ഇപ്പോഴത്തെ ലക്ഷ്യം തദ്ദേശതെരഞ്ഞെടുപ്പ്,മുഖ്യമന്ത്രി ചര്‍ച്ചകള്‍ക്കെതിരെ എകെ ആന്‍റണി,ഉപദേശം സ്വീകരിക്കാം,തളളാം

നിയമസഭ തെരഞ്ഞെടുപ്പ് ചർച്ച പിന്നെ മതി .2026 അവിടെ നിൽക്കട്ടെ.തീരുമാനം എടുക്കേണ്ടത് സുധാകരനും സതീശനുമെല്ലാമെന്ന് എകെ ആന്‍റണി

തിരുവനന്തപുരം: മുഖ്യമന്ത്രിസ്ഥാനത്തിനും നേതൃനിരയിൽ സ്ഥാനമുറപ്പിക്കാനുമുള്ള കിടമത്സരത്തെ വിമർശിച്ച് എകെ ആൻറണി. അനാവശ്യ ചർച്ചകൾ വേണ്ടെന്നും നിയമസഭാ തെരഞ്ഞെടുപ്പല്ല തദ്ദേശ തെരഞ്ഞെടുപ്പ് മാത്രമാകണം ഇനിയുള്ള ലക്ഷ്യമെന്നും കോൺഗ്രസ് നേതാക്കളെ ആൻറണി ഓർമ്മിപ്പിച്ചു. കിടമത്സരത്തിനെതിരെ പാർട്ടിക്കള്ളിൽ അമർഷം ഉയരുന്നതിനിടെയാണ് മുതിർന്ന നേതാവിൻറെ പരസ്യവിമർശനം

മത സാമുദായികനേതാക്കളെ കൂട്ടുപിടിച്ച് മുഖ്യമന്ത്രിസ്ഥാനത്തേക്കെത്താൻ പോരിനിറങ്ങിയ നേതാക്കൾക്കാണ് ആൻറണിയുടെ മുന്നറിയിപ്പും ഉപദേശവും. തദ്ദേശതെരഞ്ഞെടുപ്പ് ജയത്തിനായുള്ള മിഷൻ 25 വരെ മാറ്റിവെച്ച് നിയമസഭ തെരഞ്ഞെടുപ്പും മുഖ്യമന്ത്രി സ്ഥാനവും മോഹിച്ചുള്ള പാർട്ടിയിലെ പോര്.  കോൺഗ്രസ്സിൽ തന്നെ ഒരുവലിയ വിഭാഗത്തിനുള്ള എതിർപ്പാണ് ആൻറണി പ്രകടമാക്കിയത്. ഉച്ചക്ക് ശേഷം ചേരുന്ന കെപിസിസി ഭാരവാഹി യോഗത്തിലും സമാന വിമർശനങ്ങൾക്ക് സാധ്യതയേറെ. യുഡിഎഫ് അധികാരത്തിലെത്തിയാൽ ഒരു ടേം മുഖ്യമന്ത്രി സ്ഥാനം വേണമെന്ന നിലക്കാണ് രമേശ് ചെന്നത്തലയുടെ നീക്കങ്ങൾ. എൻഎസ്എസുമായി സമവായത്തിലെത്തിയത് രണ്ടാം വരവായി കണ്ടാണ് മുന്നോട്ട് പോകൽ.

മറുവശത്ത് വിഡി സതീശനും മതസാമുദായിക സംഘടനകളുടെ പരിപാടികളിൽ തുടർച്ചയായി പങ്കെടുക്കുന്നു. രമേശിൻറെ ശ്രമങ്ങളെ സംശയത്തോടെ കാണുന്നു സതീശൻ അനുകൂലികൾ. നേതാക്കൾ ഇരുവരെയും മാറി മാറി പിന്തുണക്കുന്നു നേതൃതലത്തിലെ പോരിൽ ലീഗ് അടക്കമുള്ള ഘടകകക്ഷികൾക്കും അസംതൃപ്തിയുണ്ട്. കോൺഗ്രസ് പുനസംഘടന പാതിവഴിയിലാണ്. ഭരണവിരുദ്ധവികാരം കൊണ്ട് മാത്രം അധികാരത്തിലേക്ക് തിരിച്ചുവരാനാകില്ലെന്ന അഭിപ്രായം പാർട്ടിയിലും മുന്നണിയിലും ഉയരുമ്പോഴാണ് എന്താകണം അടുത്ത പ്രധാന ലക്ഷ്യമെന്നുള്ള ആൻറണിയുടെ ഓർമ്മപ്പെടുത്തൽ