ഇനി മുതൽ ലോണെടുക്കുമ്പോൾ സൂക്ഷിക്കണേ! കുറഞ്ഞ ഇഎംഐ കണ്ട് മയങ്ങരുത്; ചെറിയ മുന്കൂര് അടവുകള് നല്കും വലിയ ലാഭം
Synopsis
കുറഞ്ഞ ഇഎംഐ വാഗ്ദാനം ചെയ്യുന്ന ലോണുകൾ തിരഞ്ഞെടുക്കുന്നത് പലപ്പോഴും ഒരു കെണിയാണ്. ഇത് തിരിച്ചടവ് കാലയളവ് കൂട്ടുകയും മൊത്തത്തിൽ വലിയൊരു തുക പലിശയായി നൽകേണ്ടി വരികയും ചെയ്യും. അതിനാൽ, പലിശനിരക്ക്, പ്രോസസ്സിംഗ് ഫീസ്, ഹിഡൻ ചാർജുകൾ തുടങ്ങിയ കാര്യങ്ങൾ കൂടി പരിഗണിച്ച് സ്വന്തം സാമ്പത്തിക ഭാവിക്കിണങ്ങിയ ലോൺ ആണ് തിരഞ്ഞെടുക്കേണ്ടത്.
ഒരു ലോണ് എടുക്കാന് പോകുമ്പോള് നമ്മള് ആദ്യം ശ്രദ്ധിക്കുന്നത് ഇഎംഐ എത്രയാണെന്നാണ്. ആ തുക നമ്മുടെ പോക്കറ്റിലൊതുങ്ങുന്നതാണെങ്കില് ലോണ് എടുക്കാം എന്ന് തീരുമാനിക്കും. ഭൂരിഭാഗം പേരും ഇങ്ങനെയാണ് തീരുമാനങ്ങളെടുക്കുന്നത്. എന്നാല് ഈ ഇഎംഐ ചിലപ്പോള് ഒരു കെണിയാകാം. കുറഞ്ഞ ഇഎംഐ എന്നാല് കൂടുതല് കാലത്തെ തിരിച്ചടവ് എന്നാണ് അര്ഥം. അതായത്, കാലക്രമേണ ബാങ്കിന് നല്കേണ്ടി വരുന്നത് വലിയൊരു തുക പലിശയായിരിക്കും. അതിനാല് ഇന്ന് ഇഎംഐ അടക്കാന് കഴിയുമോ എന്നതല്ല, ഈ ലോണ് ഓരോരുത്തരുടേയും സാമ്പത്തിക നിലയുമായി ഒത്തുപോകുന്നതാണോ എന്നതാണ് യഥാര്ത്ഥത്തില് ചിന്തിക്കേണ്ട കാര്യം.
താങ്ങാനാകുന്ന തിരിച്ചടവ് മാത്രം
ലോണുകള് തമ്മില് താരതമ്യം ചെയ്യുന്നതിന് മുന്പ് നിങ്ങളുടെ സാമ്പത്തിക പരിമിതികള് വ്യക്തമായി മനസിലാക്കണം. മാസവരുമാനത്തിന്റെ ഒരു നിശ്ചിത ശതമാനം മാത്രമേ ഇഎംഐ ആയി മാറ്റിവെക്കാവൂ എന്നാണ് പൊതുവായ നിയമം. ഇത് പരിധി കടന്നാല്, വരുമാനത്തിലോ ചെലവിലോ ഉണ്ടാകുന്ന ചെറിയ മാറ്റങ്ങള് പോലും നിങ്ങളെ വലിയ സമ്മര്ദ്ദത്തിലാക്കും. ഇന്നത്തെ അവസ്ഥ മാത്രം നോക്കിയാല് പോരാ. ഭാവിയില് ചെലവുകളും ഉത്തരവാദിത്തങ്ങളും കൂടും. എന്നാല് വരുമാനം അതേ വേഗത്തില് വളരണമെന്നില്ല. അതിനാല് ചെറിയൊരു കരുതല് എപ്പോഴും വലിയൊരു ആശ്വാസമാകും.
കാലയളവ് കൂടിയാല് ചെലവും കൂടും
കുറഞ്ഞ ഇഎംഐ എന്ന വാഗ്ദാനം നല്കി ബാങ്കുകള് സാധാരണയായി തിരിച്ചടവ് കാലയളവ് നീട്ടിത്തരികയാണ് ചെയ്യുന്നത്. രേഖകളില് ഇത് കാണുമ്പോള് എളുപ്പമാണെന്ന് തോന്നാം. എന്നാല് വായ്പ കൂടുതല് കാലം നീണ്ടുനില്ക്കുന്നതുകൊണ്ട്, കൂടുതല് വര്ഷത്തേക്ക് പലിശ ഈടാക്കിക്കൊണ്ടേയിരിക്കും. മാസത്തില് അടക്കുന്ന തുക കുറവാണെങ്കിലും, അവസാനം കണക്കുകൂട്ടുമ്പോള് പ്രതീക്ഷിച്ചതിലും വലിയൊരു തുക പലിശയായി മാത്രം നല്കേണ്ടി വരും. കുറഞ്ഞ കാലയളവില് അല്പം കൂടിയ ഇഎംഐ അടക്കുന്നതാണ് മൊത്തം പലിശ കുറയ്ക്കാന് എപ്പോഴും നല്ലത്.
പലിശ നിരക്ക് മാത്രം നോക്കിയാല് പോരാ
പലിശ നിരക്കുകള് നോക്കി ലോണുകള് താരതമ്യം ചെയ്യുന്നത് സ്വാഭാവികമാണ്. എന്നാല് ഈ നിരക്കുകള് എപ്പോഴും പൂര്ണ്ണമായ വിവരങ്ങള് നല്കണമെന്നില്ല. ചില ലോണുകള്ക്ക് പലിശ കുറവായിരിക്കുമെങ്കിലും പ്രോസസിംഗ് ഫീസും മറ്റ് ചാര്ജുകളും കൂടുതലായിരിക്കും. അതുപോലെ പലിശ നിരക്ക് ഫിക്സഡ് ആണോ അതോ ഫ്ലോട്ടിംഗ് ആണോ എന്നും പരിശോധിക്കണം. ഫ്ലോട്ടിംഗ് നിരക്കുകള് കാലക്രമേണ മാറിയേക്കാം. പലിശ നിരക്ക് കൂടിയാല് നിങ്ങളുടെ ഇഎംഐ അല്ലെങ്കില് തിരിച്ചടവ് കാലയളവ് വര്ദ്ധിക്കും. അതിനാല് പലിശ നിരക്ക് മാത്രമല്ല, ലോണിന്റെ മൊത്തം ചെലവ് വിലയിരുത്തുന്നത് വ്യക്തമായ ചിത്രം നല്കും.
ചെറിയ മുന്കൂര് അടവുകള് വലിയ മാറ്റമുണ്ടാക്കും
വലിയൊരു തുക കൈയില് വന്നതിന് ശേഷം മാത്രം പ്രീപേയ്മെന്റ് നടത്താം എന്ന് ചിന്തിക്കുന്നവരാണ് മിക്കവരും. എന്നാല് വായ്പാ വ്യവസ്ഥകള് അനുവദിക്കുന്നുണ്ടെങ്കില്, ഇടയ്ക്കിടെ അടക്കുന്ന ചെറിയ തുകകള് പോലും മൊത്തം ചെലവ് ഗണ്യമായി കുറയ്ക്കും. എത്രയും നേരത്തെ ഇത് ചെയ്യുന്നുവോ അത്രയും വലിയ ഫലം ഉണ്ടാകും.
ഹിഡൻ ചാർജസ് ശ്രദ്ധിക്കുക
പ്രോസസിംഗ് ഫീസ്, പ്രീപേയ്മെന്റ് ചാര്ജുകള്, പിഴകള് , ഇന്ഷുറന്സ് എന്നിവ വായ്പയുടെ ചിലവ് വര്ദ്ധിപ്പിക്കുന്ന കാര്യങ്ങളാണ്. ലോണ് തുകയുമായി താരതമ്യം ചെയ്യുമ്പോള് ഇത് ചെറുതായി തോന്നാമെങ്കിലും, മൊത്തത്തില് നോക്കുമ്പോള് ഇതൊരു വലിയ തുകയാകും. അതിനാല് ലോണ് ഉറപ്പിക്കുന്നതിന് മുന്പ് എല്ലാ ചാര്ജുകളുടെയും പൂര്ണ്ണമായ വിവരങ്ങള് ചോദിച്ചു മനസിലാക്കുക.