യുപിഐ ഇടപാടുകൾക്ക് എംഡിആർ ഏർപ്പെടുത്തും; ദീപാവലിക്ക് ശേഷം നടപ്പാക്കും, അറിയേണ്ട 5 കാര്യങ്ങൾ

ദീപാവലിക്ക് ശേഷം തിരഞ്ഞെടുക്കപ്പെട്ട യുപിഐ ഇടപാടുകൾക്ക് മർച്ചന്റ് ഡിസ്‍കൌണ്ട് റേറ്റ് (എംഡിആർ) ഏർപ്പെടുത്താൻ തീരുമാനം. 2000 രൂപയ്ക്ക് മുകളിലുള്ള വ്യാപാരി ഇടപാടുകൾക്കാണ് പുതിയ നിരക്ക് ബാധകമാകുക. എന്നാൽ സാധാരണ ഉപഭോക്താക്കൾ നടത്തുന്ന യുപിഐ പേയ്‌മെന്റുകൾ സൗജന്യമായി തന്നെ തുടരും.

തിരഞ്ഞെടുത്ത യുപിഐ ഇടപാടുകൾക്ക് മർച്ചന്റ് ഡിസ്‍കൌണ്ട് റേറ്റ് (എംഡിആർ) ഏർപ്പെടുത്താനുള്ള തീരുമാനം ദീപാവലിക്ക് ശേഷം നടപ്പാക്കും. വ്യാപാരികളുടെ അഭ്യർഥന പരിഗണിച്ചാണ് നടപടി. 2026 ഒക്ടോബർ 15ന് പ്രാബല്യത്തിൽ വരേണ്ടിയിരുന്ന പുതിയ നിരക്കുകൾ നവംബർ രണ്ടാം വാരത്തോടെ നടപ്പാക്കാനാണ് നീക്കം. കൃത്യമായ തീയതി നാഷണൽ പേയ്‌മെന്റ്‌സ് കോർപ്പറേഷൻ ഓഫ് ഇന്ത്യ (എൻപിസിഐ) ഇത് വരെ പ്രഖ്യാപിച്ചിട്ടില്ല. പുതിയ നിർദേശപ്രകാരം, നിശ്ചിത പരിധിക്ക് മുകളിലുള്ള ചില വ്യാപാരി ഇടപാടുകൾക്കാണ് നിരക്ക് ബാധകമാകുക. സാധാരണ ഉപഭോക്താക്കൾ നടത്തുന്ന യുപിഐ പേയ്‌മെന്റുകൾ സൗജന്യമായി തുടരും.

യുപിഐ നിരക്കുകൾ നടപ്പാക്കുന്നത് വൈകിയത് എന്തുകൊണ്ട്?

ഉത്സവകാലത്തെ തിരക്ക് കണക്കിലെടുത്ത് ഒക്ടോബർ 13നാണ് യുപിഐ ആൻഡ് സർവീസസ് സ്റ്റിയറിങ് കമ്മിറ്റി നിരക്കുകൾ നടപ്പാക്കുന്നത് ദീപാവലിക്ക് ശേഷമാക്കാൻ തീരുമാനിച്ചത്. ഉത്സവ വിപണിയിൽ അധിക ചെലവുകളും പേയ്‌മെന്റ് സംവിധാനങ്ങളിലെ മാറ്റങ്ങളും ഒരേസമയം കൈകാര്യം ചെയ്യുന്നത് ബുദ്ധിമുട്ടാകുമെന്ന് വ്യാപാരികൾ ചൂണ്ടിക്കാട്ടിയിരുന്നു. ബാങ്കുകൾക്കും പേയ്‌മെന്റ് കമ്പനികൾക്കും വ്യാപാരികൾക്കും പുതിയ സംവിധാനത്തിനായി തയ്യാറെടുക്കാൻ കൂടുതൽ സമയം ലഭിക്കുമെന്നതും തീരുമാനത്തിന് പിന്നിലുണ്ട്.

വ്യാപാരികൾ എത്ര രൂപ നൽകണം?

സെപ്റ്റംബറിൽ അംഗീകരിച്ച ചട്ടക്കൂട് പ്രകാരം, 2,000 രൂപയ്ക്ക് മുകളിലുള്ള യോഗ്യമായ വ്യക്തിയിൽനിന്ന് വ്യാപാരിയിലേക്കുള്ള യുപിഐ ഇടപാടുകൾക്ക് 0.4 ശതമാനം എംഡിആർ ബാധകമാകും. 3,000 രൂപയുടെ ഇടപാടിന് 12 രൂപയും 10,000 രൂപയ്ക്ക് 40 രൂപയും നിരക്കായി നൽകേണ്ടിവരും. 50,000 രൂപയുടെ ഇടപാടിന് 200 രൂപയാണ് നിരക്ക്. 75,000 രൂപയോ അതിൽ കൂടുതലോ ഉള്ള ഇടപാടുകൾക്ക് പരമാവധി 300 രൂപയായിരിക്കും. റെയിൽവേ, ടെലികോം, ഇൻഷുറൻസ്, ഇന്ധനം തുടങ്ങിയ ചില മേഖലകളിൽ 2,000 രൂപയ്ക്ക് മുകളിലുള്ള യോഗ്യമായ ഇടപാടുകൾക്ക് അഞ്ച് രൂപ നിരക്ക് ബാധകമാകും. മൂലധന വിപണിയിലെ ഇടപാടുകൾക്ക് 0.02 ശതമാനമാണ് നിരക്ക്. ഇതിന് 300 രൂപ പരമാവധി പരിധിയുണ്ട്.

ഉപഭോക്താക്കൾ പണം നൽകേണ്ടിവരുമോ?

ഇല്ല. പുതിയ ചട്ടക്കൂട് പ്രകാരം എംഡിആർ നിരക്ക് വ്യാപാരികൾക്കാണ് ബാധകമാകുക. ഈ ചെലവ് ഉപഭോക്താക്കളിൽനിന്ന് ഈടാക്കാൻ വ്യാപാരികൾക്ക് അനുവാദമുണ്ടാകില്ല. വ്യക്തികൾ തമ്മിലുള്ള പണമിടപാടുകൾക്കും സ്വന്തം അക്കൗണ്ടുകൾ തമ്മിലുള്ള കൈമാറ്റങ്ങൾക്കും യുപിഐ ഓട്ടോപേ ഇടപാടുകൾക്കും നിരക്ക് ബാധകമാകില്ല.

2,000 രൂപ വരെയുള്ള ഇടപാടുകൾ സൗജന്യമായി തുടരും

2,000 രൂപ വരെയുള്ള വ്യാപാരി ഇടപാടുകൾക്ക് എംഡിആർ ഉണ്ടായിരിക്കില്ല. വ്യക്തിയിൽ നിന്ന് വ്യാപാരിയിലേക്കുള്ള യുപിഐ ഇടപാടുകളിൽ 95 ശതമാനത്തിൽ അധികവും ഈ വിഭാഗത്തിലാണെന്നാണ് ചട്ടക്കൂട് വ്യക്തമാക്കുന്നത്. പ്രതിമാസം ഒരു ലക്ഷം രൂപ വരെ സ്വീകരിക്കുന്ന ചെറുകിട വ്യാപാരികൾക്കും പ്രത്യേക വിഭാഗത്തിൽ നിരക്കിളവ് തുടരും. നിലവിലുള്ള ക്യു ആർ കോഡുകൾ മാറ്റേണ്ട ആവശ്യവുമില്ല. അതിനാൽ പലചരക്ക് സാധനങ്ങൾക്കും ഭക്ഷണത്തിനും മറ്റും പതിവായി യുപിഐ വഴി പണം നൽകുന്ന ഉപഭോക്താക്കൾക്ക് അധിക നിരക്ക് നൽകേണ്ടിവരില്ല.

എംഡിആർ ഏർപ്പെടുത്തുന്നതിന് പിന്നിലെ ലക്ഷ്യമെന്ത്?

യുപിഐ സംവിധാനം പ്രവർത്തിപ്പിക്കാൻ വലിയ ചെലവ് വരുന്നുണ്ടെന്നാണ് കേന്ദ്ര സർക്കാരിന്‍റെ വിശദീകരണം. യുപിഐയുടെ പ്രവർത്തനച്ചെലവ് പ്രതിവർഷം ഏകദേശം 20,000 കോടി രൂപയാണെന്നാണ് ധനമന്ത്രാലയത്തിന്റെ കണക്ക്. പേയ്‌മെന്റ് അടിസ്ഥാനസൗകര്യങ്ങൾ, സൈബർ സുരക്ഷ, തട്ടിപ്പ് തടയൽ, സാങ്കേതിക നവീകരണം, ഉപഭോക്തൃ സേവനം എന്നിവയ്ക്കുള്ള ചെലവുകൾ കണ്ടെത്താൻ പുതിയ നിരക്കുകൾ സഹായിക്കുമെന്നാണ് പ്രതീക്ഷിക്കുന്നത്. ചെറുനഗരങ്ങളിലും ഗ്രാമപ്രദേശങ്ങളിലും വടക്കുകിഴക്കൻ സംസ്ഥാനങ്ങളിലും ജമ്മു കശ്മീരിലും ലഡാക്കിലും ഡിജിറ്റൽ പേയ്‌മെന്റ് സംവിധാനങ്ങൾ വ്യാപിപ്പിക്കുന്നതിനായി പ്രത്യേക ഫണ്ടും ചട്ടക്കൂടിൽ നിർദേശിക്കുന്നുണ്ട്.

ശ്രദ്ധിക്കുക: പുതിയ നിരക്കുകളുടെ കൃത്യമായ പ്രാബല്യ തീയതി എൻപിസിഐയുടെ ഔദ്യോഗിക പ്രഖ്യാപനത്തിന് ശേഷമേ വ്യക്തമാകൂ.