Malayalam Poem: പച്ചയുടെ ശവദാഹം..., വിലീന പി വിനയന് എഴുതിയ കവിത
Synopsis
ചില്ല, എഴുത്തിന്റെ ചിറകനക്കങ്ങള്. വിലീന പി വിനയന് എഴുതിയ കവിത
ചില്ല. മികച്ച എഴുത്തുകള്ക്ക് ഒരിടം. സൃഷ്ടികള് submissions@asianetnews.in എന്ന വിലാസത്തില് അയക്കൂ. ഒപ്പം ഫോട്ടോയും വിശദമായ വിലാസവും അയക്കണം. എഡിറ്റോറിയല് ബോര്ഡ് തെരഞ്ഞെടുക്കുന്ന സൃഷ്ടികള് പ്രസിദ്ധീകരിക്കും.
പച്ചയുടെ ശവദാഹം
ഇന്നത്തെ വിത്തുകളെ,
നാളത്തെ മരങ്ങളെ,
ശവം കണക്കെ നീ,
കൊലപാതകം ചെയ്തു.
അവ പൂത്തില്ല,
നിന്റെ കൈകള്ക്കടിയില്,
നിശബ്ദമായി കിടന്നഴുകി.
ജനിക്കാത്ത വനങ്ങള്,
ശ്വാസദാതാക്കള്,
അവയുടെ വേരുകള്,
മഴയുടെ രുചി അറിഞ്ഞില്ല.
പച്ചയെ പച്ചയ്ക്ക് തീര്ത്ത മനുഷ്യാ,
ഒരു കാരുണ്യവും നിന്നെ കാത്തിരിക്കുന്നില്ല.
നീ വീഴുമ്പോള് ഒരു മരവും ദുഃഖിക്കില്ല.
അസ്ഥികള് സംരക്ഷിക്കാന് ഒരു ശാഖയും വളയില്ല.
നിന്റെ കുറ്റകൃത്യം ഏറ്റുവാങ്ങിയ ഭൂമി,
നിന്റെ പേര് വിഷം കണക്കെ തുപ്പിക്കളയും.
മനുഷ്യാ, നിന്റെ കൈകള്,
ചതഞ്ഞ ഇലകള് പോലെ വാടും,
പാദങ്ങള് മണ്ണില് ആഴ്ന്നുപോകും,
ഒരു ജീവനെ കൂടി തിന്നു തീര്ക്കാന്,
നീ ഇനി എഴുന്നേല്ക്കില്ല.
മനുഷ്യാ നിന്റെ ദാഹം ശമിപ്പിക്കാന്,
മഴ ഓടിയെത്തില്ല.
സൂര്യന് നിന്നെ
തണലിന്റെ അലിവ്
തൊടീക്കാതെ പൊള്ളിക്കും.
നീ ചവിട്ടുന്നിടത്ത് മുള്ളുകള് വളരും,
രക്തബന്ധത്തിന് വിളവെടുപ്പ് ലഭിക്കില്ല,
നിനക്കിനി ഫലമില്ല,
പാര്പ്പിടമില്ല,
പാരമ്പര്യമില്ല!
നിന്റെ മക്കള്,
പൊടി നിറഞ്ഞ വയലുകളില് നടക്കും,
മഴയ്ക്കായി കാറ്റിനോട് യാചിക്കും,
പക്ഷേ ആകാശം നിന്റെ കുറ്റകൃത്യം ഓര്ക്കും,
നീ വൃക്ഷത്തൈകള്ക്ക് ജീവന് നിഷേധിച്ചതുപോലെ,
ഭൂമി നിന്നോട് കരുണ നിഷേധിക്കും.
ഭൂമിക്കടിയില് വേരുകള്,
നിന്റെ വിധിയെ ഓര്ത്തു ചിരിക്കും,
മരങ്ങള് കാറ്റില് നിന്റെ നാമത്തെ ശപിക്കും.
ഒരു മണ്ണും നിന്നെ സ്വാഗതം ചെയ്യില്ല,
ഒരു കൈയും നിന്നെ കുഴിച്ചിടില്ല.
മരണവും നിനക്ക് സമാധാനം തരില്ല,
നീ മറവിയില് മറക്കപ്പെട്ട്,
പേരില്ലാത്ത പ്രേതമാകും,
നീ പ്രകൃതിയുടെ ശാപമേറ്റു,
തരിശുഭൂമികളില് അലഞ്ഞുതിരിയും!
പച്ചയുടെ ശവക്കുഴിയില് നിനക്ക് മാപ്പില്ല, മനുഷ്യാ!