവധി ജനങ്ങളെ ബാധിക്കുന്നുവെന്ന് ഇരുവിഭാഗവും ഗൗരവത്തോടെ മനസിലാക്കണമെന്നും അദ്ദേഹം പറഞ്ഞു.
Also Read: ബഫർ സോൺ ഉത്തരവിൽ പ്രതിഷേധം കത്തുന്നു; ഇന്ന് വയനാട്ടിൽ യുഡിഎഫ് ഹർത്താൽ
വിഷയത്തില് കേന്ദ്ര സര്ക്കാര് കുറച്ചുകൂടി ഗൗരവത്തില് ഇടപെടണമെന്ന് പറഞ്ഞ ജോണ് നെല്ലിക്കുന്നേല്, ഇതിനായി ബിജെപി നേതാക്കളും ശ്രമം നടത്തണമെന്നും വെറുമൊരു ഹര്ത്താല് നടത്തിയത് കൊണ്ടുമാത്രം പ്രശ്നം പരിഹരിക്കപെടുന്നില്ലെന്നും കൂട്ടിച്ചേര്ത്തു. നിരന്തരമായ ഇടപെടലാണ് ഇടുക്കി രൂപത ആഗ്രഹിക്കുന്നത്. എല്ലാ മതസാമൂദായിക നേതാക്കളുമായും ഒത്തു ചേര്ന്ന് സംയുക്തസമരം ആലോചിക്കുന്നു. ഇതിനായി സാമുദായിക നേതാക്കളെ യോജിപ്പിച്ച് പ്രത്യേക യോഗം വിളിക്കും.
ബഫർ സോൺ ഉത്തരവിൽ പ്രതിഷേധം കത്തുന്നു
സുപ്രീംകോടതി ബഫർ സോൺ ഉത്തരവിൽ പ്രതിഷേധിച്ച് ഇടുക്കി, വയനാട്, ജില്ലകളിലും മലപ്പുറം ജില്ലയുടെ മലയോര മേഖലകളിലും യുഡിഎഫ് ഹര്ത്താൽ ആചരിക്കുകയാണ്. സുപ്രീംകോടതി വിധി കർഷകർക്ക് എതിരാകാതിരിക്കാൻ സർവകക്ഷിയോഗം വിളിക്കണമെന്ന് യുഡിഎഫ് ആവശ്യപ്പെടുന്നുണ്ട്. ബഫർ സോൺ പരിധിയിൽ നിന്ന് ജനവാസ മേഖലകളെ പൂർണമായി ഒഴിവാക്കണമെന്നാണ് ആവശ്യം.
Also Read: ബഫര് സോണ് വിഷയം: സര്ക്കാര് കര്ഷകര്ക്കൊപ്പമെന്ന് കത്തോലിക്കാ സഭയ്ക്ക് മുഖ്യമന്ത്രിയുടെ ഉറപ്പ്
ബഫർ സോൺ, നിയമപരമായി നേരിടാൻ കേരളം
വന്യജീവി സങ്കേതങ്ങളുടെയും ദേശീയ ഉദ്യാനങ്ങളുടെയും ഒരു കിലോമീറ്റര് ചുറ്റളവില് പരിസ്ഥിതി ലോലമേഖലയാക്കണമെന്നും ഇവിടങ്ങളിലെ ഖനന-നിര്മാണ പ്രവര്ത്തനങ്ങള് നിയന്ത്രിക്കണമെന്നുമാണ് ഇക്കഴിഞ്ഞ വെളളിയാഴ്ച സുപ്രീം കോടതി ഉത്തരവിട്ടത്. ഈ മേഖലകളിലെ കെട്ടിടങ്ങളുടെയും നിര്മാണ പ്രവര്ത്തനങ്ങളുടെയും റിപ്പോര്ട്ട് മൂന്ന് മാസത്തിനകം സമര്പ്പിക്കണമെന്നും കോടതി നിര്ദ്ദേശിച്ചിട്ടുണ്ട്. എന്നാല് ജനങ്ങള് തിങ്ങിപ്പാര്ക്കുന്ന മേഖലകള് പരിസ്ഥിതി ലോലമാക്കാനുളള ഉത്തരവിനെ നിയമപരമായി നേരിടാനാണ് കേരളത്തിന്റെ തീരുമാനം. ജനങ്ങളുടെ താല്പര്യം മുന്നിര്ത്തി സുപ്രീം കോടതിയെയും കേന്ദ്ര സര്ക്കാരിനെയും സമീപിക്കുമെന്ന് മുഖ്യമന്ത്രി പിണറായി വിജയന് ഇതിനോടകം വ്യക്തമാക്കിയിട്ടുണ്ട്.