ഇന്ത്യയുടെ ഫെഡറൽ ധനക്കമ്മി സംബന്ധിച്ച കണക്കുകൾ പുറത്ത്; 2019-20 ൽ ധനക്കമ്മി നാല് ശതമാനത്തിന് മുകളിൽ

മാർച്ചിൽ അവസാനിച്ച 2019 -20 സാമ്പത്തിക വർഷത്തിൽ ഇന്ത്യയുടെ ഫെഡറൽ ധനക്കമ്മി ജിഡിപിയുടെ 4.6 ശതമാനത്തിലെത്തിയിരുന്നു. 

ദില്ലി: നടപ്പ് സാമ്പത്തിക വർഷത്തിന്റെ ആദ്യ രണ്ട് മാസങ്ങളിലെ ഇന്ത്യയുടെ ഫെഡറൽ ധനക്കമ്മി 4.66 ട്രില്യൺ രൂപയായി (61.67 ബില്യൺ ഡോളർ). ഇത് നടപ്പ് സാമ്പത്തിക വർഷത്തെ ബജറ്റ് ലക്ഷ്യത്തിന്റെ 58.6 ശതമാനം ആണെന്ന് സർക്കാർ പുറത്തുവിട്ട കണക്കുകൾ വ്യക്തമാക്കുന്നു.

ഏപ്രിൽ-മെയ് കാലയളവിൽ അറ്റനികുതി വരുമാനം 33,850 കോടി രൂപ (4.48 ബില്യൺ ഡോളർ) ആയിരുന്നു. മൊത്തം ചെലവ് 5.12 ട്രില്യൺ രൂപയായിരുന്നുവെന്നും കണക്കുകൾ വ്യക്തമാക്കുന്നു. മാർച്ചിൽ അവസാനിച്ച 2019 -20 സാമ്പത്തിക വർഷത്തിൽ ഇന്ത്യയുടെ ഫെഡറൽ ധനക്കമ്മി ജിഡിപിയുടെ 4.6 ശതമാനത്തിലെത്തിയിരുന്നു. സർക്കാരിന്റെ ബജറ്റ് ലക്ഷ്യം 3.3 ശതമാനമായിരുന്നു. 

2020-21ൽ കേന്ദ്രത്തിന്റെ ധനക്കമ്മി മൊത്തം ആഭ്യന്തര ഉൽപാദനത്തിന്റെ 3.5 ശതമാനത്തേക്കാൾ 1.7-1.8 ശതമാനം കൂടുതലായിരിക്കുമെന്ന് കേന്ദ്ര സർക്കാരിന്റെ മുഖ്യ സാമ്പത്തിക ഉപദേഷ്ടാവായ (സിഇഎ) കൃഷ്ണമൂർത്തി സുബ്രഹ്മണ്യൻ അഭിപ്രായപ്പെട്ടതായി ബിസിനസ് സ്റ്റാൻഡേർഡ് റിപ്പോർട്ട് ചെയ്യുന്നു.