സംസ്ഥാനത്ത് വീണ്ടും ശൈശവ വിവാഹം, ഇടമലകുടിയില് 15 കാരിയെ 47 കാരന് വിവാഹം ചെയ്തു
Synopsis
47 കാരനെതിരെയും ഇയാളുടെയും പെണ്കുട്ടിയുടെയും മാതാപിതാക്കള്ക്കെതിരെയും പൊലിസ് അന്വേഷണം തുടങ്ങി. കുട്ടിയെ സുരക്ഷിത കേന്ദ്രത്തിലേക്ക് മാറ്റി.
ഇടുക്കി: സംസ്ഥാനത്ത് വീണ്ടും ശൈശവ വിവാഹം. ഇടുക്കി ഇടമലകുടിയില് 15 വയസുകാരിയെ 47 കാരന് വിവാഹം ചെയ്തു. ഒരു മാസം മുമ്പ് ഗോത്രാചാരപ്രകാരമായിരുന്നു ഇടമലകുടിയില് വിവാഹം നടന്നത്. ഇരുവരുടെയും മാതാപിതാക്കളുടെ സാന്നിധ്യത്തിലായിരുന്നു വിവാഹം. ഇതേക്കുറിച്ച് ജില്ലാ ശിശുസംരക്ഷണ ഓഫിസര്ക്ക് ലഭിച്ച രഹസ്യവിവരമാണ് അന്വേഷണങ്ങള്ക്ക് തുടക്കം.
ഉദ്യോഗസ്ഥര് കുടിയിലെത്തി പരിശോധന നടത്തി ശരിയെന്ന് ഉറപ്പുവരുത്തി. ഗോത്രാചാര പ്രകാരമാണ് വിവാഹം നടന്നതെന്നും ഇരുവരും വെവ്വേറെയാണ് താമസിക്കുന്നതെന്നും മാതാപിതാക്കള് മൊഴി നല്കി. സംഭവത്തില് നടപടിയെടുക്കണം എന്നാവശ്യപ്പെട്ട് ശിശുസംരക്ഷണ ഓഫിസര് ചൈല്ഡ് വെല്ഫയര് കമ്മിറ്റിയെ സമിപിച്ചു. ചെല്ഡ് വെല്ഫയര് കമ്മിറ്റിയാണ് കേസെടുത്ത് അന്വേഷണം നടത്താന് പൊലീസിന് നിര്ദ്ദേശം നല്കിയിരിക്കുന്നത്. 47 കാരനെതിരെയും ഇയാളുടെയും പെണ്കുട്ടിയുടെയും മാതാപിതാക്കള്ക്കെതിരെയും പൊലിസ് അന്വേഷണം തുടങ്ങി. കുട്ടിയെ സുരക്ഷിത കേന്ദ്രത്തിലേക്ക് മാറ്റി.