Malabar Cements MD : മലബാർ സിമന്‍റ്സ് എംഡി മുഹമ്മദാലി രാജി നല്‍കി; തൊഴിലാളി യൂണിയനുകളുടെ സമ്മര്‍ദമെന്ന് സൂചന

വ്യക്തിപരമായ കാരണങ്ങളാൽ രാജിവയ്ക്കുന്നു എന്നാണ് വിശദീകരണം. രാജി സ്വീകരിക്കുന്ന കാര്യത്തിൽ സർക്കാർ തീരുമാനമെടുത്തിട്ടില്ല. 

തിരുവനന്തപുരം: മലബാർ സിമന്‍റ്സ് (Malabar Cements) എം ഡി എം മുഹമ്മദാലി (M Mohamed Ali) വ്യവസായ വകുപ്പിന് രാജിക്കത്ത് നൽകി. മാർച്ച് 31 വരെയേ സ്ഥാനത്ത് ഉണ്ടാകു എന്നാണ് രാജിക്കത്തിൽ പറഞ്ഞിരിക്കുന്നത്. വ്യക്തിപരമായ കാരണങ്ങളാൽ രാജിവയ്ക്കുന്നു എന്നാണ് വിശദീകരണം. രാജി സ്വീകരിക്കുന്ന കാര്യത്തിൽ സർക്കാർ തീരുമാനമെടുത്തിട്ടില്ല. വ്യക്തിപരമായ കാരണത്താലാണ് രാജിയെന്ന് പറയുമ്പോഴും മലബാർ സിമന്‍റ്സിലെ തൊഴിലാളി യൂണിയനുകളുടെ സമ്മർദ്ദമാണ് രാജിക്ക് കാരണമെന്നാണ് സൂചന. തൊഴിലാളി പ്രശ്നങ്ങൾ ചർച്ച ചെയ്യാൻ വിസമ്മതിച്ചു എന്ന് കാണിച്ച് സിഐടിയു അടുത്തിടെ എംഡിയെ ഉപരോധിച്ചിരുന്നു. 2019 നവംബറിലായിരുന്നു മുഹമ്മദാലി മലബാർ സിമന്‍റ്സ് എം ഡി യായി ചുമതലയേറ്റത്. 

തൊഴിലാളി വിരുദ്ധ നിലപാടുകളും സ്ഥാപനത്തെ തകർക്കുന്ന നയങ്ങളുമാണ് മലബാർ സിമന്‍റസ് എം ഡി മുഹമ്മദാലി സ്വീകരിക്കുന്നത് എന്നാരോപിച്ച് ജനുവരിയില്‍ ജീവനക്കാര്‍ പ്രതിഷേധിച്ചിരുന്നു. ഭരണപക്ഷ തൊഴിലാളി സംഘടനയായ സിഐടിയു  പ്രവർത്തകരാണ് എം ഡി ക്കെതിരെ രംഗത്തുവന്നത്. ദിവസവേതനക്കാരുടെ തൊഴിൽദിനം 20  ൽ നിന്ന് 15 ആക്കി വെട്ടിക്കുറച്ചു. ശമ്പള വര്‍ധനവിന്‍റെ പ്രൊപ്പോസൽ തടഞ്ഞുവച്ചു എന്നിങ്ങനെ നിരവധി കാരണങ്ങള്‍ ഉന്നയിച്ചായിരുന്നു സിഐടിയു ജീവനക്കാർ എംഡിയെ ഉപരോധിച്ചത്. സ്വകാര്യ കമ്പനികളുമായി ചേര്‍ന്ന് മലബാർ സിമന്റ്സിനെ തകർക്കാൻ മാനേജിങ് ഡയറക്ടർ ശ്രമിക്കുന്നുവെന്നും തൊഴിലാളികൾ കുറ്റപ്പെടുത്തിയിരുന്നു.

• തൃശ്ശൂരിൽ യുവാവും യുവതിയും ഹോട്ടൽ മുറിയിൽ തൂങ്ങി മരിച്ചു

തൃശ്ശൂരിലെ ഹോട്ടൽ മുറിയിൽ യുവാവിനെയും യുവതിയെയും മരിച്ച നിലയിൽ കണ്ടെത്തി. തൃശൂർ ഒളരിക്കര സ്വദേശി റിജോ(26) , കാര്യാട്ടുക്കര സ്വദേശി സംഗീത (26) എന്നിവരെയാണ് മരിച്ച നിലയിൽ കണ്ടെത്തിയത്. തൂങ്ങി മരിച്ച നിലയിലാണ് ഇവരെ കണ്ടെത്തിയത്. സംഗീതയുടെ ഭർത്താവ് സുനിലിന്റെ കാറ്ററിംഗ് സ്ഥാപനത്തിലെ ജീവനക്കാരനാണ് റിജോ. വ്യാഴാഴ്ച ഉച്ചയ്ക്കാണ് ഇരുവരും ഹോട്ടലിൽ മുറിയെടുത്തത്. തൃശ്ശൂർ കെഎസ്ആർടിസി സ്റ്റാൻഡിന് സമീപത്തുള്ള ഹോട്ടലിലാണ് സംഭവം.

രാത്രി 11.30ന്റെ ട്രെയിനിന് പോകണമെന്നാണ് ഇവർ ഹോട്ടൽ അധികൃതരോട് പറഞ്ഞത്. എന്നാൽ, രാത്രി ഈ സമയം കഴിഞ്ഞും ഇവർ മുറിയിൽ നിന്ന് ഇറങ്ങിയില്ല. ഇതിനിടെ ഭർത്താവ് അന്വേഷിച്ച് വരികയും ചെയ്തു. തുടർന്ന് ഹോട്ടൽ ജീവനക്കാർ വാതിൽ തള്ളി തുറന്നപ്പോഴാണ് ഇവരെ മരിച്ച നിലയിൽ കണ്ടെത്തിയത്. സംഗീതയെ കാണാനില്ലെന്ന് ഭർത്താവ് കഴിഞ്ഞ ദിവസം പൊലീസിൽ പരാതി നൽകിയിരുന്നു. സുനിലിനും സംഗീതയ്ക്കും മൂന്ന് മക്കളാണ്. റിജോ അവിവാഹിതനാണ്.