ഉള്മരം , രേഖ ആര് താങ്കള് എഴുതിയ കവിത
Synopsis
ചില്ല, എഴുത്തിന്റെ ചിറകനക്കങ്ങള്. ഇന്ന് രേഖ ആര് താങ്കള് എഴുതിയ കവിത
ചില്ല. മികച്ച എഴുത്തുകള്ക്ക് ഒരിടം. സൃഷ്ടികള് submissions@asianetnews.in എന്ന വിലാസത്തില് അയക്കൂ. ഒപ്പം ഫോട്ടോയും വിശദമായ വിലാസവും അയക്കണം. എഡിറ്റോറിയല് ബോര്ഡ് തെരഞ്ഞെടുക്കുന്ന സൃഷ്ടികള് പ്രസിദ്ധീകരിക്കും.
ഉള്മരം
വിണ്ടുകീറിയ വറുതിയില്
പാറിവന്ന വിത്തുകളിലൊന്ന്
ഉഴുതൊരുക്കാത്ത
എന്നില് പതിഞ്ഞു
ഇറ്റുവീണ തുള്ളികളുടെ ആര്ദ്രതയില്
നേര്ത്ത വേരുകള് പൊടിച്ചുവന്നു
മഴയും വെയിലും
മാറി മാറി നുണഞ്ഞ്
ഉള്ളാഴങ്ങളിലേക്ക് ചുറ്റിപ്പടര്ന്നു
സ്നിഗ്ദ്ധതയില്
കുരുന്നിലകള് കിളിര്ത്തു
തായ്വേര് ആഴ്ന്നിറങ്ങുന്നതും
ശാഖകള് വളരുന്നതും
ഞാനറിഞ്ഞു
നിനക്കൊപ്പം
ഞാനും
പൂത്തുതളിര്ത്തു
ഓരോ വസന്തവും
പിറക്കുമ്പോള്
വേദനയുടെ
വീഞ്ഞുപാത്രം
ഞാന് മോന്തി
തീപ്പൂക്കളുടെ
തീക്ഷ്ണ ഗന്ധത്തില്
ഞാനുന്മാദിയായി
നിന്റെ ശാഖകളില്
ഊഞ്ഞാല് കെട്ടി
ഞാന് ചില്ലാട്ടം പറന്നു
നിന്റെ തണലിലിരുന്ന്
പതംപെറുക്കി
ചില രാത്രികളില്
ദുസ്വപ്നം കണ്ടു
പൊട്ടിക്കരഞ്ഞു
ആ ചില്ലകളില്ത്തന്നെ
എനിക്കുള്ള കുരുക്കും
തൂങ്ങിയാടുന്നത്
ഇപ്പോഴെനിക്ക് കാണാം