എന്നിരുന്നാലും, ഇത് തള്ളിപ്പറഞ്ഞുകൊണ്ട് ഗിന്നസ് വേൾഡ് ബുക്ക് ഓഫ് റിപ്പോർട്ടുകൾ അവരുടെ രേഖകളെ ന്യായീകരിച്ചു.
പണ്ടൊക്കെ സ്ത്രീകൾ പാടത്ത് പണിയെടുക്കുമ്പോഴോ, നെല്ലുകുത്തുമ്പോഴോ ഒക്കെ പ്രസവിക്കാറുള്ള കഥകൾ പറഞ്ഞു കേൾക്കാറുണ്ട്. അതും ഇന്നത്തെ പോലെ ഒന്നും രണ്ടും തവണയല്ല, മറിച്ച് പത്തും, പന്ത്രണ്ടും തവണയാണ് സ്ത്രീകൾ അന്നൊക്കെ പ്രസവിക്കുന്നത്. എന്നാൽ, ഏറ്റവും കൂടുതൽ തവണ കുഞ്ഞുങ്ങൾക്ക് ജന്മം നൽകിയ അമ്മ ആരാണെന്ന് അറിയാമോ? റഷ്യക്കാരിയായ വാലന്റീന വാസിലിയേവ് ആണത്രെ അത്. 1707 മുതൽ 1782 വരെ ജീവിച്ചിരുന്ന ഒരു കർഷകയായിരുന്നു അവർ. തന്റെ ജീവിതകാലത്ത് 69 കുട്ടികൾക്ക് അവർ ജന്മം നൽകി. അതിൽ 16 ജോഡി ഇരട്ടകൾ, ഏഴ് ജോഡി ട്രിപ്പിൾസ്, നാല് ജോഡി ക്വാഡ്രപ്ലെറ്റുകൾ എന്നിവർ ഉൾപ്പെടുന്നു. 1725-65 കാലഘട്ടത്തിൽ ജനിച്ച രണ്ട് കുട്ടികൾ മാത്രം ശൈശവാവസ്ഥയിൽ തന്നെ മരണപ്പെട്ടു.
റഷ്യയിലെ ഷുയയിലെ ഫിയോഡർ വാസിലിയേവ് എന്ന കർഷകന്റെ ആദ്യ ഭാര്യയായിരുന്നു വാലന്റീന വാസിലിയേവ. 1700 -കളിലാണ് ഈ കുടുംബം ജീവിച്ചിരുന്നത്. ഗിന്നസ് വേൾഡ് റെക്കോർഡ് അനുസരിച്ച്, “എക്കാലത്തെയും സമ്പുഷ്ടമായ അമ്മ” അവരാണ്. ആ സ്ത്രീ 40 വർഷത്തിനിടയിൽ 27 തവണ പ്രസവിച്ചുവത്രെ. അതായത് അവരുടെ ജീവിതത്തിൽ 18 വർഷക്കാലം അവർ ഗർഭിണിയായിരുന്നു. വാലന്റീനയുടെ കഥ 1782 ഫെബ്രുവരി 27 -ന് നിക്കോൾസ്കിലെ മൊണാസ്ട്രിയും 1783 -ൽ ജെന്റിൽമെൻസ് മാസികയും റിപ്പോർട്ട് ചെയ്തിരുന്നു. എന്നിട്ടും പക്ഷേ പലരും ഇത് വിശ്വസിക്കാൻ തയ്യാറായില്ല. പ്രധാനമായും ധാരാളം കുട്ടികൾ അവരുടെ ശൈശവാവസ്ഥയിൽ മരിക്കുന്ന ഒരു കാലഘട്ടത്തിൽ ഇത് സാധ്യമല്ലെന്ന് പലരും കരുതി.
എന്നിരുന്നാലും, ഇത് തള്ളിപ്പറഞ്ഞുകൊണ്ട് ഗിന്നസ് വേൾഡ് ബുക്ക് ഓഫ് റിപ്പോർട്ടുകൾ അവരുടെ രേഖകളെ ന്യായീകരിച്ചു. ഒരൊറ്റ ചക്രത്തിൽ ഒന്നിലധികം അണ്ഡം അഥവാ ഹൈപ്പർ ഓവുലേറ്റ് ചെയ്യാനുള്ള സാധ്യതയുണ്ടെന്ന് അവർ അഭിപ്രായപ്പെട്ടു. ഇത് ഇരട്ടകളോ ഒന്നിലധികം കുട്ടികളോ ഉണ്ടാകാനുള്ള സാധ്യത വർദ്ധിപ്പിക്കുന്നു, അതാണ് വാലന്റീനയുടെ കേസിൽ സംഭവിച്ചത്. 76 -ാം വയസ്സിലാണ് വാലന്റീന മരണപ്പെടുന്നത്. അവരുടെ ഭർത്താവ് രണ്ടാമതും വിവാഹം കഴിക്കുകയുണ്ടായി. രണ്ടാമത്തെ ഭാര്യയിൽ അദ്ദേഹത്തിന് 18 കുട്ടികളുണ്ടായി, ആറ് ജോഡി ഇരട്ടകളും രണ്ട് ജോഡി ട്രിപ്പിൾസും. ആകെ 87 കുട്ടികളുടെ പിതാവായിരുന്നു അദ്ദേഹം. അതേസമയം ആ ദമ്പതികളെ കുറിച്ച് കൂടുതൽ വിവരങ്ങൾ ഒന്നും ലഭ്യമല്ല.