മുകേഷ്​ അംബാനി കുടുംബത്തിന്​ ഏഷ്യയിലെ അതിസമ്പന്ന പട്ടം

ദില്ലി: സാംസങ്​ കമ്പനിയുടെ ഉടമകളായ ലീ കുടുംബത്തെ രണ്ടാം സ്​ഥാനത്തേക്ക്​ പിന്തള്ളി മുകേഷ്​ അംബാനിയുടെ കുടുംബം ഏഷ്യയിലെ അതിസമ്പന്ന പട്ടികയിൽ മുന്നിൽ. ഫോബ്​സ്​ മാഗസി​നാണ്​ വൻകരയിലെ അതിസമ്പന്നരുടെ പട്ടിക പുറത്തുവിട്ടത്​. മൊത്തം ആസ്​തി 19 ബില്യൺ ഡോളറിൽ നിന്ന്​ 44.8 ഡോളറാക്കിയാണ്​ അംബാനി കുടുംബത്തി​ന്‍റെ കുതിപ്പ്​. ആസ്​തിയിൽ 11.2 ബില്യൺ ഡോളറി​ന്‍റെ വളർച്ച  ഉണ്ടായ ലീ കുടുംബത്തി​ന്‍റെ മൊത്തം ആസ്​തി 40.8 ബില്യൺ ഡോളറാണ്​. കഴിഞ്ഞ വർഷത്തെ അപേക്ഷിച്ച്​ സാംസങ്​ ഇലക്​ട്രോണിക്​സിന്‍റെ ഒാഹരിയിൽ 75 ശതമാനം വർധന രേഖപ്പെടുത്തിയിട്ടുണ്ട്​. 

ഏഷ്യയിലെ ഏറ്റവും വലിയ റിയൽ എസ്​റ്റേറ്റ്​ കമ്പനിയായ സൺഹങ്​കായ്​ പ്രോപ്പർട്ടീസ്​ ഉടമകളായ ഹോംഗോങിലെ കോക്ക്​ കുടുംബമാണ്​ ധനാഡ്യരുടെ പട്ടികയിൽ മൂന്നാമത്​. 40.4 ബില്യൺ ഡോളറാണ്​ ഇവരുടെ മൊത്തം ആസ്​തി. തായ്​ലന്‍റിലെ കരിയോൺ പോക്​ഫന്‍റ്​ ഗ്രൂപ്പ്​ ഉടമകളായ ചിറാവനൻറ്​ കുടുംബമാണ്​ 36.6 ബില്യൺ ഡോളർ ആസ്​തിയുമായി നാലാം സ്​ഥാനത്ത്​. ആദ്യ പത്തിൽ ഇടംപിടിച്ച ഏക ഇന്ത്യക്കാരൻ കൂടിയാണ്​ മുകേഷ്​ അംബാനി.

കഴിഞ്ഞ വർഷം ഇന്ത്യയിൽ മുകേഷ്​ അംബാനിയോളം തരംഗമായി നേട്ടം കൊയ്​ത കമ്പനികൾ വേറെയില്ലെന്നാണ്​ ഫോബ്​സ്​ മാഗസിൻ പറയുന്നത്​. റിലയൻസ്​ വ്യവസായങ്ങളുടെ തലവനും ​ഭൂരിഭാഗം ഒാഹരി ഉടമയുമാണ്​ മുകേഷ്​ അംബാനി. ടെലികോം മേഖലയിൽ ജിയോയുടെ വരവാണ്​ മുകേഷിനെ സമ്പന്നരുടെ പട്ടികയിൽ മുന്നിലെത്തിച്ചത്​. 

ഫോബ്​സ്​ പട്ടികയിൽ ഇന്ത്യൻ കുടുംബം മുന്നിൽ വരുന്നത്​ മൂന്നാം തവണയാണ്​. പട്ടികയിൽ വിപ്രോ ഉടമ അസീം പ്രേംജിയുടെ കുടുംബം 11ാം സ്​ഥാനത്തും (19.2 ബില്യൺ ഡോളർ ആസ്​തി), ഹിന്ദുജ കുടുംബം (18.8 ബില്യൺ) 12ാം സ്​ഥാനത്തും മിത്തൽ കുടുംബം (17.2 ബില്യൺ) 14ാം സ്​ഥാനത്തും മിസ്​ട്രി കുടുംബം (16.1 ബില്യൺ) 16ാം സ്​ഥാനത്തും ബിർല കുടുംബം (14.1 ബില്യൺ) 19ാം സ്​ഥാനത്തും എത്തിയ ഇന്ത്യൻ വ്യവസായ ഭീമൻമാരാണ്​. 

ഗോദ്​റെജ്​ കുടുംബം 20ഉം ബജാജ്​ കുടുംബം 26ഉം ജിൻഡാൽ കുടുംബം 32ഉം ബർമൻസ്​ കുടുംബം 35ഉം എയ്​ച്ചർ മോ​ട്ടോഴ്​സ്​ ഗ്രൂപ്പ്​ 36ഉം ശ്രീ സിമന്‍റ്​ ഉടമകളായ ബംഗൂർ കുടുംബം 37ഉം സ്​ഥാനങ്ങളിലുണ്ട്​. 50 കുടുംബങ്ങളുടെ പട്ടികയാണ്​ ഫോബ്​സ്​ പ്രസിദ്ധീകരിച്ചത്​.