സർവകലാശാലകളിൽ ചോദ്യങ്ങളിൽ ആവർത്തനം: പരിശോധനാ സംവിധാനം ആലോചനയിൽ,കണ്ണൂരിൽ നടപടിയുണ്ടാകുമെന്നും മന്ത്രി ആർ.ബിന്ദു

സർവകലാശാലകളിൽ അധ്യാപകർ നൽകുന്ന ചോദ്യങ്ങൾ പരിശോധിക്കാൻ നിലവിൽ സംവിധാനങ്ങളില്ലെന്നും ഉന്നത വിദ്യാഭ്യാസ മന്ത്രി ആർ.ബിന്ദു പറഞ്ഞു

തിരുവനന്തപുരം:  സർവകലാശാലകളിൽ (universities)അധ്യാപകർ നൽകുന്ന ചോദ്യങ്ങൾ പരിശോധിക്കാൻ നിലവിൽ സംവിധാനങ്ങളില്ലെന്ന് ഉന്നത വിദ്യാഭ്യാസ മന്ത്രി ആർ.ബിന്ദു(minister r bindu).  പരിശോധന സംവിധാനം ഉണ്ടാക്കുന്നതിനെ കുറിച്ച് ആലോചിക്കും. കണ്ണൂർ സർവകലാശാല ചോദ്യപേപ്പർ ആവർത്തനത്തിൽ മാതൃകപരമായ നടപടി എടുക്കും . ഇതിനായി സിൻഡിക്കേറ്റ് സബ് കമ്മിറ്റികളെ ചുമതലപ്പെടുത്തിയെന്നും ഉന്നത വിദ്യാഭ്യാസ മന്ത്രി ആർ.ബിന്ദു നിയമസഭയെ അറിയിച്ചു.

കണ്ണൂർ സർവകലാശാലയിൽ തുടർച്ചയായി അഞ്ചാമതും കഴിഞ്ഞ കൊല്ലത്തെ ചോദ്യപേപ്പർ ഇത്തവണ ആവർത്തിച്ചിരുന്നു. ആദ്യം സൈക്കോളജി ബിരുദ പരീക്ഷയുടെ മൂന്ന് പേപ്പറുകൾ, പിന്നീട് ബോട്ടണി ബിരുദ പരീക്ഷയുടെ ഒരു പേപ്പർ,  ഗണിത ശാസ്ത്ര ബിരുദാനന്തര ബിരുദ പരീക്ഷയുടെ ഒരു പേപ്പർ ഇങ്ങനെയാണ് ആവർത്തനം ഉണ്ടായ ചോദ്യപേപ്പറുകൾ. ആദ്യ പരീക്ഷകളിൽ സംഭവിച്ച വീഴ്ചകൾ അന്വേഷിച്ച രണ്ട് അംഗ സമിതി റിപ്പോർട്ട് മെയ് 10ന് സിന്‍റിക്കേറ്റിൽ വച്ചെങ്കിലും വൈസ് ചാൻസിലർ ഒന്നുകൂടെ അന്വേഷിക്കട്ടെ എന്ന നിലപാടാണ് അന്ന് സിന്‍റിക്കേറ്റെടുത്തത്. 

സർവകലാശാല നിയമപരിഷ്‌കരണ കമ്മീഷൻ റിപ്പോർട്ട്  സമർപ്പിച്ചു; തുടർ നടപടി ഉടൻ : മന്ത്രി ഡോ. ആർ ബിന്ദു

സംസ്ഥാനത്തെ സർവകലാശാലകളുടെ (university) നിയമങ്ങളും ചട്ടങ്ങളും പരിഷ്‌ക്കരിക്കുന്നതിന് രൂപീകരിച്ച സർവകലാശാല നിയമപരിഷ്‌കരണ കമ്മീഷൻ (final report) അന്തിമ റിപ്പോർട്ട് സർക്കാരിന് സമർപ്പിച്ചു. റിപ്പോർട്ടിലെ നിർദ്ദേശങ്ങളിൽ ആവശ്യമായ ചർച്ചകൾ നടത്തി എത്രയും വേഗം തുടർനടപടി സ്വീകരിക്കുമെന്ന് ചേംബറിൽ റിപ്പോർട്ട് ഏറ്റുവാങ്ങിയ ശേഷം ഉന്നതവിദ്യാഭ്യാസ-സാമൂഹ്യനീതി മന്ത്രി ഡോ. ആർ ബിന്ദു പറഞ്ഞു.

സംസ്ഥാനത്തെ 10 സർവകലാശാലകൾക്ക് പുതിയ ആക്ട്, സ്വാശ്രയ കോളേജുകൾക്കായിട്ടുള്ള പുതിയ ആക്ട്, സംസ്ഥാന ഉന്നതവിദ്യാഭ്യാസ കൗൺസിൽ ആക്റ്റിനുള്ള ഭേദഗതികൾ, അധ്യാപകർക്കുള്ള പുതിയ കോൺടാക്ട് റൂൾസ്, കേരള സർവ്വകലാശാല സ്റ്റാട്യുട്ടിനുള്ള ഭേദഗതികൾ എന്നിവ അടങ്ങിയതാണ് കമ്മീഷൻ റിപ്പോർട്ട്. പ്രൊ.എൻ.കെ.ജയകുമാർ (മുൻ വൈസ് ചാൻസലർ, NUALS) ചെയർമാനായ കമ്മീഷനിൽ പ്രൊ.ഗോപിനാഥ് രവീന്ദ്രൻ (വൈസ് ചാൻസലർ, കണ്ണൂർ സർവകലാശാല), ഡോ. ജോയ് ജോബ് കുളവേലിൽ  (എക്‌സിക്യൂട്ടീവ് ബോഡി അംഗം, ഉന്നതവിദ്യാഭ്യാസ കൗൺസിൽ), ഡോ. കെ.കെ. ദാമോദരൻ (പ്രിൻസിപ്പൽ, ഗവ. കോളേജ്, മലപ്പുറം), അഡ്വ. പി.സി.ശശിധരൻ (ഹൈക്കോടതി, എറണാകുളം) എന്നിവരാണ് അംഗങ്ങൾ.