ഈയിടങ്ങളിൽ നാളെ രാവിലെ 10 മുതൽ ഉച്ചയ്ക്ക് 1 വരെ വൈദ്യുതി വിതരണം മുടങ്ങും; തിരുവനന്തപുരത്തുകാ‌‍‌ർക്ക് കെഎസ്ഇബിയുടെ അറിയിപ്പ്

പോത്തൻകോട് 220 കെ.വി. സബ്‌സ്റ്റേഷനിലെ അറ്റകുറ്റപ്പണികൾ കാരണം നാളെ (23.11.2025) രാവിലെ 10 മുതൽ ഉച്ചയ്ക്ക് 1 വരെ വൈദ്യുതി വിതരണം തടസ്സപ്പെടുമെന്ന് കെഎസ്ഇബി. കഴക്കൂട്ടം, വേളി, മുട്ടത്തറ, തുമ്പ തുടങ്ങിയ പ്രദേശങ്ങളിലാണ് ഇത് ബാധിക്കുക. 

തിരുവനന്തപുരം: പോത്തൻകോട് 220 കെ.വി. സബ്‌സ്റ്റേഷനിൽ നടക്കുന്ന അറ്റകുറ്റപ്പണികളിന്റെ ഭാഗമായി നാളെ (23.11.2025) രാവിലെ 10 മുതൽ ഉച്ചയ്ക്ക് 1 വരെ വൈദ്യുതി വിതരണം പൂർണ്ണമായും തടസ്സപ്പെടുമെന്ന് കെ.എസ്.ഇ.ബി. അറിയിച്ചു. കഴക്കൂട്ടം 110 കെ.വി. സബ്‌സ്റ്റേഷന്റെ പരിധിയിൽപ്പെടുന്ന കഴക്കൂട്ടം, വേളി, മുട്ടത്തറ, TERLS (തുമ്പ) എന്നിവിടങ്ങളിൽ വൈദ്യുതി തടസ്സം അനുഭവപ്പെടുമെന്നും കെ.എസ്.ഇ.ബി. അറിയിച്ചു. അതേ സമയം, തിരുവനന്തപുരം ജില്ലയിൽ ഇന്ന് മുതൽ 26 വരെയുള്ള എല്ലാ ദിവസങ്ങളിലും കനത്ത മഴക്കുള്ള സാധ്യതയാണ് കേന്ദ്ര കാലാവസ്ഥാ വകുപ്പ് പ്രഖ്യാപിച്ചിട്ടുള്ളത്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അർത്ഥമാക്കുന്നത്.

ഇത് കൂടാതെ, കന്യാകുമാരി കടലിനും ഭൂമധ്യ രേഖക്ക് സമീപമുള്ള ഇന്ത്യൻ മഹാസമുദ്രത്തിനും മുകളിലായി ചക്രവാതച്ചുഴി സ്ഥിതിചെയ്യുന്നു. ബംഗാൾ ഉൾക്കടലിൽ ന്യുനമർദ്ദം മലാക്ക കടലിടുക്കിനും തെക്കൻ ആൻഡമാൻ കടലിനും മുകളിലായി പുതിയ ന്യുനമർദ്ദം രൂപപ്പെട്ടു. പടിഞ്ഞാറ്-വടക്കുപടിഞ്ഞാറ് ദിശയിൽ സഞ്ചരിച്ച് നവംബർ 24-ഓടെ തെക്കു കിഴക്കൻ ബംഗാൾ ഉൾക്കടലിന് മുകളിൽ തീവ്ര ന്യുനമർദ്ദമായി ശക്തിപ്പെടാൻ സാധ്യതയുണ്ട്. തുടർന്നുള്ള 48 മണിക്കൂറിനിടെ, പടിഞ്ഞാറ്-വടക്കുപടിഞ്ഞാറ് ദിശയിൽ സഞ്ചരിച്ച് തെക്കുപടിഞ്ഞാറൻ ബംഗാൾ ഉൾക്കടലിൽ വീണ്ടും ശക്തി പ്രാപിക്കാനും സാധ്യതയുണ്ടെന്നാണ് അറിയിപ്പ്. തെക്ക് കിഴക്കൻ അറബിക്കടലിന് മുകളിലും ചക്രവാതചുഴി സ്ഥിതി ചെയ്യുന്നു.