Adani Wilmar : 'എല്ലാം ഉപഭോക്താക്കൾക്ക് വേണ്ടി'; ഭക്ഷ്യ എണ്ണയുടെ വില കുറച്ച് അദാനി വിൽമർ

ഫോർച്ച്യൂൺ കടുകെണ്ണയുടെ വില 205 രൂപ ആയിരുന്നത് 195 രൂപയായി കുറച്ചിട്ടുണ്ട്. കേന്ദ്രസർക്കാർ നികുതിയിളവ് ചെയ്തതിന്റെ ഗുണഫലം ഉപഭോക്താക്കളിലേക്ക് എത്തിക്കുന്നതിനു വേണ്ടിയാണ് വില കുറച്ചത് എന്നാണ് അദാനി വിൽമർ കമ്പനി വ്യക്തമാക്കിയിരിക്കുന്നത്

ദില്ലി: രാജ്യത്ത് ഭക്ഷ്യ എണ്ണയുടെ (Edible Oil) വില (Price) അദാനി വിൽമർ (Adani Wilmar) കമ്പനി കുറച്ചു. വിലക്കയറ്റത്തിന്റെ ഭാരം കുറയ്ക്കാൻ ഭക്ഷ്യ എണ്ണയുടെ ഇറക്കുമതി തീരുവ കേന്ദ്രസർക്കാർ ഇളവ് ചെയ്തതിന് പിന്നാലെയാണ് അദാനി വിൽമർ വിലകുറച്ചത്. ഒരു ലിറ്റർ എണ്ണയുടെ വില പത്തു രൂപയാണ് കുറച്ചത്.  ഫോർച്ച്യൂൺ ബ്രാൻഡ് സൺഫ്ലവർ ഓയിലിന് ഒരു ലിറ്ററിന് 220 രൂപയായിരുന്നത് ഇതോടെ 210 രൂപയായി കുറഞ്ഞു.

ഫോർച്ച്യൂൺ കടുകെണ്ണയുടെ വില 205 രൂപ ആയിരുന്നത് 195 രൂപയായി കുറച്ചിട്ടുണ്ട്. കേന്ദ്രസർക്കാർ നികുതിയിളവ് ചെയ്തതിന്റെ ഗുണഫലം ഉപഭോക്താക്കളിലേക്ക് എത്തിക്കുന്നതിനു വേണ്ടിയാണ് വില കുറച്ചത് എന്നാണ് അദാനി വിൽമർ കമ്പനി വ്യക്തമാക്കിയിരിക്കുന്നത്. വില കുറച്ചതോടെ ഉപഭോഗവും വർധിക്കുമെന്ന് പ്രതീക്ഷിക്കുന്നതായും കമ്പനിയുടെ മാനേജിങ് ഡയറക്ടർ അങ്ഷു മാലിക് പറഞ്ഞു.

'ഇലോൺ മസ്കിന് ഇന്ത്യയിലേക്ക് വരാം, പക്ഷേ...': കേന്ദ്ര നയം വ്യക്തമാക്കി മന്ത്രി

ദില്ലി: ഇലോൺ മസ്കിനും അദ്ദേഹത്തിന്റെ ടെസ്ല കമ്പനിക്കും ഇന്ത്യയിലേക്ക് വരുന്നതിന് യാതൊരു തടസ്സവും ഇല്ല എന്ന് കേന്ദ്രമന്ത്രി മഹേന്ദ്രനാഥ് പാണ്ഡെ. എന്നാൽ കേന്ദ്ര സർക്കാരിന്റെ ആത്മ നിർഭർ ഭാരത് നിലപാടിൽ കമ്പനിക്കുവേണ്ടി പ്രത്യേകമായ ഇളവുകൾ നൽകില്ലെന്നും അദ്ദേഹം പറഞ്ഞു. അമേരിക്കൻ ഇലക്ട്രിക് കാർ നിർമാണ കമ്പനിയാണ് ടെസ്‌ല. 

ഇന്ത്യയിൽ ഏറ്റവും കാറുകൾ ഇറക്കുമതി ചെയ്യുകയും അവയുടെ ഇറക്കുമതിതീരുവ കുറയ്ക്കുകയും അതിലൂടെ വില്പനയ്ക്ക് അവസരമൊരുക്കുകയും ചെയ്താലല്ലാതെ ഇന്ത്യയിൽ കാർ നിർമ്മാണം തുടങ്ങില്ല എന്നാണ് ഇലോൺ മസ്കിന്റെ നിലപാട്. കേന്ദ്രസർക്കാരിൽ വൻകിട വ്യവസായങ്ങളുടെയും പൊതുമേഖലാ സംരംഭങ്ങളുടെയും ചുമതല വഹിക്കുന്ന മന്ത്രിയാണ് മഹേന്ദ്രനാഥ് പാണ്ഡെ. ആത്മ നിർഭർ ഭാരത് പദ്ധതിയുമായി മോദി സർക്കാർ മുന്നോട്ടു പോവുകയാണ്, പദ്ധതിക്ക് മികച്ച പിന്തുണ എല്ലാ ഭാഗത്തുനിന്നും ലഭിക്കുന്നുമുണ്ട്, ഈ സാഹചര്യത്തിൽ ആർക്കെങ്കിലും ഒരാൾക്ക് വേണ്ടി മാത്രമായി നയങ്ങൾ മാറ്റാൻ ഉദ്ദേശിക്കുന്നില്ലെന്നും അദ്ദേഹം പറഞ്ഞു.

നിലവിൽ പൂർണമായും വിദേശത്ത് നിർമ്മിച്ച കാറുകൾക്ക് ഇന്ത്യ ഉയർന്ന ഇറക്കുമതി തീരുവയാണ് ചുമത്തുന്നത്. 40000 അമേരിക്കൻ ഡോളറിനു മുകളിൽ മൂല്യമുള്ള കാറുകൾക്ക് 100% ആണ് ഇന്ത്യയിലെ ഇറക്കുമതി തീരുവ. 40,000 അമേരിക്കൻ ഡോളറിൽ കുറവ് മൂല്യമുള്ള കാറുകൾക്ക് ഇന്ത്യ 60% ഇറക്കുമതി തീരുകയും ആണ് ചുമത്തുന്നത്. ഇത് വളരെ ഉയർന്നതാണ് എന്ന നിലപാടാണ് ഇലോൺ മസ്കിന് ഉള്ളത്.