ഇത് ചരിത്രം, പറവൂരിൽ നിന്നുള്ള ആദ്യത്തെ മുഖ്യനല്ല വിഡി; പറവൂര്‍ ടി കെ മുഖ്യമന്ത്രിയായത് 1949ൽ

പറവൂരിൽ നിന്നുള്ള ആദ്യത്തെ മുഖ്യമന്ത്രിയല്ല വി ഡി സതീശൻ. തിരു-കൊച്ചി മുഖ്യമന്ത്രിയായി 1949ൽ ടി കെ നാരായണപിള്ള സ്ഥാനമേറ്റിട്ടുണ്ട്. ടി കെ പറവൂര്‍ എന്നായിരുന്നു വിളിപ്പേര്.

തിരുവനന്തപുരം: പറവൂരിൽ നിന്നുള്ള ആദ്യത്തെ മുഖ്യമന്ത്രിയല്ല വി ഡി സതീശൻ. പറവൂരിൽ നിന്നും ജയിച്ചു കയറിയ മറ്റൊരാൾ മുമ്പ് ധനകാര്യവകുപ്പും കൈകാര്യം ചെയ്തിട്ടുണ്ട്. അങ്ങനെ ചില സവിശേഷതകൾ കൂടിയുണ്ട് വി ഡി സതീശൻ സത്യപ്രതിജ്ഞ ചെയ്യുമ്പോൾ.

വര്‍ഷം 1949. അന്ന് ഐക്യ കേരളമായിരുന്നില്ല. അന്നത്തെ തിരു-കൊച്ചി മുഖ്യമന്ത്രിയായി ടി കെ നാരായണപിള്ള സ്ഥാനമേറ്റു. ടി കെ പറവൂര്‍ എന്നായിരുന്നു വിളിപ്പേര്. തിരുകൊച്ചി സംസ്ഥാനത്തിൻ്റെ ആദ്യ മുഖ്യമന്ത്രി. 75 വര്‍ഷത്തിനിപ്പുറം അതേ പറവൂരിൽ നിന്ന് മറ്റൊരു മുഖ്യമന്ത്രിയായി വി ഡി സതീശൻ ഇന്ന് അധികാരമേൽക്കുകയാണ്. ഇതുകൂടാതെ, പറവൂരിൽ നിന്ന് ഒരാൾ ധനകാര്യവകുപ്പും കൈകാര്യം ചെയ്തിട്ടുണ്ട്. 1970ൽ കെ ടി ജോര്‍ജ് പറവൂരിൽ നിന്ന് നിയമസഭാംഗമായപ്പോൾ ധനകാര്യ മന്ത്രിയായി. വിഡിഎസ് മുഖ്യമന്ത്രിയാകുമ്പോൾ പ്രധാന വകുപ്പ് ധനകാര്യമെന്നതും കൗതുകം. 1982 കരുണാകരൻ മന്ത്രി സഭയിൽ സ്പീക്കറായിരുന്ന എ സി ജോസ് പറവൂരിൽ നിന്ന് തെരഞ്ഞെടുക്കപ്പെട്ടയാളാണ്. പദവികൾ പലതും കൈ വെള്ളയിൽ നിന്ന് വഴുതിപ്പോയ സതീശൻ ഒന്നാം നമ്പര്‍ കാറിൽ കയറുമ്പോൾ പറവൂരിലെ സ്റ്റോപ്പിൽ ചരിത്രം കാത്തു നിൽക്കുകയാണെന്ന് പറയാം.