ട്രാഫിക് പൊലീസിന് നേർക്ക് സിഐയുടെ തെറിയഭിഷേകം; പരാതി, ഇരുവരോടും സ്റ്റേഷനിലെത്താൻ നിർദേശിച്ച് ഡിവൈഎസ്പി

ആറ്റിങ്ങൽ കോടതിയിൽ പോയി തിരികെ വരുന്നവഴി  വെഞ്ഞാറമൂട് എത്തിയപ്പോൾ ട്രാഫിക് കുരുക്കിൽ പെട്ടതാണ് സി ഐയെ ചൊടിപ്പിച്ചത്. 

തിരുവനന്തപുരം: തിരുവനന്തപുരത്ത് വെഞ്ഞാറമൂട് ട്രാഫിക് ഡ്യൂട്ടിയിൽ ഉണ്ടായിരുന്ന പൊലീസ് ഉദ്യോഗസ്ഥന് നേരെ തെറിയഭിഷേകവും ശകാരവും നടത്തി കാറിൽ എത്തിയ സിഐ. വെഞ്ഞാറമൂട് സ്റ്റേഷനിലെ സിവിൽ പോലീസ് ഓഫീസർ അശോകന് നേരെയാണ് സ്റ്റേറ്റ് ക്രൈം റെക്കോർഡ് ബ്യൂറോയിലെ സിഐ യഹിയ ചീത്ത വിളിച്ചത്. ആറ്റിങ്ങൽ കോടതിയിൽ പോയി തിരികെ വരുന്നവഴി  വെഞ്ഞാറമൂട് എത്തിയപ്പോൾ ട്രാഫിക് കുരുക്കിൽ പെട്ടതാണ് സി ഐയെ ചൊടിപ്പിച്ചത്. 

പൊലീസ് ഉദ്യോഗസ്ഥൻ ഉടൻ തന്നെ വെഞ്ഞാറമൂട് പോലീസിൽ റിപ്പോർട്ട് നൽകി. തുടർന്ന് പൊലീസ് ഉദ്യോഗസ്ഥന്റെ പരാതിയിൽ ജി ഡി യിൽ പരാതി രജിസ്റ്റർ ചെയ്തു. വെഞ്ഞാറമൂട് സിഐ ആറ്റിങ്ങൽ ഡിവൈഎസ്പിയെ വിവരം അറിയിച്ചതിനെ തുടർന്ന് നാളെ ഡിവൈഎസ്പി ഓഫീസിൽ ഹാജരാകാൻ ഡിവൈഎസ്പി ഇരുവർക്കും നിർദ്ദേശം നൽകിയിട്ടുണ്ട്. എന്നാൽ ട്രാഫിക്കിൽ നിൽക്കുന്ന പോലീസ് ഉദ്യോഗസ്ഥൻ തന്നെ തെറി വിളിച്ചതായി ചൂണ്ടിക്കാട്ടി സി ഐ യഹിയയും വെഞ്ഞാറമൂട് പോലീസിൽ പരാതി നൽകിയിരിക്കുകയാണ്.