കാട്ടാക്കട ബസ് സ്റ്റാൻഡിലെ ക്രൂരത; സിസിടിവിയിൽ പതിഞ്ഞ ദൃശ്യങ്ങൾ കണ്ട കെഎസ്ആർടിസി ജീവനക്കാർ പൊലീസിനെ അറിയിച്ചു; ലൈംഗികാതിക്രമത്തിൽ അന്വേഷണം

കാട്ടാക്കട കെഎസ്ആർടിസി ബസ്റ്റാൻഡിനുള്ളിൽ മാനസിക വെല്ലുവിളി നേരിടുന്ന സ്ത്രീക്ക് നേരെ ലൈംഗികാതിക്രമം നടന്നു. സിസിടിവി ദൃശ്യങ്ങൾ പരിശോധിച്ചപ്പോഴാണ് സംഭവം പുറത്തറിഞ്ഞത്. സംഭവത്തിൽ പൊലീസ് അന്വേഷണം ആരംഭിക്കുകയും പ്രതിക്കായി തിരച്ചിൽ ഊർജിതമാക്കുകയും ചെയ്തു.

തിരുവനന്തപുരം: കാട്ടാക്കടയിൽ കെഎസ്ആർടിസി ബസ്റ്റാൻഡിനുള്ളിൽ സ്ത്രീക്ക് നേരെ ലൈംഗികാതിക്രമം. മാനസിക വെല്ലുവിളി നേരിടുന്ന യുവതിയെ ഉപദ്രവിക്കുന്നതിന്റെ സിസിടിവി ദൃശ്യങ്ങൾ പുറത്തുവന്നു. പന്നിയോട് സ്വദേശി ബ്രൂസ്‌ലി ഷിബുവാണ് സ്ത്രീയെ പീഡിപ്പിച്ചതെന്നാണ് പൊലീസ് സംശയിക്കുന്നത്. ഇന്ന് പുലർച്ചെയുണ്ടായ സംഭവം കെഎസ്ആർടിസിയിലെ ഉദ്യോഗസ്ഥർ സിസിടിവി പരിശോധിച്ചപ്പോഴാണ് പുറത്തറിയുന്നത്. കെഎസ്ആർടിസി ഡിപ്പോ അധികൃതർ നൽകിയ പരാതിയിലാണ് പൊലീസിൻ്റെ നടപടി. ലൈംഗിക അതിക്രമത്തിനിരയായ സ്ത്രീയെ കണ്ടെത്താൻ പൊലീസ് അന്വേഷണം ആരംഭിച്ചു. പ്രതിയെന്ന് സംശയിക്കുന്ന ബ്രൂസ്‌ലി ഷിബുവിനായും പൊലീസ് അന്വേഷണം ഊർജിതമാക്കി.