Malayalam News Highlights: എൻസിഇആർടി പുസ്തക വിവാദം തണുപ്പിക്കാൻ കേന്ദ്രം

കർണ്ണാടകയിൽ ചിക്കബെല്ലാപുരയിൽ  വാഹനാപകടത്തിൽ 12 പേർ മരിച്ചു. വ്യാഴാഴ്ച പുലർച്ചെ ഏഴുമണിയോടെ ചിക്കബെല്ലാപുര ട്രാഫിക്ക് പൊലീസ് സ്റ്റേഷന്സമീപത്തായായിരുന്നു അപകടം. നിർത്തിയിട്ട ടാങ്കർ ലോറിയിലേക്ക് ടാറ്റാ സുമോ കാർ പാഞ്ഞുകയറിയാണ് അപകടം.

ഭാരത് വിവാദത്തിൽ പ്രതികരിച്ച് സീതാറാം യെച്ചൂരി. ഭരണ ഘടനയിൽ ഉള്ളതാണ് കുട്ടികളെ പഠിപ്പിക്കേണ്ടത്. തെരഞ്ഞെടുപ്പ് മുന്നിൽ കണ്ടുള്ള നീക്കം മാത്രമാണ് ഇപ്പോൾ നടത്തുന്നത്.പ്രതിപക്ഷ കൂട്ടായ്മയുടെ പേര് ഇന്ത്യ എന്നാക്കിയതും ഇപ്പോഴത്തെ നീക്കങ്ങൾക്ക് പിന്നിലുണ്ടാകാമെന്നും യെച്ചൂരി.

രാജസ്ഥാനിൽ കോൺഗ്രസുമായി ബന്ധപ്പെട്ട കേന്ദ്രങ്ങളിൽ ഇഡി റെയ്ഡ്. ചോദ്യപ്പേപ്പർ ചോർച്ചയുമായി ബന്ധപ്പെട്ട കള്ളപ്പണക്കേസിൽ രാജസ്ഥാൻ കോൺഗ്രസ് സംസ്ഥാന അധ്യക്ഷന്റെ വസതിയിൽ എൻഫോഴ്സ്മെന്റ് ഡയറക്ടറേറ്റ് റെയ്ഡ് നടത്തുകയാണ്. പിസിസി അധ്യക്ഷൻ ഗോവിന്ദ് സിങ് ദോതാസ്റയുടെ വസതിയിലാണ് റെയ്ഡ് നടക്കുന്നത്. സ്വതന്ത്ര എംഎൽഎ ഓം പ്രകാശ് ഹുഡ്‌ലയുടെ വസതിയിലും റെയ്ഡ് പുരോഗമിക്കുകയാണ്. ചോദ്യപേപ്പർ ചോർച്ചയുമായി ബന്ധപ്പെട്ടാണ് പരിശോധന നടക്കുന്നതെന്ന് ഇഡി വ്യക്തമാക്കി. രാജസ്ഥാൻ മുഖ്യമന്ത്രി അശോക് ഗെലോട്ടിന്റെ മകൻ വൈഭവ് ഗെഹ്ലോട്ടിനും ഇഡി സമൻസ് അയച്ചു. ഒക്ടോബർ 27 ന് ഹാജരാകണമെന്നാണ് നിർദ്ദേശം.

സോളാർ പീഡനക്കേസില്‍ പരാതിക്കാരി നൽകിയ ഹർജി ഹൈക്കോടതി ഫയലിൽ സ്വീകരിച്ചു. കോൺഗ്രസ് നേതാവ് കെ സി വേണുഗോപാലിനെതിരെ തെളിവില്ലെന്ന സിബിഐ റിപ്പോർട്ട് അംഗീകരിച്ച കീഴ്ക്കോടതി ഉത്തരവിനെതിരെയാണ് പരാതിക്കാരി ഹർജി നൽകിയത്. കെ സി വേണുഗോപാലിന് കോടതി നോട്ടീസ് അയച്ചു.

ഇസ്രയേലിന്റെ സൈനിക ടാങ്കുകൾ വടക്കൻ ഗാസയിലേക്ക് കടന്നുകയറി. ഇന്നലെ രാത്രിയാണ് നിരവധി യുദ്ധ ടാങ്കുകൾ ഗാസ അതിർത്തിയിൽ കയറി ഹമാസ് കേന്ദ്രങ്ങൾ ആക്രമിച്ച് തിരിച്ചെത്തിയതെന്ന് ഇസ്രയേൽ പറയുന്നു. വ്യോമാക്രമണം നടത്തി വന്ന ഇസ്രയേൽ കഴിഞ്ഞ ദിവസങ്ങളിൽ കരമാർഗ്ഗം ആക്രമണം നടത്തുമെന്ന് മുന്നറിയിപ്പ് നൽകിയിരുന്നു. ഗാസയില്‍ കരയുദ്ധത്തിന് തയ്യാറെടുക്കുകയാണെന്ന് ഇസ്രായേല്‍ പ്രധാനമന്ത്രി ഇന്നലെ ഇസ്രയേൽ ജനതയോട് പറഞ്ഞിരുന്നു.

സംസ്ഥാനത്ത് കെഎസ്ഇബി വൈദ്യുതിക്ക് ഈടാക്കി വന്നിരുന്ന സർചാർജ് അടുത്ത മാസവും തുടരാൻ തീരുമാനം. വൈദ്യുതി നിരക്ക് കുത്തനെ ഉയർത്തുന്നതിന് പകരമാണ് സർചാർജ് ഏർപ്പെടുത്തിയത്. ഏപ്രിൽ മാസത്തിൽ യൂണിറ്റിന് 9 പൈസ സർചാർജ് ഈടാക്കിയാണ് കെഎസ്ഇബി വരുമാന നഷ്ടം നികത്താൻ ശ്രമം തുടങ്ങിയത്. പിന്നീടിത് 19 പൈസയാക്കി ഉയർത്തുകയായിരുന്നു.

കാസര്‍കോട് എംഎല്‍എ എന്‍എ നെല്ലിക്കുന്നിനെ പറ്റിച്ച് ഓണ്‍ലൈന്‍ തട്ടിപ്പ് സംഘം. പണം തട്ടിയത് ഓര്‍ഡര്‍ ചെയ്യാത്ത ഗുണനിലവാരം കുറഞ്ഞ ബെഡ് കവര്‍ എംഎൽഎയുടെ വീട്ടിലേക്ക് അയച്ച്.  സംഭവത്തിൽ ജില്ലാ പൊലീസ് മേധാവിക്ക് എംഎല്‍എ പരാതി നല്‍കി. 

മലപ്പുറത്ത് ഈ മാസം 18 പേർക്ക് കുഷ്ഠരോഗം സ്ഥിരീകരിച്ചതായി ജില്ല മെഡിക്കൽ ഓഫീസർ.രോഗബാധ സ്ഥിരീകരിച്ചത്, മൂന്ന് കുട്ടികൾക്കും 15 മുതിർന്നവർക്കും. ഈ വർഷം ഒമ്പത് കുട്ടികളും 38 മുതിർന്ന വ്യക്തികളും രോഗബാധിതരായി. എല്ലാവരും ചികിത്സയിലാണെന്നും ആശങ്ക വേണ്ടെന്നും ആരോഗ്യവകുപ്പ്.

പത്തനംതിട്ട നെടുമണ്ണിലെ മധ്യവസ്കന്‍റെ കൊലപാതകത്തിൽ സഹോദരനും സുഹൃത്തും അറസ്റ്റിൽ. മദ്യലഹരിയിൽ ഇവരുടെ മർദ്ദനത്തെ തുടർന്നാണ് അനീഷ് ദത്തൻ മരിച്ചതെന്ന് വ്യക്തമായതോടെയാണ് അറസ്റ്റു ചെയ്തത്. ചൊവ്വാഴ്ച പുലർച്ചെയാണ് 52 കാരൻ അനീഷ് ദത്തനെ വീടിനുള്ളിൽ മരിച്ച നിലയിൽ കണ്ടെത്തിയത്. അനീഷും സഹോദരൻ മനോജും സഹൃത്ത് ബിനു മദ്യപിച്ച് വഴക്കും അടിപടിയും ഉണ്ടായെന്ന് അമ്മ മൊഴി നൽകിയിരുന്നു. ഇതേതുടർന്ന് നടത്തിയ അന്വേഷണത്തിലാണ് കൊലപാതകം തെളിഞ്ഞത്. പോസ്റ്റ്മോർട്ടത്തിൽ തലയ്ക്ക് പിന്നിലേറ്റ ക്ഷതമാണ് മരണകാരമെന്ന് വ്യക്തമായി. മദ്യപിച്ച ശേഷം അനീഷ് ദത്തനെ, മനോജും ബിനുവും ചേർന്ന് മർദ്ദിച്ചതായി പൊലീസ് പറയുന്നു. ഹൃദ്രോഗിയാണ് മരിച്ച അനീഷ്. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.

പത്തനംതിട്ട വടശ്ശേരിക്കരയിലെ സംഗീത് സജിയുടെ ദുരൂഹമരണത്തിൽ അന്വേഷണം ഊർജ്ജിതമാക്കണമെന്നാവശ്യപ്പെട്ട് ജില്ലാ കളക്ടർക്കും എസ്പിക്കും കുടുംബം പരാതി നൽകി. ശാസ്ത്രീയ പരിശോധനയുടെ ഭാഗമായി പോസ്റ്റ്മോർട്ടം നടത്തിയ കോട്ടയം മെഡിക്കൽ കോളേജിലെ പൊലീസ് സർജ്ജൻ നേരിട്ടെത്തി സംഗീതിനെ കാണാതായ സ്ഥലത്ത് പരിശോധന നടത്തി.

നിപ ഭീതിയൊഴിഞ്ഞിട്ടും കരിപ്പൂർ വിമാനത്താവളം വഴിയുളള പച്ചക്കറി കയറ്റുമതിക്കുള്ള നിയന്ത്രണം നീക്കിയില്ല. നോ നിപ സർട്ടിഫിക്കറ്റ് അനുവദിക്കാതെ ആരോഗ്യവകുപ്പ്. പച്ചക്കറി കയറ്റുമതിക്ക് മറ്റ് വിമാനത്താവളങ്ങളെ ആശ്രയിക്കേണ്ട അവസ്ഥയിൽ വ്യാപാരികൾ.

നെല്ല് സംഭരണത്തിലെ പാളിച്ചയിൽ മന്ത്രി കെ കൃഷ്ണൻകുട്ടിക്കെതിരെ സിപിഎം അനുകൂല കർഷക സംഘടന. 100 കിലോ നെല്ലിന് 68 ശതമാനം അരി കിട്ടുമെന്ന മന്ത്രിയുടെ നിലപാട് ബുദ്ധിമുട്ടിലാക്കുന്നത് കർഷകരെയാണെന്നും വിമർശനം.

നെല്ല് സംഭരണം സഹകരണ സംഘങ്ങളെ എൽപിക്കാൻ സർക്കാർ.സംഭരിച്ച നെല്ല് മില്ലുകളിൽ കുത്തി അരിയാക്കി സപ്ലൈകോയ്ക്ക് കൈമാറും.സഹകരണ സംഘവും സപ്ലൈകോയും ചേർന്നുള്ള പുതിയ പദ്ധതി മന്ത്രിസഭ തത്വത്തിൽ അംഗീകരിച്ചു. സംഭരിക്കുന്ന നെല്ലിന്റെ വില സംഘങ്ങൾ ഉടൻ തന്നെ കർഷകർക്ക് നൽകും. സംഘങ്ങൾ മില്ലുകൾ വാടകക്ക് എടുത്താകും നെല്ല് അരിയാക്കുക. അരിയുടെ വില സപ്ലൈകോപിന്നീട് സംഘങ്ങൾക്ക് കൈമാറും.പദ്ധതി സംസ്ഥാന വ്യാപകമായി നടപ്പാക്കാൻ ആണ് ധാരണ. സംഘങ്ങൾ സജീവമല്ലാത്ത സ്ഥലങ്ങളിൽ സപ്ളൈകോ തന്നെ സംഭരണം നടത്തും. അന്തിമ തീരുമാനത്തിനായി ഇന്ന് മന്ത്രിസഭാ ഉപസമിതി ചേരും

മലയാളി മാധ്യമപ്രവർത്തക സൗമ്യ വിശ്വനാഥൻ്റെ കൊലപാതക കേസിൽ പ്രതികളുടെ ശിക്ഷ വിധിയിൻമേലുളള വാദം ഇന്ന് നടക്കും. ദില്ലി സാകേത് വിചാരണ കോടതിയാണ് കേസ് പരിഗണിക്കുക. കേസിൽ അഞ്ച് പ്രതികൾ കുറ്റക്കാരാണെന്ന് കോടതി വിധിച്ചിരുന്നു. 2008 ലാണ് ഹെഡ് ലൈൻസ് ടുഡെ ചാനലിലെ ജോലി കഴിഞ്ഞ് വീട്ടിലേക്ക് മടങ്ങിയ സൗമ്യ വിശ്വനാഥനെ കവർച്ച സംഘം വെടിവെച്ച് കൊലപ്പെടുത്തിയത്. കേസിലെ അഞ്ച് പ്രതികളിൽ ഒരാൾ ഒഴികെയുള്ളവർക്ക് കൊലക്കുറ്റം കോടതി ശരിവച്ചിരുന്നു. അഞ്ച് പേർക്കെതിരെയും മക്കോക്ക നിലനിലനിൽക്കുമെന്നും കോടതി വ്യക്തമാക്കിയിട്ടുണ്ട്

സ്കൂൾ ഉച്ചഭക്ഷണ പദ്ധതി കുടിശ്ശികയുമായി ബന്ധപ്പെട്ട ഹർജികൾഹൈക്കോടതി ഇന്ന് വീണ്ടും പരിഗണിക്കും. പദ്ധതി നടപ്പാക്കിയതിലൂടെ പ്രധാനാധ്യാപകർക്ക് ലഭിക്കാനുള്ള ലക്ഷങ്ങളുടെ കുടിശിക ഉടൻ നൽകണമെന്നും തുക മുൻകൂർ നൽകണമെന്നുമാവശ്യപ്പെട്ടുള്ള ഹർജികളാണ് ഹൈക്കോടതിയുടെ പരിഗണിക്കുക. അധ്യാപക സംഘടനയായ കെ.പി.എസ്.ടി.എ അടക്കമുള്ള സംഘടനകളാണ് കോടതിയെ സമീപിച്ചത്. നിലവിൽ നിശ്ചയിച്ചിട്ടുള്ള തുകയിൽ കൂടുതൽ ചെലവ് വന്നാൽ ആര് വഹിക്കുമെന്നതിൽ വിശദീകരണം നൽകാൻ സർക്കാരിനോട് കോടതി ആവശ്യപ്പെട്ടിട്ടുണ്ട്. കേന്ദ്രഫണ്ട് ലഭിക്കാത്തതാണ് കുടിശ്ശിക വരാൻ കാരണമെന്നായിരുന്നു നേരത്തെ സർക്കാർ അറിയിച്ചത്. എന്നാൽ സംസ്ഥാന സർക്കാരിന് ഒഴിഞ്ഞു മാറാനാകില്ലെന്ന് നിലപാടെടുത്ത കോടതി കുടിശികയ്ക്ക് പലിശ അടക്കം നൽകേണ്ടി വരുമെന്നും വാക്കാൽ മുന്നറിയിപ്പ് നൽകിയിരുന്നു

ഇന്ത്യയുടെ പേര് 'ഭാരതം' എന്നാക്കി മാറ്റുന്നതിനെ കർണാടക സർക്കാർ അനുകൂലിക്കില്ലെന്ന് ഉപമുഖ്യമന്ത്രി ഡി കെ ശിവകുമാർ. എൻസിആർടിയെ ഉപയോഗിച്ച് ചരിത്രം മാറ്റി എഴുതാൻ ആണ് കേന്ദ്രസർക്കാർ ശ്രമിക്കുന്നത്. ഇന്ത്യാ വിരുദ്ധ, ജന വിരുദ്ധ നിലപാട് എടുത്ത ഈ സർക്കാരിന്റെ തീരുമാനങ്ങൾ ജനം അംഗീകരിക്കില്ലെന്നും ഡി കെ ശിവകുമാർ.

സിപിഎം പൊളിറ്റ്ബ്യൂറോ യോഗം ഇന്ന് ദില്ലിയില്‍ ചേരും. നാളെ തുടങ്ങുന്ന കേന്ദ്ര കമ്മിറ്റി യോഗത്തിന് മുന്നോടിയായാണ് പിബി ചേരുന്നത്. അഞ്ച് സംസ്ഥാനങ്ങളിലെ നിയമസഭ തെരഞ്ഞെടുപ്പ് സംബന്ധിച്ച് യോഗം ചർച്ച ചെയ്യും. സീറ്റ് ധാരണകള്‍ അടക്കമുള്ള വിഷയങ്ങളും ചർച്ചക്ക് വന്നേക്കും.
നാളെ നടക്കുന്ന കേന്ദ്ര കമ്മിറ്റി യോഗത്തില്‍ ഇന്ത്യ സഖ്യത്തിന്‍റെ ഏകോപന സമിതിയില്‍ അംഗമാകേണ്ടെന്ന പിബി തീരുമാനം റിപ്പോര്‍ട്ട് ചെയ്യും. മൂന്ന് ദിവസത്തേക്ക് ചേരുന്ന കേന്ദ്ര കമ്മിറ്റി യോഗത്തില്‍ ഇത് അടക്കമുള്ള വിഷയത്തില്‍ വിശദമായ ചർച്ച നടക്കും. ഏകോപന സമിതിയിൽ അംഗമാകേണ്ടന്ന തീരുമാനത്തിന് പിന്നാലെ കോൺഗ്രസ് ഉൾപ്പെടെ ഉയർത്തിയ വിമർശനങ്ങളും പിബി, സിസി യോഗത്തിൽ ചർച്ചയാകാൻ ഇടയുണ്ട്

സംസ്ഥാനത്ത് ഇന്നും ഒറ്റപ്പെട്ടയിടങ്ങളിൽ ശക്തമായ മഴയ്ക്ക് സാധ്യത. മലയോര മേഖലകളിലാണ് കൂടുതൽ മഴ കിട്ടിയേക്കും. ഒരു ജില്ലയിലും പ്രത്യേക മഴ മുന്നറിയിപ്പില്ലെങ്കിലും കഴിഞ്ഞ ദിവസങ്ങളിലേതിന് സമാനമായി ഉച്ചയ്ക്ക് ശേഷം ഇടിയോട് കൂടി മഴ കിട്ടിയേക്കും. ഇടിമിന്നൽ ജാഗ്രത കർശനമായി പാലിക്കണം. കേരള തീരത്ത് മത്സ്യബന്ധനത്തിന് വിലക്കില്ല. എന്നാൽ ഉയർന്ന തിരമാലകൾക്ക് സാധ്യതയുണ്ട്

ഗാസയില്‍ കരയുദ്ധത്തിന് തയ്യാറെടുക്കുകയാണെന്ന് ഇസ്രായേല്‍ പ്രധാനമന്ത്രി ബെന്യാമിൻ നെതന്യാഹു. നടപടി എപ്പോള്‍, എങ്ങനെ ആയിരിക്കുമെന്ന് വെവെളിപ്പെടുത്താൻ നെതന്യാഹു തയ്യാറായില്ല. കരയുദ്ധം തുടങ്ങാൻ വൈകുന്നത് അമേരിക്കയുടെ ആവശ്യപ്രകാരമാണെന്നാണ് റിപ്പോര്‍ട്ട്. ഗാസയിലെ ഇസ്രയേൽ ആക്രമണത്തില്‍ മരണം 6600 ആയി. 24 മണിക്കൂറിനിടെ 756 പേരാണ് കൊല്ലപ്പെട്ടത്. ഇതില്‍ 344 കുട്ടികളും ഉള്‍പ്പെടുന്നു.

വിഴിഞ്ഞം തുറമുഖത്ത് എത്തിയ ആദ്യ കപ്പൽ ഇന്ന് മടങ്ങും. ഷെൻഹുവ 15 ഉച്ചയോടെ ചൈനയിലേക്ക് തിരിക്കും. രണ്ടാം കപ്പല്‍ ഷെൻഹുവ 29 അടുത്തമാസം ചൈനയില്‍ നിന്നെത്തും.

അനിശ്ചിതത്വങ്ങൾക്കൊടുവിൽ യുഎസ് ജനപ്രതിനിധി സഭക്ക് പുതിയ സ്പീക്കർ. റിപ്പബ്ലിക്കൻ പാര്‍ട്ടി അംഗം മൈക്ക് ജോൺസൺ സ്പീക്കറായി ചുമതലയേറ്റു. തെരഞ്ഞെടുക്കപ്പെട്ടത് 209 നെതിരെ 220 വോട്ടുകള്‍ക്ക്.

മുസ്ലീം ലീഗ് സംഘടിപ്പിക്കുന്ന പലസ്തീൻ ഐക്യദാർഢ്യ സമ്മേളനം ഇന്ന് കോഴിക്കോട്ട്. സമസ്തയ്ക്ക് ക്ഷണമില്ല. ശശി തരൂര്‍ മുഖ്യാതിഥി. വൻ ജനപങ്കാളിത്തം ഉറപ്പാക്കാൻ ലീഗ്. വൈകിട്ട് മൂന്ന് മുതല്‍ കോഴിക്കോട് കടപ്പുറത്താണ് റാലി. ശശിതരൂര്‍ മുഖ്യാതിഥിയാകും. ലീഗ് സംസ്ഥാന അധ്യക്ഷന്‍ പാണക്കാട് സാദിഖലി ശിഹാബ് തങ്ങളാണ് റാലി ഉദ്ഘാടനം ചെയ്യുക. സമസ്ത വിവാദങ്ങള്‍ക്ക് ശേഷം നടക്കുന്ന പ്രധാന പരിപാടി എന്ന നിലയില്‍ വന്‍ ജനപങ്കാളിത്തം ഉറപ്പ് വരുത്താനുള്ള ഒരുക്കത്തിലാണ് ലീഗ്. റാലിയോടനുബന്ധിച്ച് കോഴിക്കോട് നഗരത്തില്‍ ഉച്ചക്ക് ശേഷം ഗതാഗത നിയന്ത്രണം ഏര്‍പ്പെടുത്തിയിട്ടുണ്ട്.
 

പുതിയ അധ്യക്ഷനെ കണ്ടെത്താനുള്ള തെരഞ്ഞെടുപ്പ് പ്രവര്‍ത്തനം നീണ്ടതോടെ സംസ്ഥാനത്ത് യൂത്ത് കോണ്‍ഗ്രസ് സംഘടനാപ്രവര്‍ത്തനം നിര്‍ജീവമായി. നിലവിലെ ഭാരവാഹികള്‍ നേതൃപദവിയില്‍ നിന്ന് മാനസികമായി പിന്മാറിയതോടെ സര്‍ക്കാരിനെതിരായ സമരരംഗത്തും സംഘടനയില്ല. അടുത്ത മാസം അവസാനത്തോടെയെങ്കിലും പുതിയ ഭാരവാഹികളെ പ്രഖ്യാപിക്കാനാകുമെന്നാണ് പ്രതീക്ഷ

കൊച്ചി തുറമുഖത്ത് ട്രേഡ് യൂണിയനുകൾ തമ്മിലെ തർക്കം രൂക്ഷമായതോടെ പ്രതിസന്ധിയിലായി സംരംഭകൻ. പോർട്ട് ട്രസ്റ്റ് ഗോഡൗണിൽ നിന്ന് സാധനങ്ങൾ നീക്കം ചെയ്യാനാകാതെ പ്രതിദിനം 6500 രൂപ പിഴയൊടുക്കേണ്ട ഗതികേടിലാണ് കൊച്ചി സ്വദേശി ഷാജർ. തൊഴിൽ വിഭജനത്തെ ചൊല്ലി രണ്ടാഴ്ചയിലധികമായി തുടരുന്ന തർക്കത്തിൽ തൊഴിൽ വകുപ്പ് ഇടപെട്ടിട്ടും പരിഹാരം നീളുകയാണ്.

കോഴിക്കോട് കൈതപ്പൊയില്‍ കോടഞ്ചേരി അഗസ്ത്യമൂഴി റോഡിലൂടെയുള്ള ഗതാഗതത്തിന് രണ്ടു ദിവസത്തേക്ക് നിയന്ത്രണമേര്‍പ്പെടുത്തി. പൈപ്പ് പണി നടക്കുന്നതിനാലാണ് നിയന്ത്രണം. തിരുവന്പാടിയിൽ നിന്ന് കോടഞ്ചേരിക്കു പോകേണ്ട വാഹനങ്ങള്‍ ഇരുന്പകം പാലം വഴി പോകണമെന്ന് ഡിവിഷണല്‍ എക്സിക്യൂട്ടീവ് എഞ്ചിനീയര്‍ അറിയിച്ചു.
 

കണ്ണൂർ മാക്കുനി പൊന്ന്യംപാലം റോഡിൽ നാളെ മുതൽ ഡിസംബർ 26 വരെ വാഹന ഗതാഗതം പൂർണമായും നിരോധിച്ചു. നവീകരണ പ്രവർത്തി നടക്കുന്നതിനാലാണ് ഇത്. തലശ്ശേരി, കൂത്തുപറമ്പ് ഭാഗത്ത്‌ നിന്ന് വരുന്ന വാഹനങ്ങൾ വഴിതിരിച്ചുവിടും
 

ആലപ്പുഴ കരുമാടിയിൽ തകരാറിലായ പൈപ്പ് ലൈൻ്റെ അറ്റകുറ്റപ്പണി ആരംഭിച്ചു. ഇത് മൂലം ആലപ്പുഴ കുടിവെള്ള പദ്ധതിയിലൂടെയുള്ള ജല വിതരണം 2 ദിവസത്തേക്ക് തടസ്സപ്പെടും. കരുമാടി പാലത്തിന് വടക്കു ഭാഗത്തായാണ് ഒരാഴ്ച മുൻപ് പൈപ്പ് ലൈൻ പൊട്ടി കുടിവെള്ളം വൻ തോതിൽ പാഴായത്.

അയോധ്യ രാമക്ഷേത്ര നിർമ്മാണം പ്രചാരണവിഷയമാക്കാൻ ബിജെപി. തെരഞ്ഞെടുപ്പ് നടക്കുന്ന സംസ്ഥാനങ്ങളിലെ പാർട്ടി ഘടകങ്ങൾക്ക് കേന്ദ്രനേതൃത്വം നിർദേശം നൽകി. ജനുവരിയിൽ രണ്ടാഴ്ചത്തെ ആഘോഷം നടത്താൻ ആണ് ആലോചന.

ഷവർമയിൽ നിന്ന് ഭക്ഷ്യവിഷബാധ ഏറ്റെന്ന സംശയത്തിൽ മരിച്ച യുവാവിന്റെ പോസ്റ്റ്‌ മോർട്ടം ഇന്ന്. കോട്ടയം സ്വദേശി രാഹുൽ ഡി.നായരുടെ പോസ്റ്റ്‌ മോർട്ടം കളമശ്ശേരി മെഡിക്കൽ കോളേജിൽ നടക്കും. ഭക്ഷ്യ വിഷബാധ തന്നെയാണോ മരണകാരണം എന്ന് ഉറപ്പാക്കാൻ പോസ്റ്റ് മോർട്ടം റിപ്പോർട്ടും, അമൃത ആശുപത്രിയിൽ നിന്നുള്ള വിദഗ്ധ പരിശോധ റിപ്പോർട്ടും ലഭിക്കേണ്ടതുണ്ട്.

ലോകകപ്പിൽ ഇംഗ്ലണ്ടിന് ഇന്ന് ജീവന്മരണ പോരാട്ടം. ശ്രീലങ്കയ്ക്കെതിരായ മത്സരം ഉച്ചയ്ക്ക് രണ്ടിന് ബെംഗളൂരുവിൽ. ലഖ്നൗവിൽ ടീം ഇന്ത്യ പരിശീലനത്തിനിറങ്ങും. ഹാര്‍ദിക് പണ്ഡ്യക്ക് ഇന്ന് ശാരീരിക ക്ഷമത പരിശോധന.
 

ചോദ്യത്തിന് കോഴ ആരോപണത്തില്‍ ബിജെപി എംപി നിഷികാന്ത് ദുബൈ ഇന്ന് പാര്‍ലമെന്‍ററി എത്തിക്സ് കമ്മിറ്റി മുന്നില്‍ ഹാജരാകും. എല്ലാ തെളിവുകളും കൈമാറിയിട്ടുണ്ടെന്ന് ദുബെ. ഏത് അന്വേഷണവും നേരിടാൻ തയ്യാറെന്ന് മഹുവ മൊയ്ത്ര.

നിക്ഷേപകർക്ക് ചികിത്സയ്ക്ക് പോലും പണം നൽകാതെ കരുവന്നൂർ സഹകരണ ബാങ്ക്. ഏഴ് ലക്ഷം നിക്ഷേപമുണ്ടായിട്ടും ജീവിതച്ചെലവിനും ചികിത്സയ്ക്കും ആയി ബാങ്ക് കയറിയിറങ്ങി റജീന സെബാസ്റ്റ്യൻ. അടിയന്തരമായി അന്പതിനായിരം രൂപ ആവശ്യപ്പെട്ടപ്പോൾ പതിനായിരം നൽകാമെന്ന് അഡ്മിനിസ്ട്രേറ്റീവ് കമ്മിറ്റി.

ഗാസയില്‍ വ്യോമാക്രമണം തുടർന്ന് ഇസ്രയേൽ.24 മണിക്കൂറിനിടെ കൊല്ലപ്പെട്ടത് 756 പേര്‍. ആകെ മരണം 6600 കടന്നു. കരയുദ്ധത്തിന് തയ്യാറെടുക്കുകയാണെന്ന് നെതന്യാഹു. യുദ്ധ പരിഹാരത്തിൽ സമവായത്തിലെത്താതെ യുഎൻ രക്ഷാസമിതി.

ദിവസേന നൂറ് കണക്കിന് രോഗികള് എത്തുന്ന ആലപ്പുഴ മെഡിക്കല്‍ കോളേജ് ആശുപത്രിയിൽ സ്തനാര്‍ബുദ ചികില്‍സക്കുള്ള മാമോഗ്രാം , സിടി സ്കാന‍ര്‍ എന്നിവ പ്രവര്‍ത്തിക്കാതായിട്ട് ഒരു വര്‍ഷത്തിലധികമായി. ഹൃദ്രോഗ വിഭാഗത്തിലെ ഹാര്‍ട്ട് ലങ് യന്ത്രം അടുത്തിടെ പ്രവര്‍ത്തനം പുനരാരംഭിച്ചത് ഏറെ നാളത്തെ കാത്തിരിപ്പിന് ശേഷമാണ്. വന്‍തുക മുടക്കി സ്വകാര്യ ലാബുകളെ ആശ്രയിക്കേണ്ട ഗതികേടിലാണ് രോഗികള്‍.

ലൈഫ് പദ്ധതിയിലെ വീട് പണി മുടങ്ങിയതോടെ ടാർപ്പോളിൻ കെട്ടിയ കൂരയിൽ ദുരിതജീവിതം നയിക്കുകയാണ് പത്തനംതിട്ട സീതത്തോട് സ്വദേശി ഗോപാലകൃഷ്ണനും ഭാര്യയും. ആദ്യ ഗഡുവായി കിട്ടിയ പണംകൊണ്ട് തറകെട്ടിയെങ്കിലും ബാക്കി തുക ഇതുവരെ ലഭിക്കാത്തതാണ് വീട് പൂർത്തിയാക്കാൻ തടസ്സം. കൂലിപ്പണിക്കാരനായ ഗോപാലകൃഷ്ണന് കാൻസർ കൂടി പിടിപെട്ടതോടെ പട്ടിണിയുടെ വക്കിലാണ് കുടുംബം.