പിണറായിക്കെതിരായത് കള്ളക്കേസ്, വേട്ടയാടൽ ഇന്നോ ഇന്നലെയോ തുടങ്ങിയതല്ല, നേരിടും : ടി പി രാമകൃഷ്ണൻ

മാസപ്പടി വിവാദത്തിൽ പിണറായി വിജയനെതിരായ വിജിലൻസ് കേസ് രാഷ്ട്രീയ വേട്ടയാടലാണെന്ന് എൽഡിഎഫ് കൺവീനർ ടി പി രാമകൃഷ്ണൻ.

തിരുവനന്തപുരം: മാസപ്പടിയുമായി ബന്ധപ്പെട്ട് പിണറായി വിജയനെതിരായ വിജിലൻസ് എഫ് ഐ ആറിൽ പ്രതികരിച്ച് എൽഡിഎഫ് കൺവീനർ ടി പി രാമകൃഷ്ണൻ. പിണറായിയെ വേട്ടയാടാൻ ഇന്നോ ഇന്നലെയോ തുടങ്ങിയതല്ലെന്നും കള്ളക്കേസെന്നും ടി പി രാമകൃഷ്ണൻ പ്രതികരിച്ചു. വേട്ടയാടലിന്റെ ഭാഗമാണ് ഇപ്പോഴത്തെ വിജിലൻസ് നടപടി. സമൂഹം നിരാകരിച്ച ഒരു പ്രശ്നം ഉയർത്തിക്കൊണ്ടു വരാൻ ശ്രമിക്കുന്നു. അദ്ദേഹത്തിനെതിരെ ഇല്ലാത്ത ആരോപണങ്ങൾ ഉന്നയിക്കുന്നു. ഈ ഗൂഢാലോചനയിൽ പാർട്ടി പതറില്ല. നിയമപരമായും രാഷ്ട്രീയപരമായും ഏത് അറ്റം വരെയും പോകും. പിണറായി വിജയനെ ലക്ഷ്യം വെക്കുന്നില്ലെങ്കിൽ എന്തിനാണ് പിണറായിയുടെ വീട് റെയ്ഡ് ചെയ്തത്. കേസിന്റെ സ്വഭാവത്തിനനുസരിച്ച് എങ്ങനെ നടത്തിക്കൊണ്ടുപോകാൻ കഴിയുമെന്ന് ആലോചിക്കും. പ്രതിപക്ഷ നേതാവായി പിണറായി തുടരുമെന്നും അദ്ദേഹം കൂട്ടിച്ചേർത്തു.

വിജിലൻസ് കേസെടുത്തു

മാസപ്പടി-ഹവാല ആരോപണങ്ങളിൽ ഹൈക്കോടതി നിർദ്ദേശത്തിന് പിന്നാലെയാണ് അഴിമതി നിരോധന നിയമപ്രകാരം വിജിലൻസ് കേസെടുത്തത്. ഒന്നാമത്തെ മാസപ്പടി കേസിൽ മാത്രമാണ് മുൻ മുഖ്യമന്ത്രിയും നിലവിലെ പ്രതിപക്ഷ നേതാവുമായ പിണറായി വിജയനെ പ്രതിയാക്കിയിരിക്കുന്നത്. രണ്ടാമത്തെ അഴിമതി കേസിൽ മുന്‍മന്ത്രി മുഹമ്മദ് റിയാസാണ് ഒന്നാം പ്രതി. രണ്ട് കേസിലും രണ്ടാം പ്രതി വീണ വിജയനാണ്.സിംഗിൾ ബെഞ്ച് ഉത്തരവിനെതിരെ പിണറായി വിജയന്‍ ഇന്ന് തന്നെ അപ്പീൽ നൽകിയേക്കും. തന്‍റെ വാദം കേൾക്കാതെയാണ് ഹൈക്കോടതി സിംഗിൾ ബെഞ്ച് വിധി എന്നായിരിക്കും ഹര്‍ജിയിലെ വാദം. എഫ്ഐആർ റദ്ദാക്കാന്‍ ആവശ്യപ്പെട്ട് നാളെ ഹര്‍ജി നല്‍കും