Pinarayi Vijayan : 'നിഷ്കളങ്ക ഭക്തിയുടെ നിറകുടം'; മുഖ്യമന്ത്രിയെ വാഴ്ത്തി വ്യവസായ വകുപ്പിന്‍റെ അനൗൺസ്മെന്‍റ്

മുഖ്യമന്ത്രി ഉദ്ഘാടകനായ കേരള സർക്കാർ ഏറ്റെടുത്ത് നവീകരിച്ച കെൽ  ഇലക്ട്രിക്കൽ മെഷീൻസ് ലിമിറ്റഡിന്റെ ഉദ്ഘാടന ചടങ്ങിലായിരുന്നു വിവാദമായ  അനൗണ്‍സ്‌മെന്റ്‌.  

കാസർകോഡ്: മുഖ്യമന്ത്രി പിണറായി വിജയനെ വാഴ്ത്തിയുള്ള വ്യവസായ വകുപ്പിന്‍റെ അനൗൺസ്മെന്‍റ് വീഡിയോ വൈറലാകുന്നു. കാസർകോഡ് വെച്ച് നടന്ന വ്യവസായ വകുപ്പിന്റെ പരിപാടിയിലാണ് പിണറായി വിജയനെ ( Pinarayi Vijayan) വാഴ്ത്തിക്കൊണ്ടുള്ള അനൗൺസ്മെന്റ് ഉണ്ടായത്.  'നിഷ്കളങ്ക ഭക്തിയുടെ നിറകുടം' എന്ന് വിശേഷിപ്പിച്ചുകൊണ്ടുള്ള അനൗണ്‍സ്‌മെന്റ് വീഡിയോ ആണ് സമൂഹമാധ്യമങ്ങളില്‍ ചര്‍ച്ചയായത്.

മുഖ്യമന്ത്രി ഉദ്ഘാടകനായ കേരള സർക്കാർ ഏറ്റെടുത്ത് നവീകരിച്ച കെൽ  ഇലക്ട്രിക്കൽ മെഷീൻസ് ലിമിറ്റഡിന്റെ ഉദ്ഘാടന ചടങ്ങിലായിരുന്നു ഈ അനൗണ്‍സ്‌മെന്റ്‌. 'നിഷ്കളങ്ക ഭക്തിയുടെ നിറകുടത്തിന് മാത്രമേ അന്തരംഗ ശ്രീകോവിലിലേക്ക് പരമപ്രകാശത്തെ ആനയിക്കാൻ കഴിയുമെന്ന സന്ദേശം ഉണർത്തിക്കൊണ്ട് മുഖ്യമന്ത്രി ദീപം തെളിയിക്കുന്നു' എന്നായിരുന്നു വൈറലായ അനൗൺസ്മെന്റ്. ഇതിനെതിരെ വ്യാപക വിമർശനങ്ങളാണ് സമൂഹ മാധ്യമങ്ങളിൽ അടക്കം ഉയരുന്നത്. 

വ്യവസായ മന്ത്രി പി രാജിവ് അടക്കം വേദിയിൽ ഉള്ളപ്പോഴായിരുന്നു മുഖ്യമന്ത്രിയെ വാഴ്ത്തി അനൌണ്‍സ്മെന്‍റ് വന്നത്. ഔദ്യോഗിക പരിപാടികളുടെ ചട്ടങ്ങള്‍ക്ക് വിരുദ്ധമായാണ് അനൗണ്‍സ്‌മെന്റ് നടത്തിയതെന്നും വിമര്‍ശനമുയര്‍ന്നിട്ടുണ്ട്. വ്യക്തി ആരാധനയുടെ ശൈലിയിലില്‍  ഇത്തരത്തിലുള്ള പരാമർശങ്ങൾ പാർട്ടിയുടെ പ്രഖ്യാപിത നയങ്ങൾക്കെതിരാണ്  എന്നാണ് സോഷ്യൽ മീഡിയയില്‍ ചിലര്‍ ചൂണ്ടിക്കാട്ടുന്നത്.