ജനവിരുദ്ധ സര്ക്കാരിനെതിരെ പേരാടാനും മുന്നോട്ട് കുതിക്കാനുമുള്ള ഇന്ധനം: പുതുപ്പള്ളിയിലെ വിജയത്തിൽ വിഡി സതീശൻ
Synopsis
ഏത് കേഡര് പാര്ട്ടിയെയും വെല്ലുന്ന രീതിയില് തെരഞ്ഞെടുപ്പ് പ്രവര്ത്തനം നടത്താനും വിജയത്തിലെത്തിക്കാനുമുള്ള സംഘടനാശേഷി യുഡിഎഫിനുണ്ടെന്ന് തൃക്കാക്കരയ്ക്ക് പിന്നാലെ പുതുപ്പള്ളിയിലും നമ്മൾ തെളിയിച്ചെന്നും വിഡി സതീശൻ യുഡിഎഫ് പ്രവർത്തകരോട് തന്റെ ഫെയ്സ് ബുക്ക് പോസ്റ്റിലൂടെ അദ്ദേഹം പറഞ്ഞു.
കോട്ടയം: ജനവിരുദ്ധ സര്ക്കാരിനെതിരെ പേരാടാനും മുന്നോട്ട് കുതിക്കാനുമുള്ള ഇന്ധനമാണ് ഉമ്മന് ചാണ്ടിയുടെ പുതുപ്പള്ളി യുഡിഎഫിന് നൽകിയതെന്ന് പ്രതിപക്ഷ നേതാവ് വിഡി സതീശൻ. ഏത് കേഡര് പാര്ട്ടിയെയും വെല്ലുന്ന രീതിയില് തെരഞ്ഞെടുപ്പ് പ്രവര്ത്തനം നടത്താനും വിജയത്തിലെത്തിക്കാനുമുള്ള സംഘടനാശേഷി യുഡിഎഫിനുണ്ടെന്ന് തൃക്കാക്കരയ്ക്ക് പിന്നാലെ പുതുപ്പള്ളിയിലും നമ്മൾ തെളിയിച്ചെന്നും വിഡി സതീശൻ യുഡിഎഫ് പ്രവർത്തകരോട് ഫെയ്ശ്ബുക്ക് പോസ്റ്റിലൂടെ പറഞ്ഞു. സ്നേഹം കൊണ്ട് ലോകം ജയിച്ച ഉമ്മന് ചാണ്ടിക്ക് പുതുപ്പള്ളി തിരിച്ച് നല്കിയ ആദരവാണ് യു.ഡി.എഫിന്റെ ചരിത്ര വിജയമെന്നും ജനവികാരം എത്രമാത്രം വലുതാണെന്ന് തെരഞ്ഞെടുപ്പ് ഫലം തെളിയിക്കുന്നുണ്ടെന്നും വിഡി സതീശൻ പറഞ്ഞു. വോട്ടു ചെയ്തത് പുതുപ്പള്ളിയാണെങ്കിലും ഫലത്തില് പ്രതിഫലിച്ചത് കേരളത്തിന്റെ പൊതുമനസാണ്ണെന്നും അദ്ദേഹം അഭിപ്രായപ്പെട്ടു.
വിജയത്തിന്റെ ക്രെഡിറ്റ് ടീം യുഡിഎഫിനുള്ളതാണെന്നും രാപ്പകല് വ്യത്യാസമില്ലാതെ പ്രവര്ത്തകരും നേതാക്കളും ഒരേ മനസോടെ പ്രവര്ത്തിച്ചെന്നും പോരായ്മകള് തിരിച്ചറിഞ്ഞെന്നും അത് തിരുത്തി സംഘടനാ സംവിധാനത്തെ കുറ്റമറ്റരീതിയില് എണ്ണയിട്ട യന്ത്രം പോലെ പ്രവര്ത്തിപ്പിക്കാനായെന്നും അദ്ദേഹം പറഞ്ഞു. കൂട്ടായ്മയുടെയും സംഘബോധത്തിന്റെയും സ്നേഹത്തിന്റെയും വിജയമാണ് പുതുപ്പള്ളിയില് കണ്ടതെന്നും ഒറ്റക്കെട്ടായി നിന്ന് പോരാടിയാല് ലോക്സഭ തെരഞ്ഞെടുപ്പിലും തദ്ദേശ തെരഞ്ഞെടുപ്പിലും നമുക്ക് വിജയം ആവര്ത്തിക്കാമെന്നും അദ്ദേഹം കൂട്ടിചേർത്തു.
Read More: പുതുപ്പള്ളി ഫലം പുറത്ത് വന്നതിന് പിന്നാലെ ചാണ്ടി ഉമ്മന്റെ സത്യ പ്രതിജ്ഞ തിയ്യതി പ്രഖ്യാപിച്ചു
ജനങ്ങള് ആഗ്രഹിക്കുന്നതു പോലെ ഈ ജനവിരുദ്ധ സര്ക്കാരിനെ 2026-ല് താഴെയിറക്കാമെന്നും അദ്ദേഹം പറഞ്ഞു. പുതുപ്പള്ളിയിലെ വോട്ടര്മാര്ക്കും കേരള ജനതയ്ക്കും യു.ഡി.എഫ് പ്രവര്ത്തകര്ക്കും നേതാക്കള്ക്കും നന്ദിയും അറിയിച്ചാണ് വിഡി സതീശൻ തന്റെ ഫെയ്സ്ബുക്ക് പോസ്റ്റ് അവസാനിപ്പിക്കുന്നത്.