ടിക്കറ്റ്​ റദ്ദാക്കൽ വഴി റെയിൽവെയുടെ നേട്ടം 1400 കോടി

ന്യൂഡൽഹി: കഴിഞ്ഞ സാമ്പത്തിക വർഷം റെയിൽവെ ടിക്കറ്റ്​ റദ്ദാക്കൽ ചാർജ്​ ഇനത്തിൽ റെയിൽവെക്ക്​ 1400 കോടി രൂപയുടെ വരുമാനം. ഇതിന്​ തൊട്ടുമുമ്പത്തെ വർഷത്തെ അപേക്ഷിച്ച്​ 25 ശതമാനത്തിൻ്റെ വർധനയാണിത്​. 2015 മുതൽ കാൻസലേഷൻ ചാർജ്​ ഇരട്ടിയാക്കിയതാണ്​​ ഇൗ ഇനത്തിലുള്ള വരുമാന വർധനവിന്​ കാരണമെന്നാണ്​ കരുതുന്നത്​. രാജ്യസഭയിൽ രേഖാമൂലം നൽകിയ മറുപടിയിൽ റെയിൽവെ സഹമന്ത്രി രജൻ ഗൊഹയിൻ ആണ്​ ഇക്കാര്യം അറിയിച്ചത്​.

2015ലെ റെയിൽവെ പാസഞ്ചർ ചട്ടപ്രകാരമാണ്​ യാത്രക്കാരിൽ നിന്ന്​ റദ്ദാക്കുന്ന ടിക്കറ്റുകൾക്ക്​ കാൻസലേഷൻ ചാർജ്​ ഇൗടാക്കുന്നത്​. വ്യവസ്​ഥകൾക്ക്​ വിധേയമായി യാത്ര നിരക്ക്​ തിരികെ നൽകാനും ചട്ടത്തിൽ വ്യവസ്​ഥയുണ്ട്​. എന്നാൽ കാൻസലേഷൻ ചാർജ്​ തിരികെ നൽകാൻ ചട്ടപ്രകാരം വ്യവസ്​ഥയില്ലെന്ന്​ മന്ത്രി പറഞ്ഞു. ദക്ഷിണ-മധ്യ റെയിൽവെ 2016 -17ൽ റിസർവ്​ ചെയ്​ത ടിക്കറ്റുകളുടെ ക്ലറിക്കൽ ചാർജ്​ ഇനത്തിൽ 103.27 കോടി രൂപ നേട്ടമുണ്ടാക്കിയതായും മന്ത്രി പറഞ്ഞു. 2015 നവംബർ മുതൽ  മുമ്പുള്ള ഉറപ്പായ 3 എ.സി ടിക്കറ്റുകളുടെ  കാൻസ​ലേഷൻ  ചാർജ്​ 90 രൂപയിൽ നിന്ന്​ 180 ആക്കി ഉയർത്തിയിരുന്നു.  2 എ.സി ടിക്കറ്റുകളുടെത്​ 100 രൂപയിൽ നിന്ന്​ 200 ആയും ഉയർത്തിയിരുന്നു. ഉറപ്പായ സ്ലീപ്പർ ക്ലാസുകളുടെ കാൻസലേഷൻ ചാർജ്​ ഇരട്ടിയാക്കുകയും ചെയ്​തിരുന്നു. സെക്കൻഡ്​ ക്ലാസ്​ ടിക്കറ്റുകളുടെ ചാർജ്​ 30 രൂപയിൽ നിന്ന്​ 60 ആക്കി വർധിപ്പിക്കുകയും ചെയ്​തിരുന്നു. പുതിയ ചട്ടപ്രകാരം ട്രെയിൻ പുറപ്പെട്ടുകഴിഞ്ഞാൽ ടിക്കറ്റ്​ തുക തിരികെ ലഭിക്കാൻ വ്യവസ്​ഥയില്ല.