വയനാട്ടിലെ കർഷകരോട് വോട്ട് ബഹിഷ്കരിക്കാൻ ആഹ്വാനവുമായി മാവോയിസ്റ്റുകളുടെ കത്ത്

സർക്കാരിന്‍റെ കർഷക വിരുദ്ധ നിലപാടുകൾക്കെതിരെ വോട്ട് ബഹിഷ്കരിച്ചുകൊണ്ട് വേണം മറുപടി നൽകേണ്ടതെന്നാണ് മാവോയിസ്റ്റുകൾ കത്തിലൂടെ  ആഹ്വാനം ചെയ്യുന്നത്.  

വയനാട്: വരുന്ന ലോക്സഭാ തെരഞ്ഞെടുപ്പിൽ വയനാട്ടിലെ കർഷകർ വോട്ട് ബഹിഷ്കരിക്കാൻ തയ്യാറാകണമെന്ന് ആഹ്വാനം ചെയ്ത് മാവോയിസ്റ്റുകളുടെ കത്ത്. പണിയായുധങ്ങൾ സമരായുധങ്ങളാക്കാൻ കർഷകർ തയ്യാറാകണമെന്നും കത്തിൽ മാവോയിസ്റ്റുകൾ ആഹ്വാനം ചെയ്തു.

നാടുകാണി ദളം വക്താവ് അജിതയുടെ പേരിൽ വയനാട് പ്രസ് ക്ലബ്ബിലേക്ക് അയച്ച കത്തിലാണ് കർഷകരോട് വോട്ട് ബഹിഷ്കരിക്കാനും പണിയായുധങ്ങൾ സമരായുധമാക്കാൻ ആഹ്വാനം ചെയ്തിരിക്കുന്നത്. 

സർക്കാരിന്‍റെ കർഷക വിരുദ്ധ നിലപാടുകൾ കാരണമാണ് സംസ്ഥാനത്തെ കാർഷിക ആത്മഹത്യകൾ വർധിച്ചത്. സർക്കാരിന്‍റെ ഇത്തരം നിലപാടുകൾക്കെതിരെ വോട്ട് ബഹിഷ്കരിച്ചുകൊണ്ട് വേണം കർഷകർ മറുപടി നൽകേണ്ടതെന്നും മാവോയിസ്റ്റുകളുടെ കത്തിലൂടെ  ആഹ്വാനം ചെയ്യുന്നു. കത്തിന്‍റെ ഉറവിടത്തെക്കുറിച്ച് കൽപ്പറ്റ പൊലീസ് അന്വേഷണം തുടങ്ങി.