മണ്ഡലം മാറ്റം അഭ്യൂഹം: തുറന്നടിച്ച് മന്ത്രി ജെ ചിഞ്ചുറാണി; 'ചടയമംഗലം സീറ്റിൽ കണ്ണുവെച്ച സീറ്റ് മോഹികളാണ് അഭ്യൂഹം പ്രചരിപ്പിക്കുന്നത്'

വരാനിരിക്കുന്ന നിയമസഭാ തെരഞ്ഞെടുപ്പിൽ മണ്ഡലം മാറുമെന്ന അഭ്യൂഹങ്ങൾക്ക് പിന്നിൽ സീറ്റിൽ താൽപ്പര്യമുള്ളവരാകാമെന്ന് സിപിഐ നേതാവും മന്ത്രിയുമായ ജെ ചിഞ്ചുറാണി. ചടയമംഗലത്ത് വീണ്ടും മത്സരിക്കാൻ തനിക്ക് സ്വാഭാവിക ക്ലെയിം ഉണ്ടെന്നും അവർ വ്യക്തമാക്കി.

തിരുവനന്തപുരം: വരാനിരിക്കുന്ന നിയമസഭാ തെരഞ്ഞെടുപ്പിൽ മണ്ഡലം മാറി മത്സരിക്കാനുള്ള സാധ്യത തള്ളി സിപിഐ നേതാവും മന്ത്രിയുമായ ജെ ചിഞ്ചുറാണി. തൻ്റെ മണ്ഡലം മാറ്റ വാർത്തയ്ക്ക് പിന്നിൽ സീറ്റിൽ താത്പര്യമുള്ള ചിലരുണ്ടാകാമെന്നും കൊല്ലം ജില്ലയിലെ ചടയമംഗലം മണ്ഡലത്തെ പ്രതിനിധീകരിക്കുന്ന അവർ വ്യക്തമാക്കി. താൻ ഒരു ടേം മാത്രമാണ് മത്സരിച്ചത്. വീണ്ടുമൊരിക്കൽ കൂടി മത്സരിക്കാനുള്ള സ്വാഭാവിക ക്ലെയിം തനിക്കുണ്ട്. കഴിഞ്ഞ അഞ്ച് വർഷത്തിനിടെ മണ്ഡലത്തിൽ വൻ വികസനമാണ് ഉണ്ടായത്. അതിനാൽ തന്നെ ചടയമംഗലത്ത് എൽഡിഎഫ് ജയിക്കുമെന്ന് ഉറപ്പാണ്. തദ്ദേശ തെരഞ്ഞെടുപ്പിൽ സംസ്ഥാനത്ത് എൽഡിഎഫിന് തിരിച്ചടിയേൽക്കാൻ കാരണം വികസന ക്ഷേമ പ്രവർത്തനങ്ങൾ ജനം ചർച്ച ചെയ്യാത്തതുകൊണ്ടാണെന്നും അവർ പറഞ്ഞു. വിവാദങ്ങളായിരിക്കാം ജനം ചർച്ച ചെയ്തതെന്നും ചിഞ്ചുറാണി ഏഷ്യാനെറ്റ് ന്യൂസിന് നൽകിയ അഭിമുഖത്തിൽ പറഞ്ഞു.