ജസ്റ്റിന് വര്ഗീസിന്റെ സംഗീതം, ആലാപനത്തില് ഒപ്പം രമ്യ നമ്പീശന്; ഓണപൂപ്പാട്ടുമായി ഏഷ്യാനെറ്റ്
Synopsis
ടെക്നോളജിയുടെ സഹായത്തോടെ തുമ്പ, തെച്ചി, ചെമ്പരത്തി, ശംഖുപുഷ്പം തുടങ്ങിയ പുഷ്പങ്ങൾ പുറത്തുവിടുന്ന തരംഗങ്ങളെ സംഗീതമാക്കിയാണ് ഗാനം ഒരുക്കിയിരിക്കുന്നത്
ഓണത്തിന് ഏറെ പ്രത്യേകതകളുള്ള ഒരു ഗാനം പുറത്തുവിട്ട് ഏഷ്യാനെറ്റ്. ലോകത്തിലെ ആദ്യത്തെ ഓണപൂപ്പാട്ട് എന്ന വിശേഷണത്തോടെ എത്തിയിരിക്കുന്ന ഗാനം ലോഞ്ച് ചെയ്തത് ബിഗ് ബോസ് മലയാളം സീസണ് 7 ന്റെ ഇക്കഴിഞ്ഞ വാരാന്ത്യ എപ്പിസോഡില് മോഹന്ലാല് ആണ്. ജസ്റ്റിൻ വർഗീസ്, രമ്യ നമ്പീശന് എന്നിവരുമായി ചേർന്നാണ് ഗാനം രൂപപ്പെടുത്തിയിരിക്കുന്നത്. ടെക്നോളജിയുടെ സഹായത്തോടെ തുമ്പ, തെച്ചി, ചെമ്പരത്തി, ശംഖുപുഷ്പം തുടങ്ങിയ പുഷ്പങ്ങൾ പുറത്തുവിടുന്ന തരംഗങ്ങളെ സംഗീതമാക്കി ഒരു മനോഹരഗാനം സൃഷ്ടിച്ചിരിക്കുകയാണ്. സ്വന്തം പറമ്പിലെ പൂക്കൾ കൊണ്ട് പൂക്കളം ഒരുക്കിയിരുന്ന പഴയ ഓണകാലത്തെ ഇത് ഓർമ്മപ്പെടുത്തുന്നു.
നമ്മുടെ പൂർവികർ ഓരോ പൂവും ഓരോ പ്രത്യേക കാരണത്താലാണ് പൂക്കളത്തിലേക്ക് തെരഞ്ഞെടുത്തിരുന്നത്. എന്നാൽ കാലക്രമത്തിൽ ആ അറിവ് പലതും നഷ്ടപ്പെട്ടു. ഈ വീഡിയോ അവയുടെ മഹത്വം വീണ്ടും ഓർമ്മിപ്പിക്കുകയും കുടുംബവും സുഹൃത്തുക്കളും ചേർന്ന് പൂക്കൾ പറിക്കാൻ പോകുന്ന മധുരമായ ഓർമ്മകൾ തിരികെ കൊണ്ടുവരുകയും ചെയ്യും. ഓരോ പൂവിനും ശാസ്ത്രീയവും സാംസ്കാരികവും ആത്മീയവും കാലാവസ്ഥാനുസൃതവുമായ അർത്ഥമുണ്ട്. ഉദാഹരണത്തിന് തുമ്പപ്പൂ വിശുദ്ധമായി കരുതപ്പെടുന്ന പൂവാണ്. മുക്കുറ്റി ഭാഗ്യവും സമൃദ്ധിയും നൽകുമെന്നാണ് വിശ്വാസം. തെച്ചി ഭക്തിയെയും ശക്തിയെയും പ്രതിനിധീകരിക്കുന്നു. ഇങ്ങനെ ഓരോ പൂവിനും പ്രത്യേക അർത്ഥങ്ങളുണ്ട്. ഇവയുടെ ഓർമ്മപ്പെടുത്തൽ കൂടിയാണ് ഈ പൂപ്പാട്ടെന്ന് അണിയറക്കാര് വിശദീകരിക്കുന്നു.