ചിഹ്നം മാങ്ങ, 90 ശതമാനം സ്ത്രീ സംവരണം; എൽഡിഎഫിനും യുഡിഎഫിനും മുമ്പേ സ്ഥാനാർഥികളെ പ്രഖ്യാപിച്ച് ട്വന്റി20
Synopsis
എൽഡിഎഫിനും യുഡിഎഫിനും മുമ്പേ സ്ഥാനാർഥികളെ പ്രഖ്യാപിച്ച് ട്വന്റി20. 90 ശതമാനം സ്ത്രീ സംവരണം ഉറപ്പാക്കിയാണ് സ്ഥാനാര്ത്ഥി നിര്ണ്ണയം പൂര്ത്തിയാക്കിയത്.
കൊച്ചി: സംസ്ഥാനത്ത് തദ്ദേശ തെരഞ്ഞെടുപ്പ് പ്രഖ്യാപിക്കുന്നതിന് ആഴ്ച്ചകള്ക്ക് മുന്നേ സ്ഥാനാര്ത്ഥികളെ പ്രഖ്യാപിച്ച് ട്വന്റി20 പാര്ട്ടി. കിഴക്കമ്പലം പഞ്ചായത്ത് പാര്ട്ടി എക്സിക്യൂട്ടീവ് കമ്മിറ്റിയാണ് കിഴക്കമ്പലം ഗ്രാമ പഞ്ചായത്തിലെ സ്ഥാനാര്ത്ഥികളെ പ്രഖ്യാപിച്ചത്. കിഴക്കമ്പലം ഗ്രാമപഞ്ചായത്തിലെ 21 വാര്ഡിലേയും വാഴക്കുളം ബ്ലോക്ക് പഞ്ചായത്തിലെ മൂന്ന് ഡിവിഷനുകളിലേയും എറണാകുളം ജില്ലാ പഞ്ചായത്ത് വെങ്ങോല ഡിവിഷന് അടക്കം 25 സ്ഥാനാര്ത്ഥികളെയാണ് പ്രഖ്യപിച്ചത്. 90 ശതമാനം സ്ത്രീ സംവരണം ഉറപ്പാക്കിയാണ് സ്ഥാനാര്ത്ഥി നിര്ണ്ണയം പൂര്ത്തിയാക്കിയത്. കേരള ചരിത്രത്തില് ആദ്യമായാണ് രാഷ്ട്രപുനര്നിര്മ്മാണ പ്രക്രിയയ്ക്ക് ഇത്രയധികം വനിതാ പങ്കാളിത്തം ഒരു രാഷ്ടീയ പാര്ട്ടി ഉറപ്പാക്കുന്നതെന്ന് പാര്ട്ടി അധ്യക്ഷന് സാബു എം.ജേക്കബ് പറഞ്ഞു. പാര്ട്ടി മത്സരിക്കുന്ന മുഴുവന് പഞ്ചായത്തുകളിലേയും ഒന്നാംഘട്ട പ്രചരണം പൂര്ത്തിയാക്കി. പോസ്റ്റര് പ്രചരണം, വാള്പെയിന്റിങ്ങ്, നോട്ടീസ് വിതരണം, മൈക്ക് അനൗണ്സ്മെന്റ് തുടങ്ങിയവ പൂര്ത്തിയാക്കിയതായി സാബു എം.ജേക്കബ് പറഞ്ഞു. മാങ്ങയാണ് പാര്ട്ടിയുടെ തിരഞ്ഞെടുപ്പ് ചിഹ്നം.