വോൾവോ ബസിൽ ബെംഗളുരുവിൽ നിന്ന് കൊല്ലത്തേക്ക്, അമരവിള ചെക്പോസ്റ്റിൽ കുടുങ്ങി; എംഡിഎംഎയുമായി യുവാക്കൾ പിടിയിൽ

അമരവിള ചെക്പോസ്റ്റിൽ അന്തർ സംസ്ഥാന വാഹനങ്ങൾ പരിശോധിക്കവേ, കൊല്ലത്തേക്ക് വന്ന വോൾവോ ബസിൽ യാത്രക്കാരായിരുന്ന യുവാക്കളിൽ നിന്നാണ് 4.042 ഗ്രാം എംഡിഎംഎ കണ്ടെത്തിയത്.

തിരുവനന്തപുരം: ബെംഗളുരുവിൽ നിന്നും കേരളത്തിലേക്ക് സ്വകാര്യ ബസിൽ കടത്തിക്കൊണ്ടുവന്ന എംഡിഎംയുമായി യുവാക്കൾ പിടിയിലായി. കൊല്ലം കല്ലുംതാഴം സ്വദേശി അബ്ദുൽ മനാഫ് (32), കരിക്കോട് സ്വദേശി സുനീർ.എസ് (28) എന്നിവരെയാണ് പിടികൂടിയത്. ഇന്നലെ രാവിലെ അമരവിള ചെക്പോസ്റ്റിൽ അന്തർ സംസ്ഥാന വാഹനങ്ങൾ പരിശോധിക്കവേ, കൊല്ലത്തേക്ക് വന്ന വോൾവോ ബസിൽ യാത്രക്കാരായിരുന്ന യുവാക്കളിൽ നിന്നാണ് 4.042 ഗ്രാം എംഡിഎംഎ കണ്ടെത്തിയത്. വാഹന ഇടപാടു നടത്തുന്ന ഇവർ ബെംഗളൂരുവിൽ നിന്ന് തിരികെ വരുന്ന വഴി സ്വന്തം ഉപയോഗത്തിന് കൊണ്ടുവന്നതാണെന്നാണ് എക്സൈസിനോട് പറഞ്ഞത്.

സർക്കിൾ ഇൻസ്പെക്ടർ ആർ.ജി.രാജേഷ്, എക്സൈസ് ഇൻസ്പെക്ടർ എ.കെ. രാജേഷ് എന്നിവരുടെ നേതൃത്വത്തിൽ നടന്ന പരിശോധനയിൽ പ്രിവന്റീവ് ഓഫീസർമാരായ ഗൗതമൻ. വി, സിവിൽ എക്സൈസ് ഓഫീസർമാരായ പ്രസന്നൻ,അഖിൽ വനിത സിവിൽ എക്സൈസ് ഓഫീസർ സബിത എന്നിവർ പരിശോധനയിൽ പങ്കെടുത്തു.പ്രതികൾക്കെതിരെ തുടർ നടപടി സ്വീകരിക്കുമെന്ന് എക്സൈസ് അറിയിച്ചു.