നിപ മരണം; 6 പേരുടെ പരിശോധനാ ഫലം നെഗറ്റീവ്, സമ്പര്ക്കപ്പട്ടികയില് 267 പേർ, 81 പേർ ആരോഗ്യ പ്രവർത്തകർ
Synopsis
ഇന്ന് പുതുതായി ആരെയും സമ്പര്ക്ക പട്ടികയില് ഉള്പ്പെടുത്തിയിട്ടില്ല. നിലവില് സമ്പര്ക്കപ്പട്ടികയില് 267 പേരാണ് ഉൾപ്പെട്ടിട്ടുള്ളത്. ഇതിൽ 81 പേർ ആരോഗ്യ പ്രവർത്തകരാണെന്നും അധികൃതർ അറിയിച്ചു.
മലപ്പുറം: മലപ്പുറത്ത് നിപ ബാധിച്ച് മരിച്ച യുവാവിൻ്റെ സമ്പർക്കപട്ടികയിലുള്ള ആറു പേരുടെ പരിശോധനാ ഫലം കൂടി ഇന്ന് നെഗറ്റീവ് ആയി. ഇതു വരെ 74 പരിശോധനാ ഫലങ്ങളാണ് നെഗറ്റീവായത്. ഇന്ന് പുതുതായി ആരെയും സമ്പര്ക്ക പട്ടികയില് ഉള്പ്പെടുത്തിയിട്ടില്ല. നിലവില് സമ്പര്ക്കപ്പട്ടികയില് 267 പേരാണ് ഉൾപ്പെട്ടിട്ടുള്ളത്. ഇതിൽ 81 പേർ ആരോഗ്യ പ്രവർത്തകരാണെന്നും അധികൃതർ അറിയിച്ചു. 177 പേര് പ്രൈമറി കോണ്ടാക്ട് പട്ടികയിലും 90 പേര് സെക്കന്ററി കോണ്ടാക്ട് പട്ടികയിലുമാണുള്ളത്. പ്രൈമറി പട്ടികയിലുള്ള 134 പേരാണ് ഹൈറിസ്ക് കാറ്റഗറിയിലുള്ളത്.
ഇന്നലെ ആരോഗ്യമന്ത്രിയുടെ നേതൃത്വത്തിൽ നടന്ന അവലോകന യോഗത്തിൽ സ്ഥിതിഗതികൾ വിലയിരുത്തിയിരുന്നു. രോഗ ലക്ഷണങ്ങളുമായി ഒരാള് ഇന്നലെ മഞ്ചേരി മെഡിക്കല് കോളേജ് ആശുപത്രിയില് അഡ്മിറ്റായിട്ടുണ്ട്. ഈ വ്യക്തിയടക്കം നാലു പേര് മഞ്ചേരി മെഡിക്കല് കോളേജ് ആശുപത്രിയിലും 28 പേര് പെരിന്തല്മണ്ണ എം.ഇ.എസ് മെഡിക്കല് കോളേജ് ആശുപത്രിയിലും അഡ്മിറ്റായി ചികിത്സ തുടരുന്നുണ്ട്. സമ്പര്ക്കപ്പട്ടികയില് ഉള്പ്പെട്ടവര്ക്ക് മികച്ച മാനസിക പിന്തുണയാണ് നല്കിവരുന്നത്. മൂന്നു പേര് ഉള്പ്പെടെ 268 പേര്ക്ക് കോള് സെന്റര് വഴിയും മാനസിക പിന്തുണ നല്കി.
സമ്പര്ക്കപ്പട്ടികയില് ഉള്പ്പെട്ട് ബംഗളൂരുവില് ക്വാറന്റയിനില് കഴിയുന്ന, നിപ ബാധിച്ച് മരണപ്പെട്ട 24 കാരന്റെ സഹപാഠികള്ക്ക് സര്വ്വകലാശാല പരീക്ഷ എഴുതാനുള്ള സൗകര്യം ഏര്പ്പെടുത്തി നല്കാന് കഴിഞ്ഞതായും മന്ത്രി യോഗത്തില് അറിയിച്ചു. സംസ്ഥാന ആരോഗ്യ വകുപ്പ് അധികൃതര് കര്ണാടക ആരോഗ്യ വകുപ്പുമായി ബന്ധപ്പെട്ടാണ് ഇവര്ക്ക് പരീക്ഷ എഴുതാനുള്ള തടസ്സം പരിഹരിച്ചത്.
https://www.youtube.com/watch?v=Ko18SgceYX8