Mahaveeryar Song: 'രാധേ രാധേ വസന്തരാധേ തേടുന്നാരെ'; 'മഹാവീര്യറി'ലെ ആദ്യഗാനം
Synopsis
ബി.കെ ഹരിനാരായണന്റെ വരികള്ക്ക് ഇഷാന് ചബ്രയാണ് സംഗീതം നല്കിയിരിക്കുന്നത്. വിദ്യാധരന് മാസ്റ്ററും ജീവന് പത്മകുമാറുമാണ് ഗാനം പാടിയിരിക്കുന്നത്.
നിവിന് പോളി (Nivin Pauly), ആസിഫ് അലി (Asif Ali) എന്നിവർ പ്രധാന കഥാപാത്രങ്ങളായി എത്തുന്ന മഹാവീര്യര് (Mahaveeryar) എന്ന ചിത്രത്തിലെ ആദ്യഗാനം പുറത്തിറങ്ങി. രാധേ രാധേ വസന്തരാധേ എന്ന ഗാനത്തിന്റെ ലിറിക്ക് വീഡിയോ ആണ് പുറത്തിറങ്ങിയിരിക്കുന്നത്. ബി.കെ ഹരിനാരായണന്റെ വരികള്ക്ക് ഇഷാന് ചബ്രയാണ് സംഗീതം നല്കിയിരിക്കുന്നത്. വിദ്യാധരന് മാസ്റ്ററും ജീവന് പത്മകുമാറുമാണ് ഗാനം പാടിയിരിക്കുന്നത്.
എബ്രിഡ് ഷൈന് തിരക്കഥയും സംവിധാനവും നിര്വ്വഹിച്ച ചിത്രമാണ് മഹാവീര്യർ. കോടതിയിലെ നിയമ വ്യവഹാരങ്ങളുടെ പശ്ചാത്തലത്തില് കഥ പറയുന്ന ചിത്രത്തില് ടൈം ട്രാവലും ഫാന്റസിയുമൊക്കെ കടന്നുവരുന്നുണ്ട്. നര്മ്മ, വൈകാരിക മുഹൂര്ത്തങ്ങള്ക്കും പ്രാധാന്യം നല്കുന്ന ചിത്രമാണിത്. ഏറെ കൗതുകം നിറഞ്ഞ കാഴ്ചകളോടെ ഉള്ളതാണ് ടീസര്. പ്രശസ്ത എഴുത്തുകാരന് എം മുകുന്ദന്റെ കഥയെ ആസ്പദമാക്കിയാണ് എബ്രിഡ് ഷൈന് തിരക്കഥയൊരുക്കിയിരിക്കുന്നത്.
പോളി ജൂനിയർ പിക്ചേഴ്സ്, ഇന്ത്യൻ മൂവി മേക്കർസ് എന്നീ ബാനറുകളിൽ നിവിൻ പോളി, പി എസ് ഷംനാസ് എന്നിവർ ചേർന്നാണ് നിര്മ്മാണം. ലാൽ, ലാലു അലക്സ്, സിദ്ദിഖ്, ഷാൻവി ശ്രീവാസ്തവ, വിജയ് മേനോൻ, മേജർ രവി, മല്ലിക സുകുമാരൻ, സുധീർ കരമന, കൃഷ്ണ പ്രസാദ്, പദ്മരാജ് രതീഷ്, സുധീർ പറവൂർ, കലാഭവൻ പ്രജോദ്, പ്രമോദ് വെളിയനാട്, ഷൈലജ പി അമ്പു തുടങ്ങിയവർ മുഖ്യ വേഷങ്ങളിലെത്തുന്നു. വലിയ ക്യാൻവാസിൽ ചിത്രീകരിച്ചിരിക്കുന്ന ഈ ചലച്ചിത്രം പുതിയ കാഴ്ചകൾ സമ്മാനിക്കുന്ന കാമ്പുള്ള ഒന്നായിരിക്കും എന്ന് അണിയറ പ്രവർത്തകർ അവകാശപ്പെടുന്നു. വര്ഷങ്ങൾക്കു ശേഷമാണ് നിവിന് പോളിയും ആസിഫ് അലിയും ഒരുമിച്ച് അഭിനയിക്കുന്നത്. 1983, ആക്ഷന് ഹീറോ ബിജു എന്നീ സൂപ്പർഹിറ്റ് ചിത്രങ്ങള്ക്ക് ശേഷം മൂന്നാം തവണ നിവിന് പോളിയും എബ്രിഡ് ഷൈനും ഒന്നിക്കുന്ന ചിത്രവുമാണ് മഹാവീര്യര്. രാജസ്ഥാനിലും കേരളത്തിലുമായാണ് ചിത്രീകരണം പൂര്ത്തിയാക്കിയത്. കൊവിഡ് മഹാമാരിക്കിടെ ഒട്ടേറെ വെല്ലുവിളികള് നേരിട്ടാണ് വലിയ ബജറ്റില് ചിത്രത്തിന്റെ ഷൂട്ടിംഗ് പൂര്ത്തീകരിച്ചത്.
സംസ്ഥാന അവാർഡ് ജേതാവ് ചന്ദ്രു സെൽവരാജ് ആണ് ഛായാഗ്രഹണം. ഇഷാൻ ചാബ്ര സംഗീതവും പശ്ചാത്തല സംഗീതവും ഒരുക്കിയിരിക്കുന്നു. ചിത്ര സംയോജനം മനോജ്, ശബ്ദ മിശ്രണം വിഷ്ണു ഗോവിന്ദ്, ശ്രീ ശങ്കർ, കലാ സംവിധാനം അനീസ് നാടോടി, വസ്ത്രാലങ്കാരം ചന്ദ്രകാന്ത്, മെൽവി ജെ, ചമയം ലിബിൻ മോഹനൻ, മുഖ്യ സഹ സംവിധാനം ബേബി പണിക്കർ, പിആർഒ എ എസ് ദിനേശ്.