ജനവിധി 2019: യുപിഎ സീറ്റുകൾ ഇരട്ടിക്കും, ബിജെപി ഒറ്റയ്ക്ക് ഭൂരിപക്ഷം നേടും: എക്‌സിറ്റ് പോൾ ഫലങ്ങൾ - LIVE

ഒന്നര മാസത്തോളം നീണ്ട തെരഞ്ഞെടുപ്പ് പ്രവർത്തനങ്ങൾ അവസാനിച്ചിരിക്കുകയാണ്. ഇനി ഫലം വരാൻ മണിക്കൂറുകൾ മാത്രം ബാക്കി. ഇക്കുറി ആര് ഇന്ത്യ ഭരിക്കുമെന്ന ചോദ്യമാണ് പ്രസക്തം. 

കഴിഞ്ഞ തവണ ബിജെപി ഒറ്റയ്ക്ക് ഭൂരിപക്ഷം നേടിയതിന് സമാനമായ ഫലമാണ് ഇപ്പോൾ എക്സിറ്റ് പോൾ ഫലങ്ങളെല്ലാം പ്രവചിക്കുന്നത്. സിഎൻഎൻ ന്യൂസ് 18 എൻഡിഎക്ക്ക് 336 സീറ്റുകളും യുപിഎക്ക് 82 സീറ്റും മറ്റുള്ളവർക്ക് 124 സീറ്റുമാണ് പ്രവചിച്ചത്.

ടൈംസ് നൗ പുറത്തുവിട്ട എക്സിറ്റ് പോൾ ഫലങ്ങൾ പ്രകാരം 306 സീറ്റുകളാണ് എൻഡിഎക്ക് ലഭിക്കുക. 132 സീറ്റ് കോൺഗ്രസിന് പ്രവചിക്കുമ്പോൾ 104 സീറ്റുകളാണ് മറ്റ് പാർട്ടികൾക്ക് പ്രവചിക്കുന്നത്.

റിപ്പബ്ലിക് ചാനലിന്റെ എക്സിറ്റ് പോൾ ഫലങ്ങൾ പ്രകാരം 287 സീറ്റിലാണ് എൻഡിഎ വിജയിക്കാൻ സാധ്യതയുള്ളത്. യുപിഎക്ക് 128 സീറ്റ് വരെ കിട്ടാം. മറ്റ് പാർട്ടികളും 127 സീറ്റ് വരെ വിജയിക്കാമെന്നും അവർ പറയുന്നു.

ഇന്ത്യാ ടുഡെയാണ് ഏറ്റവുമധികം സീറ്റുകളിൽ ബിജെപിക്കും എൻഡിഎയ്ക്കും വിജയം പ്രവചിക്കുന്നത്. 365 സീറ്റ് വരെ എൻഡിഎ നേടിയേക്കാമെന്ന് അവർ പറയുന്നു. 108 സീറ്റിൽ യുപിഎയും  69 സീറ്റിൽ മറ്റുള്ളവരും വിജയിക്കുമെന്നാണ് ഇന്ത്യ ടുഡെ പുറത്തുവിട്ട ഫലം.

ന്യൂസ് എക്സ് 298 സീറ്റിൽ എൻഡിഎയ്ക്കും 118 സീറ്റിൽ യുപിഎയക്കും 126 സീറ്റിൽ മറ്റ് പാർട്ടികൾക്കും വിജയം പ്രവചിക്കുന്നു. എബിപി ന്യൂസാണ് ഇന്ത്യയിൽ ഒരു മുന്നണിക്കും ഭൂരിപക്ഷം ലഭിക്കില്ലെന്ന് പ്രവചിച്ചിരിക്കുന്നത്. എൻഡിഎക്ക് 267 സീറ്റ് മാത്രമേ ലഭിക്കൂവെന്നും യുപിഎയ്ക്ക് 127 സീറ്റ് വരെ മാത്രമേ ലഭിക്കൂവെന്നും മറ്റുള്ളവർ 148 സീറ്റിലും വിജയിക്കും.

അതേസമയം കേരളത്തിൽ സിഎൻഎൻ ന്യൂസ് 18 മാത്രമാണ് ഇടതുമുന്നണിക്ക് മുന്നേറ്റം ഉണ്ടാകുമെന്ന് പറഞ്ഞിരിക്കുന്നത്. മറ്റെല്ലാ ഫലങ്ങളും 10 മുതൽ 16 സീറ്റ് വരെ യുഡിഎഫിന് മുന്നേറ്റം പ്രവചിക്കുന്നു. ബിജെപിക്ക് ഒന്ന് മുതൽ മൂന്ന് സീറ്റ് വരെ ജയിക്കാനുള്ള സാഹചര്യം ഉണ്ടെന്നും പറയുന്നു. സിഎൻഎൻ ന്യൂസ് 18 ഫലം പ്രകാരം ഇടതുപക്ഷം 13 വരെ സീറ്റുകളിൽ വിജയിക്കും.

ഹിന്ദി ഹൃദയഭൂമിയിൽ ബിജെപി വൻ മുന്നേറ്റം നടത്തുന്ന തെരഞ്ഞെടുപ്പിൽ കോൺഗ്രസിന് അവർ ഭരിക്കുന്ന സംസ്ഥാനങ്ങളിൽ പോലും കനത്ത തിരിച്ചടിയുണ്ടാകുമെന്നാണ് എക്സിറ്റ് പോൾ ഫലങ്ങൾ പറയുന്നത്.

ഉത്തർപ്രദേശിൽ എസ്‌പി-ബിഎസ്‌പി സഖ്യം വലിയ വിജയം നേടുമെന്ന് എബിപി ന്യൂസ് പ്രവചിക്കുമ്പോൾ മറ്റാരുടെയും ഫലം ഇതുമായി ചേർന്നു നിൽക്കുന്നതല്ല. ബിജെപി വോട്ട് വിഹിതം വർധിക്കുമെന്നും 68 സീറ്റുകൾ വരെ നേടാമെന്നുമാണ് പ്രവചനം.

ഉത്തർപ്രദേശിൽ കോൺഗ്രസിന് ഒരു സീറ്റ് മാത്രമേ ലഭിക്കൂവെന്ന് ഇന്ത്യ ടുഡെ എക്സിറ്റ് പോൾ ഫലം. സോണിയ ഗാന്ധി റായ്‌ബറേലിയിൽ നിന്നും രാഹുൽ ഗാന്ധി അമേഠിയിൽ നിന്നും മത്സരിക്കുന്ന ഉത്തർപ്രദേശിൽ ഇവരുടെ വിജയപ്രതീക്ഷ പോലും നേരിയതാണെന്ന് സംശയം ഉയർത്തുകയാണ് ഇന്ത്യ ടുഡെ.

ബിജെപിക്ക് ചരിത്രത്തിലെ ഏറ്റവും വലിയ വിജയമെന്ന് ഇന്ത്യ ടുഡെ. 339 മുതൽ 368 വരെ സീറ്റുകളിൽ ബിജെപിയും സഖ്യകക്ഷികളും വിജയിക്കുമെന്നാണ് ഇന്ത്യാ ടുഡെയുടെ എക്സിറ്റ് പോൾ ഫലം.

യുപിയിൽ 48 ശതമാനം വോട്ട് ബിജെപിക്കെന്ന് ആക്സിസ് മൈ ഇന്ത്യ. കഴിഞ്ഞ തവണത്തേക്കാൾ നാല് ശതമാനം വോട്ടിന്റെ വർദ്ധനവാണ് ഉണ്ടാവുക. എസ്‌പി-ബിഎസ്‌പി മഹാസഖ്യത്തിന് 38 ശതമാനം വോട്ട് മാത്രമേ ലഭിക്കൂ. 

ആലത്തൂരില്‍ രമ്യ ഹരിദാസ് പാട്ടുംപാടി ജയിക്കുമെന്ന് എക്സിറ്റ് പോൾ ഫലം. എല്‍ ഡി എഫ് കണ്‍വീനര്‍ എ വിജയരാഘവന്‍റെ സ്ത്രീ വിരുദ്ധ പരാമര്‍ശമടക്കം ഇടതുപക്ഷത്തിന് തിരിച്ചടിയായെന്നാണ് സൂചന. പി കെ ബിജുവിന്‍റെ ഹാട്രിക് വിജയമെന്ന സ്വപ്നം ആലത്തൂരില്‍ തകരുമെന്നും സിപിഎമ്മിന്റെ ഉറച്ച കോട്ടയായ ആലത്തൂർ ഇതോടെ വലത്തോട്ട് ചായുമെന്നുമാണ് എക്സിറ്റ് പോൾ പ്രവചനം.

ഏറെ പ്രാധാന്യത്തോടെ നോക്കിക്കാണുന്ന താരമണ്ഡലങ്ങളാണ് ചാലക്കുടിയും തൃശൂരും. ചാലക്കുടിയില്‍ സിറ്റിങ് എംപി കൂടിയായ ഇന്നസെന്‍റും, എന്‍ഡിഎ ഏറെ പ്രതീക്ഷ വയ്ക്കുന്ന താര സ്ഥാനാര്‍ത്ഥി സുരേഷ് ഗോപിയും പരാജയപ്പെടുമെന്നാണ് എക്സിറ്റ് പോള്‍ ഫലം പുറത്തുവന്നരിക്കുന്നത്. ചാലക്കുടിയില്‍ യുഡിഎഫിന്‍റെ ബെന്നി ബെഹ്നാന്‍ 46 ശതമാന വോട്ട് നേടി വിജയിക്കും. ഇന്നസെന്‍റിന് 37 ശതമാനം വോട്ടും എന്‍ഡിഎയയുടെ എഎന്‍ രാധാകൃഷ്ണന് 12 ശതമാനം വോട്ടുമാണ് മാതൃഭൂമി ന്യൂസും ജിയോ വൈഡ് ഇന്ത്യയും ചേര്‍ന്ന് നടത്തിയ സര്‍വേ പ്രവചിക്കുന്നത്. തൃശൂരില്‍ എന്‍ഡിഎ പ്രതീക്ഷകള്‍ അസ്ഥാനത്താണെന്നും സര്‍വേ പറയുന്നു. യുഡിഎഫിന്‍റെ ടിഎന്‍ പ്രതാപന് 38 ശതമാനം വോട്ടും എല്‍ഡിഎഫിന്‍റെ രാജാജി മാത്യു തോമസിന് 35 ശതമാനം വോട്ടും പ്രവചിക്കുന്ന സര്‍വേ സുരേഷ് ഗോപിക്ക് 23 ശതമാനം വോട്ടാണ് പ്രവചിക്കുന്നത്.

സിഎൻഎൻ ന്യൂസ് 18 എക്സിറ്റ് പോളിൽ എൻഡിഎക്ക് 336 സീറ്റ് ലഭിക്കുമെന്ന് പ്രവചനം. യുപിഎക്ക് 82 സീറ്റുമാണ് ഈ സർവേയിൽ പ്രവചിക്കുന്നത്.

ബിജെപി കേവല ഭൂരിപക്ഷം തൊടില്ലെന്ന് എബിപി സർവേ. ആകെ പുറത്തുവന്ന എക്സിറ്റ് പോളുകളിൽ എബിപി മാത്രമാണ് രാജ്യത്ത് തൂക്കുസഭ വരുമെന്ന് പ്രവചിച്ചത്. 267 സീറ്റ് എൻഡിഎക്കും 127 സീറ്റ് യുപിഎക്കും 56 സീറ്റ് എസ്‌പി-ബിഎസ്‌പി സഖ്യത്തിനും 96 സീറ്റുകൾ മറ്റുള്ളവർക്കും പ്രവചിക്കുന്നതാണ് എബിപി സർവേ.

ഉത്തർപ്രദേശിൽ ബിജെപി മുന്നേറ്റം തടയാൻ സഖ്യമായി മത്സരിച്ച എസ്‌പിക്കും ബിഎസ്‌പിക്കും 56 സീറ്റാണ് എബിപി ന്യൂസ് പ്രവചിച്ചത്. ടൈംസ് നൗ ബിജെപിക്ക് പ്രവചിച്ചതും 56 സീറ്റ്. എബിപി ബിജെപിക്ക് 20 സീറ്റുകൾ പ്രവചിച്ചപ്പോൾ ടൈംസ് നൗ എസ്‌പി-ബിഎസ്‌പി സഖ്യത്തിന് 20 സീറ്റ് ലഭിക്കുമെന്ന് പറഞ്ഞു

വോട്ടിംഗ് മെഷീൻ തിരിമറി നടത്താനാണ് ബിജെപിക്ക് എക്സിറ്റ് പോൾ വിജയം പ്രവചിക്കുന്നത് എന്ന് ബംഗാൾ മുഖ്യമന്ത്രി മമത ബാനർജി. ഞാൻ എക്സിറ്റ് പോൾ ഫലങ്ങളിൽ വിശ്വസിക്കുന്നില്ല. എല്ലാ പ്രതിപക്ഷ പാർട്ടികളോടും ഒന്നിച്ച് നിന്ന് പോരാടാൻ ഞാൻ ആവശ്യപ്പെടുന്നുവെന്നും മമത പറഞ്ഞു.

എന്നാൽ എല്ലാ എക്സിറ്റ് പോൾ ഫലങ്ങളും തെറ്റാണെന്ന് പറയാൻ സാധിക്കില്ലെന്ന് ഒമർ അബ്ദുള്ള പറഞ്ഞു. ടിവിയും സോഷ്യൽ മീഡിയയും ഓഫ് ചെയ്ത് ലോകത്തിൽ എന്തെങ്കിലും പ്രതീക്ഷ ബാക്കിയുണ്ടോയെന്ന് നോക്കുകയാണെന്ന് ഒമർ അബ്ദുള്ള പ്രതികരിച്ചു.

പശ്ചിമ ബംഗാളിൽ സിപിഎമ്മിന് സീറ്റ് കിട്ടില്ലെന്ന് എബിപി ന്യൂസും. തൃണമൂൽ കോൺഗ്രസിന് 28 സീറ്റും ബിജെപിക്ക് 11 സീറ്റുകൾ വരെയും പ്രവചിക്കുന്നു. ശേഷിക്കുന്ന സീറ്റുകളിൽ യുപിഎ ആണ് വിജയിക്കുക.

ആംആദ്മി പാർട്ടിക്ക് ഡൽഹിയിൽ ഒരു സീറ്റ് പോലും കിട്ടില്ലെന്ന് ഇന്ത്യ ടുഡെ സർവെ. ആകെയുള്ള ഏഴ് സീറ്റിലും ബിജെപി ജയിക്കും. കോൺഗ്രസിന് രണ്ട് സീറ്റുകൾ വരെ കിട്ടിയേക്കാമെന്നാണ് പ്രവചനം.

ഛത്തീസ്‌ഗഡ്, ഗുജറാത്ത്, ഡൽഹി, ഹരിയാന, ഉത്തരാഖണ്ഡ്, മധ്യപ്രദേശ്, രാജസ്ഥാൻ, കർണ്ണാടക, ആസാം, ഹിമാചൽ പ്രദേശ് സംസ്ഥാനങ്ങളിൽ ബിജെപിക്ക് വലിയ മുന്നേറ്റമാണ് ടുഡെയ്സ് ചാണക്യ പ്രവചിക്കുന്നത്.

വെസ്റ്റ് ബംഗാളിൽ സിപിഎമ്മിന് "വട്ടപ്പൂജ്യം" എന്ന് ന്യൂസ് എക്സ്. തൃണമൂൽ കോൺഗ്രസിന് 29 സീറ്റും, ബിജെപിക്ക് 11 സീറ്റും പ്രവചിക്കുന്നതിനൊപ്പം കോൺഗ്രസിന് രണ്ട് സീറ്റുകളും പ്രവചിക്കുന്നു. സിപിഎമ്മിനും സഖ്യകക്ഷികൾക്കും സീറ്റൊന്നും ലഭിക്കില്ലെന്നാണ് ന്യൂസ് എക്സ് പറയുന്നത്.

ഉത്തർപ്രദേശിൽ മഹാസഖ്യം തകർന്നടിയുമെന്ന് എക്സിറ്റ് പോൾ പ്രവചനം. ആകെയുള്ള 80 സീറ്റുകളിൽ എൻഡിഎ 58 സീറ്റുകൾ നേടുമെന്നാണ് ടൈംസ് നൗ പറയുന്നത്. മഹാസഖ്യത്തിന് 20 സീറ്റ് മാത്രം. കോൺഗ്രസിന്‍റെ നേതൃത്വത്തിലുള്ള യുപിഎയ്ക്ക് വൻ തിരിച്ചടിയാകും. രണ്ട് സീറ്റുകൾ മാത്രമേ കോൺഗ്രസിന് ലഭിക്കൂ.

ആദ്യഘട്ടത്തില്‍ പോളിങ് നടന്ന അന്ധ്ര പ്രദേശിലെ 25 സീറ്റുകളില്‍ കോണ്‍ഗ്രസ് തകര്‍ന്നടിയുമെന്ന് ദേശീയ മാധ്യമമായ ന്യൂസ് 18ന്റെ സര്‍വ്വേയിൽ പറയുന്നു. ആന്ധ്രയില്‍ കോണ്‍ഗ്രസ് തകരുമെന്ന സൂചനകള്‍ നല്‍കുന്നത്. വൈഎസ് ആര്‍ കോണ്‍ഗ്രസ് 13-14 സീറ്റുകളും ടിഡിപി10-12 സീറ്റുകളും ബിജെപി 1സീറ്റും നേടുമെന്നാണ് പ്രവചനം. കോണ്‍ഗ്രസിന് ആന്ധ്ര പ്രദേശില്‍ സീറ്റുകള്‍ ലഭിക്കില്ലെന്നാണ് ന്യൂസ് 18 എക്സിറ്റ് പോള്‍ ഫലങ്ങള്‍ സൂചിപ്പിക്കുന്നത്. തെലങ്കാനയിലെ 17 സീറ്റുകളില്‍  കോണ്‍ഗ്രസ് നേടുക 2 സീറ്റുകള്‍ വരെയാകാമെന്ന് എക്സിറ്റ് പോള്‍ ഫലങ്ങള്‍. ടി ആര്‍ എസ് 12-14 സീറ്റുകളും, ബിജെപി 1-2 സീറ്റുകളും നേടുമെന്നാണ് പ്രവചനം.

ഇടതുപക്ഷത്തിന് ആശ്വാസമായി രണ്ട് എക്സിറ്റ് പോള്‍ ഫലങ്ങള്‍. ന്യൂസ് 18, ന്യൂസ് നേഷന്‍ ചാനലുകള്‍ പുറത്തുവിട്ട സര്‍വ്വെകളാണ് എല്‍ ഡി എഫിന് ആശ്വാസം പകരുന്നത്. ന്യൂസ് 18 കേരളത്തില്‍ ഇടതുമുന്നേറ്റമാണ് പ്രവചിക്കുന്നത്. 11 മുതല്‍ 13 വരെ സീറ്റുകള്‍ ഇടതുമുന്നണി നേടുമെന്നാണ് പ്രവചനം. ന്യൂസ് നേഷനാകട്ടെ ഇടതുപക്ഷത്തിന് 5 മുതല്‍ 7 വരെ സീറ്റുകളാണ് പ്രവചിക്കുന്നത്. മറ്റ് സര്‍വ്വെകളെല്ലാം ഇടതുപക്ഷത്തിന് 4 സീറ്റുവരെയാണ് പരമാവധി പ്രവചിച്ചിരിക്കുന്നത്.

വടക്കന്‍ കേരളത്തില്‍ യുഡിഎഫിന് മേല്‍ക്കൈ പ്രവചിച്ച് എക്സിറ്റ് പോള്‍ ഫലം. കാസര്‍കോട് മുതല്‍ പാലക്കാട് വരെയുള്ള എട്ടിൽ  ആറ് മണ്ഡലങ്ങളിലും യുഡിഎഫ് നേടുമെന്നും മാതൃഭൂമി ന്യൂസും ജിയോ വൈഡ് ഇന്ത്യയും ചേര്‍ന്ന് നടത്തിയ സര്‍വേയില്‍ പറയുന്നു.
 

കേരളത്തിൽ ബിജെപി അക്കൗണ്ട് തുറക്കാനുള്ള സാധ്യത പ്രവചിച്ച് എക്സിറ്റ് പോൾ ഫലങ്ങൾ. ഒരു സീറ്റ് മുതൽ മൂന്ന് സീറ്റ് വരെ ബിജെപിക്ക് വിജയ സാധ്യതയുണ്ടെന്നാണ് വിവിധ എക്സിറ്റ് പോൾ ഫലങ്ങൾ പ്രവചിക്കുന്നത്. ന്യൂസ് നേഷൻ, കേരളത്തിൽ എൻഡിഎ 1 മുതൽ 3 വരെ സീറ്റ് നേടുമെന്നാണ് പ്രവചിക്കുന്നത്. യുഡിഎഫ് 11 മുതൽ 13 വരെ സീറ്റ് കിട്ടുമെന്ന പ്രവചിക്കുന്ന സര്‍വെ എൽഡിഎഫ് നേടുമെന്ന് കണക്ക് കൂട്ടുന്നത് 5 മുതൽ 7 സീറ്റ് വരെയാണ്. 

ടൈംസ് നൗ സര്‍വെ പ്രകാരം കേരളത്തിൽ യുഡിഎഫിന്  15 സീറ്റും എൽഡിഎഫിന്  4 സീറ്റും  ബിജെപിക്ക് 1സീറ്റുമാണ് ലഭിക്കാനിടയുള്ളത്.  ബിജെപി കേരളത്തിൽ ഒരു സീറ്റ് നേടുമെന്ന് ഇന്ത്യാടുഡെ പറയുന്നു.  ന്യൂസ് എക്സ് നേതാ സര്‍വെയും കേരളത്തിൽ ബിജെപി അക്കൗണ്ട് തുറക്കുമെന്നാണ് പ്രവചിക്കുന്നത്. ഒരു സീറ്റിൽ ബിജെപി വിജയിക്കാനിടയുണ്ടെന്നാണ് ന്യൂസ് എക്സ് നേതാ സര്‍വെ ഫലം

ടുഡെയ്സ് ചാണക്യയുടെ എക്സിറ്റ് പോൾ പ്രവചനങ്ങൾ ഇങ്ങിനെയാണ്. തെലങ്കാനയിൽ ടിആർഎസിനും ആസാമിൽ ബിജെപിക്കും ആന്ധ്രപ്രദേശിൽ തെലുഗുദേശം പാർട്ടിക്കും മുന്നേറ്റം പ്രവചിക്കുകയാണ് ടുഡെയ്സ് ചാണക്യ.

കേരളത്തിൽ യുഡിഎഫെന്ന് ന്യൂസ് നേഷൻ എക്സിറ്റ് പോളും. 11 മുതൽ 15 സീറ്റുകൾ വരെ യുഡിഎഫ് നേടുമെന്നാണ് പ്രവചിക്കുന്നത്. ഇടതുമുന്നണിക്ക് ഏഴ് സീറ്റുകൾ വരെ കിട്ടും. ഒരു സീറ്റിൽ ബിജെപി ജയിക്കാൻ സാധ്യതയുണ്ടെന്നും എക്സിറ്റ് പോൾ ഫലം പറയുന്നു.

ഇന്ത്യയിലെ ഏറ്റവും വലിയ എക്സിറ്റ് പോൾ എന്ന അവകാശവാദത്തോടെ രണ്ട് എക്സിറ്റ് പോളുകളാണ് റിപ്പബ്ലിക് ടിവി നടത്തിയത്. 287 സീറ്റുകൾ നേടി നരേന്ദ്രമോദി സർക്കാർ വീണ്ടും അധികാരത്തിലെത്തുമെന്നാണ് റിപ്പബ്ലിക് ടിവി, സി വോട്ടറുമായി ചേർന്ന് നടത്തിയ എക്സിറ്റ് പോൾ സർവേ പ്രവചിക്കുന്നത്. യുപിഎ 128 സീറ്റുകളും ഉത്തർപ്രദേശിലെ എസ്‍പി, ബിഎസ്‍പി സഖ്യം 40 സീറ്റുകളും വിജയിക്കും. മറ്റുള്ളവർ 87 സീറ്റുകൾ നേടും. എൻഡിഎ 287, യുപിഎ 128, മറ്റുള്ളവർ 127 സീറ്റുകളിലും ജയിക്കും. 

300 സീറ്റുകളിലേറെ നേടി എൻഡിഎ അധികാരത്തിലെത്തുമെന്നാണ് റിപ്പബ്ലിക് ടിവി ജൻ കി ബാത്തുമായി ചേർന്ന് നടത്തിയ എക്സിറ്റ് പോൾ സർവേ പ്രവചിക്കുന്നത്. എൻഡിഎ 295 മുതൽ 305 സീറ്റുകൾ വരെ നേടുമെന്നാണ് പ്രവചനം. യുപിഎ 122 മുതൽ 124 സീറ്റുകൾ വരെ നേടും. മഹാസഖ്യം 26 സീറ്റുകൾ വരെ നേടിയേക്കാം. മറ്റുള്ളവർ 87 സീറ്റുകൾ വരെ നേടുമെന്നും ജൻ കി ബാത്ത് പ്രവചിക്കുന്നു.

ഉത്തർപ്രദേശ് ഒഴികെ ഹിന്ദി ഹൃദയഭൂമി ബിജെപി തൂത്തുവാരുമെന്ന് ഫലങ്ങൾ. മഹാരാഷ്ട്രയിലും രാജസ്ഥാനിലും മധ്യപ്രദേശിലും ഡൽഹിയിലും കർണ്ണാടകയിലും ഗോവയിലും ബിജെപിക്ക് വ്യക്തമായ മുന്നേറ്റമാണ് പ്രവചിക്കുന്നത്. 

കേരളത്തിൽ യുഡിഎഫിന് 15 സീറ്റെന്ന് ടൈംസ് നൗ. ഇടതുമുന്നണിക്ക് നാലും ബിജെപിക്ക് ഒരു സീറ്റും ലഭിക്കുമെന്ന് എക്സിറ്റ് പോൾ പ്രവചനം

കേരളത്തിൽ യുഡിഎഫ് വൻ തരംഗമുണ്ടാക്കുമെന്ന് ഇന്ത്യാ ടുഡെ എക്സിറ്റ് പോൾ. ആകെയുള്ള 20 സീറ്റിൽ 15 മുതൽ 16 വരെ സീറ്റാണ് സര്‍വെയിൽ യുഡിഎഫിന് പ്രവചിക്കുന്നത്. ഇടത് മുന്നണി പരമാവധി അഞ്ച് സീറ്റ് വരെ മാത്രമേ നേടൂവെന്ന് സര്‍വെ പറയുന്നു. ബിജെപിക്ക് കിട്ടാവുന്നത് പരമാവധി ഒരു സീറ്റാണെന്നും സര്‍വെ പറയുന്നു. 

306 സീറ്റുകൾ മോദിയുടെ നേതൃത്വത്തിലുള്ള എൻഡിഎക്ക് നൽകി ടൈംസ് നൗ - വിഎംആർ എക്സിറ്റ് പോൾ ഫലം. യുപിഎക്ക് 132 സീറ്റുകളും, മറ്റുള്ളവർക്ക് 104 സീറ്റുകളും ടൈംസ് നൗ. ബിജെപി ഒറ്റക്ക് 300 സീറ്റ് കടക്കും എന്ന് ടൈംസ് നൗ പറയുന്നില്ല. പക്ഷേ എൻഡിഎ മുന്നണി 300 സീറ്റുകൾ നേടുമെന്ന് ടൈംസ് നൗ വ്യക്തമായി പറയുന്നു. എൻഡിഎ: 41.1%, യുപിഎ: 31.7%, മറ്റുള്ളവർ: 27.2% എന്നിങ്ങനെ വോട്ട് നേടുമെന്നും പ്രവചിക്കുന്നുണ്ട്.

കർണ്ണാടകത്തിലും ബിജെപിയെന്ന് സർവേ ഫലം. 20 സീറ്റുകൾ വരെ ബിജെപി നേടുമെന്ന് സുവർണ്ണ ന്യൂസും 18 സീറ്റുകൾ വരെ നേടുമെന്ന് ടിവി 9 ഉം പ്രവചിക്കുന്നു.

മധ്യപ്രദേശിൽ ബിജെപി മുന്നേറ്റം പ്രവചിച്ച് ആക്സിസ് മൈ ഇന്ത്യ. 26 മുതൽ 28 സീറ്റ് വരെ കോൺഗ്രസ് നേടുമെന്നും പരമാവധി മൂന്ന് സീറ്റുകൾ വരെ കോൺഗ്രസ് നേടുമെന്നും എക്സിറ്റ് പോൾ പ്രവചിക്കുന്നു. 

വടകരയിൽ യുഡിഎഫ് സ്ഥാനാർത്ഥി കെ മുരളീധരൻ ജയിക്കുമെന്ന് സർവേ ഫലം. മാതൃഭൂമി ന്യൂസും ജിയോ വൈഡ് ഇന്ത്യയും ചേര്‍ന്ന് നടത്തിയ സര്‍വേ ഫലത്തിലാണ് പ്രവചനം. വയനാട്ടിൽ 51 ശതമാനം വോട്ട് കോൺഗ്രസ് ദേശീയ അദ്ധ്യക്ഷൻ രാഹുൽ ഗാന്ധി നേടുമെന്നാണ് ഈ സർവേ ഫലം പ്രവചിക്കുന്നത്.

കണ്ണൂരിൽ കെ സുധാകരൻ ജയിക്കുമെന്ന് എക്സിറ്റ് പോൾ ഫലം. മാതൃഭൂമി ന്യൂസും ജിയോ വൈഡ് ഇന്ത്യയും ചേര്‍ന്ന് നടത്തിയ സര്‍വേ ഫലത്തിലാണ് പ്രവചനം. 

.

കാസര്‍കോട് ലോക്സഭാ മണ്ഡലത്തില്‍ രാജ് മോഹന്‍ ഉണ്ണിത്താന്‍ ജയിക്കുമെന്ന് എക്സിറ്റ് പോള്‍ ഫലം. മാതൃഭൂമി ന്യൂസും ജിയോ വൈഡ് ഇന്ത്യയും ചേര്‍ന്ന് നടത്തിയ സര്‍വേ ഫലത്തിലാണ് പ്രവചനം. യുഡിഎഫിന് 46 ശതമാനം വോട്ടുകള്‍ നേടും, 33 ശതമാനം  വോട്ടുകള്‍ എല്‍ഡിഎഫിനും, ബിജെപിക്ക് 18 ശതമാനം വോട്ടുകള്‍ നേടുമെന്നും സര്‍വേ പറയുന്നു. 

ന്യൂസ് എക്സ് സർവേ ഫലവും ബിജെപിക്ക് അനുകൂലം. ബിജെപി സഖ്യത്തിന് 298, യുപിഎ ക്ക്118, എസ്പി-ബിഎസ്പി സഖ്യത്തിന് 25, മറ്റുള്ളവർക്ക് 101 സീറ്റുകളുമാണ് പ്രവചിക്കുന്നത്.

തമിഴ്‌നാട്ടിൽ ഡിഎംകെ സഖ്യം തൂത്തുവാരുമെന്ന് ടൈംസ് നൗ എക്സിറ്റ് പോൾ ഫലം. 34 മുതൽ 38 സീറ്റ് വരെ ഡിഎംകെ-കോൺഗ്രസ്-സിപിഎം തുടങ്ങിയ പാർട്ടികളുൾപ്പെട്ട സഖ്യം നേടുമെന്ന് പ്രവചനം.

മോദിക്ക് കേവല ഭൂരിപക്ഷം പ്രഖ്യാപിച്ച് സീവോട്ടർ എക്സിറ്റ് പോൾ ഫലം. 287 സീറ്റുകളിലാണ് സീവോട്ടർ ബിജെപിക്ക് വിജയം പ്രവചിച്ചിരിക്കുന്നത്. 

എൻഡിഎ 306 സീറ്റിൽ ജയിക്കുമെന്ന് ടൈംസ് നൗ ചാനലിന്റെ എക്സിറ്റ് പോൾ ഫലം. 132 സീറ്റിൽ യുപിഎ ജയിക്കുമെന്നും 104 സീറ്റിൽ മറ്റുള്ളവർ വിജയിക്കുമെന്നാണ് എക്സിറ്റ് പോൾ ഫലത്തിൽ ചൂണ്ടിക്കാട്ടുന്നത്.

തെരഞ്ഞെടുപ്പ് കമ്മിഷനെതിരെ ആഞ്ഞടിച്ചിരിക്കുകയാണ് കോൺഗ്രസ് ദേശീയ അദ്ധ്യക്ഷൻ രാഹുൽ ഗാന്ധി. ഇലക്ടറൽ ബോണ്ടിൽ തുടങ്ങി, വോട്ടിങ് മെഷീൻ, തെരഞ്ഞെടുപ്പ് ഷെഡ്യൂളിനെ മാറ്റിയത്, നമോ ടിവി, മോദിയുടെ സൈന്യം, ഇപ്പോൾ കേദാർനാഥിലെ നാടകവും, മോദിയുടെയും അദ്ദേഹത്തിന്റെ സംഘത്തിന്റെയും മുന്നിൽ തെരഞ്ഞെടുപ്പ് കമ്മിഷൻ കാണിക്കുന്ന വിധേയത്വം ഇന്ത്യയിലെ ജനങ്ങൾ തിരിച്ചറിഞ്ഞുവെന്നാണ് രാഹുൽ ഗാന്ധി ട്വീറ്റിൽ കുറിച്ചത്. ബിജെപി നേതാക്കൾക്കെതിരായ പരാതികളിൽ തെരഞ്ഞെടുപ്പ് കമ്മിഷൻ സ്വീകരിക്കുന്ന അയഞ്ഞ സമീപനമാണ് രാഹുൽ ഗാന്ധിയെ ചൊടിപ്പിച്ചത്.

ഏഴ് ലക്ഷം പേരുടെ അഭിപ്രായം തേടിയെന്ന് ആക്സിസ് മൈ ഇന്ത്യ. ഇക്കുറി ആറ് ഘട്ട വോട്ടെടുപ്പ് പൂർത്തിയായപ്പോഴേക്കും വോട്ടർമാരിൽ ഏഴ് ലക്ഷം പേരുടെ അഭിപ്രായം നേരിട്ട് തേടിയെന്ന് ആക്സിസ് മൈ ഇന്ത്യ എന്ന ഏജൻസി വ്യക്തമാക്കിയിരുന്നു.

യുപിഎ സർക്കാരിനെതിരെ ശക്തമായ ജനവിരുദ്ധ വികാരം പ്രതിഫലിച്ച 2014 ൽ എക്സിറ്റ് പോൾ ഫലങ്ങൾ ഇങ്ങിനെയായിരുന്നു. 

സിഎൻഎൻ-സിഎസ്ഡിഎസ്-ലോക്‌നീതി സർവ്വേ : യുപിഎ 92-102 എൻഡിഎ 270-282 മറ്റുള്ളവർ 125-171

ഇന്ത്യ ടുഡേ- സിസെറോ സർവ്വേ: യുപിഎ 110-120 എൻഡിഎ 261-283 മറ്റുള്ളവർ 150-162

ന്യൂസ് 24-ചാണക്യ : യുപിഎ 61-79 എൻഡിഎ 326-356 മറ്റുള്ളവർ 122-144

ന്യൂസ് 24 ഉം ടുഡെയ്സ് ചാണക്യയും ചേർന്ന് നടത്തിയ സർവേ ഫലമായിരുന്നു യഥാർത്ഥ ഫലവുമായി കൂടുതൽ ചേർന്ന് നിന്നത്.

അതിശക്തമായ കർഷക പ്രതിഷേധങ്ങളാണ് രാജസ്ഥാൻ, മധ്യപ്രദേശ്, മഹാരാഷ്ട്ര തുടങ്ങിയ സംസ്ഥാനങ്ങളിലെല്ലാം സമീപകാലങ്ങളിൽ അരങ്ങേറിയത്. രാജ്യതലസ്ഥാനമായ ഡൽഹിയും , മുംബൈയും വരെ സ്തംഭിച്ച് നിന്ന പ്രക്ഷോഭങ്ങൾ ഹിന്ദി ഹൃദയഭൂമിയിലെ ബിജെപിയുടെ പല കസേരകളും ഇളക്കി. രാജസ്ഥാൻ, മധ്യപ്രദേശ്, ഛത്തീസ്‌ഗഡ് എന്നീ മൂന്ന് സംസ്ഥാനങ്ങളും ഇപ്പോൾ കോൺഗ്രസ് നേതൃത്വത്തിലുള്ള സർക്കാരാണ് ഭരിക്കുന്നത്. അതിനാൽ തന്നെ 2014 ലെ പോലെയുള്ള കുതിപ്പ് ബിജെപിക്ക് ഈ സംസ്ഥാനങ്ങളിൽ പ്രതീക്ഷിക്കാൻ സാധിക്കില്ലെന്നാണ് രാഷ്ട്രീയ നിരീക്ഷകരുടെ അഭിപ്രായം.

നിരവധി അഴിമതി ആരോപണങ്ങൾ വിലക്കയറ്റം തുടങ്ങി രണ്ടാം യുപിഎ സർക്കാരിനെതിരെ ഭരണവിരുദ്ധ വികാരം ഉണ്ടായതിന് കാരണങ്ങൾ പലതാണ്. അതിനാൽ തന്നെ തെരഞ്ഞെടുപ്പിൽ യുപിഎയുടെ നെടുനായകത്വം വഹിക്കുന്ന കോൺഗ്രസിന് കനത്ത നഷ്ടമാണ് സംഭവിച്ചത്. ബിജെപി നേതൃത്വത്തിലുള്ള ദേശീയ ജനാധിപത്യ സഖ്യം 336 സീറ്റുകളിൽ വിജയിച്ചു. കോൺഗ്രസിനും സഖ്യകക്ഷികൾക്കും ആകെ ലഭിച്ചത് 59 സീറ്റുകളായിരുന്നി. മറ്റ് പ്രാദേശിക കക്ഷികൾ 148 സീറ്റുകളിൽ വിജയിച്ചു.